Sema Çaglak -Rabîa Onver

 

DÎLOK - Cinîyî Cebelînurî (Nurdagi) ke rijîyabî ra koç kenê. Cinîyan vatî: "Ma bêçare yê. Pêro cuye û umudê ma binê xirban de mendî. Eke çareserîyêk biameyêne dîyîş ma do herra xo serî ra koç nêkerdêne."

 

Cinîyê ke tewr zêde erdlerzo ke merkezê ci qezaya Bazarcixî ya Mereşî  bî ra tesîr bîyî, cinîyê qezaya Cebelînurî ya Dîlokî yê. Hema hema qeza de kerra kerra ser de nêmendo û her ca rijîyayo. Hemwelatîyê ke banê înan rijîyayî qezaye ra koçê bajaranê bînan kenê. Hemwelatîyê cinîyî dîyar kerdî ke bêçareserîye vera ê koç kenê û eke seba înan çareserî biameyêne dîyîş do ca û wareyanê xo ra koç nêkerdêne.

 

'Ma di rojan cayê heywanan de mendî'

 

Cinîya bi nameyê Zeynep Kurte dîyar kerd ke bi serran o ê tîya de yî û nika pêroyê cuya înan û sîstemê înan binê xirban de mend. Zeynepe wina qala erdlerzî kerd: "Gama ke erdlerz virazîya ez hewne de bîya û kewta şokî. Mi û tutê mi, ma bi zorî xo xelisnayî. Berê keyeyê ma nêabîyêne. Keyeyê ma rijîya û ma mecburî vejîyayî. Di rojê ewilînan yê erdlerzî de ma dewe de mecburî heywananê xo reyde mendî. Cayo ke ma tede bimanê çinî bî. Ma binê varitî de mendî. Uca de zî ne awe û ne zî cereyan estbî. Ma xeylê şert û mercanê xiraban de mendî. Her çîyê ma şî. Bado ke ma xelisîyayî zî ma benê Mersînî. Ma bi serran tîya de mendî û nika zî ma cayê xo ra şinê. Seba ma xeylê zehmet o. No hîs nîno vatiş. Psîkolojîyê ma têk şî. Gama ke çîyêk lerzeno ma vanê qey erdlerz o."

 

'Ma bêçare yê’

 

Hatîce Bozgeyîke 22 serrî yo Cebelînurî de manena. Hatîceye ard ziwan ke ê paweyê hetkarîye yê û wina qisey kerd: "Ma nika nêzanê ke ma do şêrî kam ca û se bikerê. Ez vengîyêk mîyan de ya û ma paweyê hetkarîyan ê. Xora ma nêeşkayî keye ra tu çîyêk zî bigîrê. Wexto ke ma ewnîyenê keyeyê xo yê rijîyaye ma zaf pê dejenê. Psîkolojîyê şarî xirab o. Ez 22 serrî yo tîya de ya. Mi banê xo newe girewte bî û ez kîra de bîya. Ez nika mecbur menda ke şêra û zerrîya mi dejena. Tena ez nê pêroyê şarî rewşa mi de yo. Herinda ke ma koçber bibî de çareserîyêk bîn biameyêne dîyîş baş bîyêne. Konan de mendiş xeylê zehmet o. Çike hetê hîjyenî de xeylê zehmetîyê ci estê."

 

'Pêro vîrardiş û cuya ma uca de manenê'

 

Meryem Kurta ke awanîya xo ra birîndar xelisîyaye dîyar kerd ke aye nêwazena herra xo biterikna û vat: "Ez erdlerzî de sereyê xo ra birîndar bîya. Ma birîndarî keye ra vejîyayî. Vejîyayîşê mi yê keyeyî mucîze bî. Ma di rojan teber de mendî. Ne kon ne zî cayo ke ma tede bimanê estbî. Keyeyê mi zirarêk gird dî û do bêro rijîyayiş. Ma Afyon de keye dî, ma do şêrî uca. Nika ez nêzana ke ma do senî şêrî. Her çîyê ma tîya de mend. Zerrîya ma dejena la çîyêk destê ma ra nîno. Bi şîyayîşê ma heme vîrardiş û cuya ma tîya de manenê. Na rewşe ma xeylê dejnena. La ma mecburî, çike na teber de yî. Eke cuya ma newe ra dîzayn bikerdêne û seba ke ma tîya de bimanê hetkarî bikerdêne ma do tîya de bimendêne."

 

'Çîyo ke ame serê ma wa nêro serê kesêk'

 

Tewr peynî cinîyan ra Hacer Kurte qisey kerd û da zanayîş ke çîyê ke ê cuyayî emrê xo de vîrî nêkenê û wina vat: "Çîyo ke ame serê ma wa nêro serê kesêk. Şarê uca demanê xiraban derbaz kerd û qet zî vîrî nêkeno. Pêro tutê mi cayêk de bî. Gama ke erdlerz virazîya dolab kewt mi û torinê mi ser. Ez bi torinê xo reyde şîya teber. Teber de vewr û varan varîyayêne. Ma şîyî parke û uca de erdlerzêk bîn virazîya. Aye wext rewşe hîna xirab bî. Heme kes vengê hetkarîye kerdêne û qîrayêne. Ma bêçare bî. Cîranê mi binê xirban de mendî û dinyaya xo bedelnayî. Nika ma do şêrî dewa xo ya Kozdere. La uca zî cayê erdlerzî yo."