Gulîstan Dursun

 

HATAY - Meclisê Weşîye yê HDKyî ra Leyla Kaline da zanayîş ke rijîyayîşê nêweşxaneyan, bêsîstembîyayîşê sîstemê weşîye rayîr problemanê cidîyan rê akeno û vat ke aye vera krîzêk ke bivejîyo raşte têkoşîn danê.

 

Badê di erdlerzan ke merkezê înan Mereş bî 10 bajaran de rijîyayîşê girdî pê ameyî û xebata wedarnayîşê xirban dewam kena. Nê bajaran ke tewr zêde tede rijîyayîş pê ame ra yew zî Hatay bî. Hema bajar de hûmara kesê ke dinyaya xo bedelnayî nêameya tespîtkerdiş. Nêweşxaneyê bajarî zî rijîyayî û coka ra zî sîstemê weşîye bi kordîne rayra nêşino û hîjyen problemê tewr girdî ra yo û coka ra tewr zêde cinîyî enfeksîyon gênê.

 

Ma kedkaranê weşîye ke roja ewile ra nata Hatay de têkoşîn danî reyde qisey kerd.

 

'Dezgehanê dewlete ra xizmet çin o’

 

Leyla Kaline Meclisê Weşîye yê Kongreya Demokratîke ya Şaran (HDK) ra Hatay de bi hawayêk zerrîwaze xebetîyena. Leylaye vat ke roja ewile ra nata cinîyî mîyanê şertanê xirban de cuyenî û wina vat: "Çi heyfo ke cinîyî hema xo nêresnenê ped ya zî kelûpulanê pakîye. Cinîyî êdî problemê weşîye yê cinîyan cuyenê. Enfeksîyonê rahimî cuyenê. Cinîyî hema zî hetê kincê binîyan de probleman cuyenê. Bajar de organîzasyonêk dewlete çin o. Nêweşxane estê la sîstemêk çin o. No zî krîzo bîyaye giran keno. Ma vera krîzo ke vejîyayo têkoşîn danê."

 

'Ganî pêroyî bêro dîyîş'

 

Leylaye ard ziwan ke problemê bîyayeyî ganî bêrê çareserkerdiş û seba problemî bêrê çareserkerdiş ganî sîstemêk ke rêxistinê weşîye awan kerdî de problemê weşîye bêrê çareserkerdiş û ganî çareserîyêk daîmî biba. Leylaye dewamê qiseykerdişê xo de vat: "Ma çend dermananê enfeksîyonî bidê zî çareserî pê nîna. Ganî sere de lazimîya tuwaletan, ped, şitiş, kincê binîyî bêrê temînkerdiş. Yanî ganî ma pêroyî biewnî babete. Ganî sere de nê çîyî bêrî çareserkerdiş."

 

Ganî xizmetê ewilîn bêrî dayîş

 

Leylaye bale ant mekanîzmayanê xizmetê weşîye yê ewilîne ser û wina dewam kerd: "Nika derheqê na babete de tu çîyêk çin o. Merkezê weşîya keyeyan çin ê. Yanî çîyêk ke prosesî cinîyan rê asan bikero çin o û babeta vatişi zî nîyo. La ganî bi lez no hetê wezîrîya weşîye bêro roniştiş "

 

Dermankerdişo nîmcet

 

Endama Sendîkaya Kedkaranê Weşîye (SES) Dîren Dogana ke sey zerrîwaze herême de xebetîyena wina vat: "Hewayo serd û rewşa psîkolojîkî vera sîstemê xopawitişê merdiman kewto. Ma hetê paştîdayîşê weşîya şarî de xebatan rayra benê. Ma tax bi taxe gêrayî, bi taybetî ma cinîyan ra zêde enfeksîyon eşnawit. Ma hewl danê ke tîya de lazimî û dermanan temîn bikerê. La dermanê destê ma kêmî yê. Ma pare kenê. Ma nêweşan rê vanê ke no dermankerdiş nîmcet o. Sewbîna cinîyê digane estê. Nêeşkenê derman bigêrê. Sewbîna hetê nêweşîyanê kronîkan de zî ma problemê dermanî cuyenî. Vera înan de zî nêweşî ri dayo. Ganî bi lez tedbîrî bêrê girewtiş."