MEREŞ - Parlementera HDPyî Ayşe Acar Başarane dîyar kerd ke vera paştîdayîş û hetkarîye OHAL ame îlankerdiş û vat: "Vera her tewir zextan şar bi xo birînanê xo pişneno û hetkarîya yewbînan kenê."

 

Erdlerzî vera 10 bajarî wêran bîyî û serê erdlerzî ra 10 rojî derbaz bî. Xeylê cayan de hema zî xebata xelisnayîş û hetkarîye nêdîyaya dest pêkerdiş û hemwelatîyanî mergî reyde rî bi rî yenê verdayîş. Nê cayan ra yew zî qezaya Elbîstanî ya Mereşî ya û uca de cuye vinderta. Elbîstano ke erdlerz uca wêran kerdbî de hemwelatîyî yew bi yew bananê xo teriknayî û koçê bajaranê cîyayan kerdî. Kuçe û raşteyan de bêvengîyêk esta û xebata wedarnayîşê xirban dewam kena. Parlementera Partîya Demokratîke ya Şaran (HDP) ya Êlihî Ayşe Acar Başarane şî zîyaretê Elbîstanî û derheqê babete de ajansê ma rê qisey kerd.

 

'Elbîstan de bêvengîyêk esta '

 

Ayşe destpêkê qiseykerdişê xo de bale ant îlankerdişê OHALî ser û dîyar kerd ke dewlete vera paştîdayîşê şarî OHAL îlan kerd. Ayşeye wina qala rewşa Elbîstanî kerd: "Elbîstan de nîmeyê nufusî dinyaya xo bedelnayo. Nîmeyo ke mend zî bajar terikna. Ma ewnîyenê dormeyê xo la ma kesêk nêvînenê. Bêvengîyêk zêde esta. Tabloya ke vejîyaya raşte qelsîya îqtîdarî mojnena. Nika proseso ke virazîyayo goreyê weçînayîşî û îqtîdarîya xo rayra benê. Ma vînenê ke îqtîdar binê xirban de mendo. Tîya de bi hezaran zerrîwazî estê. Vera hewayo serdin zerrîwazî estê. Kon û cayo ke tede star bibî çin ê."

 

'Îqtîdar na tabloye ra zî fêde gêno'

 

Ayşeye dîyar kerd ke hema zî xeylê xirban de cigêrayîş nêameyo kerdiş. Ayşeye wina dewam kerd: "Tabloyêk wina esta ke vernîya ma de îqtîdar na tabloye ra fêde gêno. Ganî îqtîdar heme dezge û rêxistinanê sivîlan biardêne têhet û kampanyayêk ortax bidayêne destpêkerdiş. La herinda nê çîyî de raşteyan de şarî şîret keno. Bi rojan îqtîdar bêveng mend û dima ra vejîya OHAL îlan kerd. Vatî ke vera dizî û talanî ameyo îlankerdiş la ma dî ke wina nîyo. Hemwelatîyî mecbur mendê ke lazimîyanê xo marketan ra bigêrî û dikanan padî. La xeylê market û dikanan ra yew derzînêj daxî nêameyo girewtiş. Her çîyî kenê bahane û hêrişê sûrîyeyîjan kenê û hedef mojnenê.

 

'Bi lînçkerdişî reyde rî bi rî mendî'

 

Parlementera HDPyî Ayşeye dewamê qiseykerdişê xo de bale ant zîyaretê konanê kesê ke Sûrîye ra koç bîyî û erdlerzî ra tesîr bîyî ser û vat: "Ê zî mîyanê ters û feqîrîye de cuyenê. Bi merdimanê xo û bi îmkananê xo merdimanê xo binê xirban ra vetî. Awanîyê înan rijîyayî. Sewbîna lînçkerdişî reyde rî bi rî mendî. Nika rewşêk zemet de bi îmakananê xo payan ser de manenê. Ma hewl danî ke paştîdayîşê înan bikerê."

 

'Şar goreyê îmkananê xo hetkarî keno'

 

Ayşeye dîyar kerd ke raşteyê Elbîstanî de îqtîdar çin o û wina vat: "Vîşêrê çend polîsan kesêk tîya de çin o. Awankerdişê çend konan yê AFADî raştîya tîya nêbedelnenê. Şar tîya de pê îmkananê xo hetkarîya yewbînan kerd û mîyanê paştîdayîşî de yê. La bi îlankerdişê OHALî waştî ke vernîya paştîdayîş û hetkarîyan bigêrê. Îlankerdişê OHALî ra dima rojnamegerî ameyî tepiştiş û zerrîdayoxî ameyî tepiştiş."

 

'Cinî hîna mexdur ê'

 

Ayşeye tewr peynî da zanayîş ke tewr zêde erdlerzî ra cinîyî tesîr bîyî û wina qedêna: "Tîya de lazimî vi xeylê çîyan esta. La taybetî lazimîyê cinîyan estê. Seba cinîyan kincê binî û pedî lazim kenê. Ganî seba cinîyan taybetî xebate bêra kerdiş.”