Dîlan Babat

 

MEREŞ - Fatma Alkiza Narli de erdlerzî de keyeyê înan rijîya, bi mêrdeyê xo reyde cayê komirî de manena û dîyar kerd ke bi paştdayîşê şarî serê lingan de ya û vat, nêzana dewlete ça de ya.

 

Dimayê erdlerzê 6ê Sibate ke merkezê ci Bazarcixê Mereşî bi, pê ame dima 10 bajarî ci ra tesîr bî û bîlanço her ke şina giran bena. Heta nika 40 hezar û 642 kesî dinyaya xo bedelnayî û bi sehezaran zî birîndar estê. Erdlerz de bi hezaran keyeyî wêran bî û îqtîdaro ke demê erdlerzî de nêasa, dima ra OHAL îlan kerd û hetkraîyê şarî zî dayî AFAD. 

 

Dest dayî serê TIRan

 

Bajarokê Narli yê Bazarcixî zerrîwazan çadiran awan kerd û weşîye heta pakitî hetkarî resnayî her hetî. Xeylêk TIRê ke zerrîwazan şawitî Narli zî hetê îqtîdarî ra ameyî destserkerdiş.

 

Konî kêmî yê

 

Hetkraîyê ke ameyî desteserkerdiş zî şawitî AFADî rê û bi des hezaran kesê erdlerzî ra tesîr bî dîyar kerdî senîn ke AFADî xebatê cigêrayîşî de çinbi, hetkarîyan de zî nêdîyê. Welatijê Narliyî da zanayîş ke seba keyeyan zirar dîyo, nêeşkenê bikewê keyeyê xo û bi paştdayîşê zerrîwazan serê lingan de yê. Sewbîna hema xeylêk kesî zî xo nêresnayê konan.

 

Problemê weşîye awan bî

 

Fatma Alkize da zanayîş ke seba konî ameyî destserkerdiş, kone nêgirewtê û vat, bi mêrdeyê xo Huseyîn Alkiz reyde cayê komirî de manenê. Fatmaye dîyar kerd ke nêweşîyan rî dayo û ganî cayêk pak û germin bêro peydakerdiş.

 

‘Berî nêameyîne akerdiş'

 

Fatmaye dîyar kerd ke kîra de mendê la banê înan bi giranî xesar dîyo û wina vat: "Mêrdeyê mi çimê ey nêvînenê. Demê erdlerzî de ez û mêrdeyê xo bî. Seba ke mêrdeyê mi çimê ci nêdîne, ma wextê erdlerzî de problem ciwîyayî. Ez zî o wext kewta û lingê mi birîndar bî. Ceyran şi, berî anêbî. Mi destê mêrdeyê xo girewt û bi zorî xo eşt teber."

 

Fatma peynîye qiseykerdişê xo de wina vat: "Çar tutê mi estê. Bazarcix de ronişena. Keyeyê înan zî rijîya. Destê mi de çîyêk nêmend. Her çîyê ma şi. Ma nêzanê dewlete de ça de ya. Tu hetkarî nêdayî ma. Merdimê zerrîwazî ameyî hetkarîya ma. Her kes perîşan bîyo. Kone nêdayî ma. Ne kes yeno ne kes şin o. Ma cayê komirî de manenê. Ma nêeşkenê ci de bimanê."