Medya Uren

 

SEMSÛR - Yew dewa Semsûrî ke erdlerzî ra zêde tesir bî dewa Çîlbogazî ya. Dewijê Çîlgogazî bi îmkananê xo merdeyanê xo û birîndaranê xo binê xirban ra vetî û nika zî cinîyî bi îmkananê xo werd pewjenî û yewbînan rê vila kenê.

 

Dewa Çilbogazî ya girêdayeyê qezaya Besnî ya Bajarê Semsûrî ke erdlerzo ke merkezê ci Mereş bî ra tesir bibî hema hema vaje tu banêk erdlerzî ra nêxelesîya. Banê ke erdlerzê yewine de kewtbî zî bîyî sebebe mergê xeylê hemwelatîyan. Hemwelatîyê ke bi rojan o konan de manenî pîya xebetîyenî û hewl danî ke birînanê xo yê erdlerzî pîya bipêşnî. La vera lazimîyanê înan yê esasî heywanê înan yê ke telef bîyî, binê xirban de mendî û boya heywanê merdeyan vera tersê vilabîyayîşê nêweşî esto.

 

 

‘Ma pîya pare kenê’

 

Gulhan Solmaze dest pêkerdişê qiseykerdişê xo de wina vat: “Roja yewine ya erdlerzî de ma xeylê tesrî bîyî. Erdlerz bî sey laserêk ke pêro dewijan da xover. Ma bi zorî domananê xo xelisna. Wexto ke ma domananê xo ca kerd, ma vejîyayî hetkarîya cîrananê xo. Xeylê kesî binê xirban de mendî. Ma 4 cenazeyan binê xirban ra vetî û dima ra zî her kes têkoşînê cuye da. Vera merdiman bi seyan berxikê ma telef bîyî. Hema zî binê xirban de estî. Nêameyî xelisnayîş. Hema nika hêdî hêdî hetkarî seba ma yenî. La bi raştî dewe de ma bi xo yewbînan xelisna û ma do paştîdayîşê xo yê yewbînan rê hîna gird bikerî. Ma pîya wenê, ma pîya pare kenê.”

 

‘6 keyeyî konêk de manenê’

 

Gonul Yuceye bale ant serê i-xisaranê erdlerzî û vat: “Ma bi destanê xo kesê ke binê xirban de mendî vetî. Roja yewine de seba ma kon ameyî la kêm ameyî. Ma 6 keyeyî konêk de manenî. Nika zî ge-ge kesê ke yene hetkarîya ma estî. Ma xeylê spasîyan seba kesê ke hetkarîya ma kerdî kene. Ma tîya de hewl danî ke hetkarîya yewbînan bikerî. Ma her çîyê xo pare kenê.”

 

‘Ma pîya xebetîyenê’

 

 

Fatama Erogluye zî da zanayîş le lazimîya înan bi kon, lazimîyê pakî û kincan esta û wina dewam kerd: “Ma pêro bê ban û war mendî. Lazimîya ma ya esasî na ya ke ma xo hewayo serdin ra bipawî, kon û kincî lazim î. Sewbîna zî lazimîya ma bi werdî esta. Ma cinîyî ewro hewl danî ke hetkarîya heybînan bikerî. Ma pîya manenî û pîya xebetîyenî. Ma werdê xo î pîya pewjenî û vila kenê.”