AMED - Awanîya Altinkaya ya qezaya Rezanê Amedî ke serê rayîrê Rihayî de xisarêk pîl dîbî û vizêr şan de bi rijnayîşî ci ame kerdiş, awanî demê xebata rijnayîşî de reyke de rijya.

 

Erdlerzo ke merkezê ci Mereş bi tesîrê xo û Amedî rê zî kerdibi. Qezaya Rezanê Amedî de awanîya bi nameyê Altinkaya serê Cadeyê Rihayî de vizêr ame tespîtkerdiş ke xisarêk pîl dîya û seba rijnayîşî ameye vengkerdiş. Vizêr şan de dest bi xebata rijnayîşê awanî ame kerdiş. Awanî serê siba bi yew reyde rijîya. Welatijê derûdorî dîmenê demê rijnayîşî girewtî.

 

Xirbeya awanî Diyar Galeriaya qezaya Yenîşehîrê Amedî de xebatê cigêrayîş û xelisnayîşî dewam kenê. Vizêr ra heta nika cenazeyê 9 kesan binê xirbeyan ra ameyî vetiş. Yeno texmînkerdiş ke hema zî cenazeyê 40 kesan binê xirbeya Diyar Galeria de yê. Parlamentera HDPyî ya Amedî Remziye Tosûn, Hemserekê HDPyî Amedî Gulistan Atasoy û Zeyyat Ceylan û îdarekarê Partîya Çepê Keskî serdayîşê keyeyê ke merdimê înan binê xirbeyan de canê xo vînî kerdê û dîyar kerd ke dejê keyeyan ancenê.

 

Heto bîn ra binê xirbeyê awanîya Serîn 2 (Cengîzler) ê semtê Tesîslerê Amedî cenazeyê 5 kesan ame etiş. Heto bîn ra kemçeyî xirbeyan wedarnenê û hetêk ra zî xebatê cigêrayîş û xelisnayîşî dewam kenê. Hema zî tîmê xelisnayîşî xo nêresnayê qata zemînî yê awanî.