Medya Uren

 

SEMSÛR - Merkezê Semsûrî ke xeylêk awanîyê ci rijîyayî, cuya welatijan seba serdî û bêîmkanî tehluke de yo. Sakîne Coşkune vana dimayê 10 rojan mi eşka kone bigîrî, dîyar kerd ke bi rojan  tebera rakewta û tena bi hetkarîya koordînasyonê HDPyî ameyê eşkeya îdareyê xo bikera.

 

Seba erdlerzo ke merkezê ci Bazarcixê bi girdîya 7.7 û merkezê ci Elbîstan bi, bi girdîya 7.6 10 bajarê Kurdistanî zirarêk pîl dî. Yew nê bajarê ke tewr zêde ci ra zirar dî yew ci ra Semûr bi. Bi dore zî cedeyê Miftitiyî, Cadeyê Karapinarî, Taxa Newe, Alî Paşa, Sumerpark û Taxa Cumhuriyetî yê. Xeylêk welatijê ke îmkanê înan ê vecîyayîşê estbî vecîyayî yê ke mendê zî konê dayê ro cuya xo bikerê binê asayîşî.

 

Sakîne Coşkun zî yew mexdûrê erdlerzî ke xeylêk merdimê ci netîceyê erdlerzî de dinyaya xo bedelnayî. Taxa Newe ya Semsûrî nêzdîyê awanîyê xo bi cîrananê xo reyde raşteyêk veng de manenê. Dimayê 10 rojan eşkenê kone bigîrê û vernîya nê zî bi 6 keyeyan reyde konêke qij de manenêç Sakîne dîyar kerd ke ê têşan, vêşan û binê serdî de bî û vat, koordînasyonê HDPyî bi hewarê înan de ameyo.

 

‘Walî xeberê şaşî da parekerdiş'

 

Sakîne da zanayîş ke walîyî xebera şaş daya parekerdiş û wina vat: "Bi erdlerzî reyde ma senîn vejîyayî teber ma nêzanê. Bê sol û bê cilan ma vejîyayî teber. Teber de zî serd estbî, varan ameyîne. Ma tewr peyîn makîneyêk dî û ma kewtî zere. Erdlerzo diyîn de ma tewr zêde tesîr bî û ma kewtî mîyanê şokêke. Ma xebere yewbînan ra nêgirewtêne, hetkarî çinbî. Ceyranî amebî birnayîş, şebeke çinbî. Walîyê ê demî eşkerayîye da û vat, tena 7 awanî xira bîyê û 8 kesî merdî. Serekê şaredarî xo kam qule de nimineno, ma nêzanê. Ma hende bac da. Baceyê her çî vetê. La ameyîşê ci çin o. Do kam hesabê hende canan bido. Birayê mi nêweşxane de bêwayîrî ra merd. Qelbê birayê mi vindert la mudaxaleyêk baş biameyîne kerdiş, do xilas bibîne. Bi seyan kesî seba nê îhmalkarî merdê. Cîranê ma zî verê çimanê ma de eynî çî ciwîyayî."

 

‘Do kam hesabê înan bido'

 

Sakîne vat, bi baceyê ma qesra xo pirr kerdê û xo mir kenê. Sakîne wina reaksîyon mojna: "Merg ma rê meşrû dîyî. Seke do bi xêrê xo bikerê, verê çiman de çend çîyan danê. Ez heqê xo înan û tutan û tornê înan rê helal nêkena. Demo cenazeya birayê mi vetî, betanîyêke çinbî ma bipişnê. Kes derûdorê ma de çin bi. Di kênayê birayê mi zî birîndar ê, lingê îna pûç bîyê. Wa yê koşkan biewnê ma çi halî deyê. Hema bi hezaran kesî cenazeyanê xo defin nêkerdê. Êdî cayî nêmendê. La walî vejêno vano her çî binê qontrolî de yo. Dima ra mîyanê şarî de vatî ke îstifa kerdo. No çiqas rast o ma nêzanê. Seba reaksîyonê ma nê vatişî vila kerdî.  Waştî hemverê hîn çîyan bibê asteng. La bêrê bivînê çend kesî tîya mendê. Sulaleyê nê keyeyan çin bîyê. Hesabê nê çî do kam bido? Ma merdimê feqîr ê, haya kesî ma ra çin a."

 

‘Terorîstî yê qesran de yê’

 

Sakîne tewr peyîn wina vat: “Dimayê 10 rojan ez eşkeya kone bigîrî. Bi rojan ma tebera rakewtî. Ma 6 keyeyî zî binê kone de mendî. Roja ewilî ra koordînasyonê HDPyî Cemxane de xo bi rêxistin kerd û bi hewarê ma de ame. Tim Botan, Serhed, Amed, Êlih û Rihayî ra vatêne terorîst. Lê yê yewin hetkarîya ma de ameyî ê bî. Yê terorîstî yê koşkan de yê. Wa şêrê nika goristanan de xo rê rayan bigêrî."