Rozerîn Gultekin 

 

SEMSUR - Hetê PSAKDî ra taxa Cumhurîyetî de 14 konî ameyî akerdiş. Cinîyê ke nê konan de manenê problem reyde rî bi rî manenê. Cinîyê ke tîya de cuyenî dîyar kerdî ke nê peosesî de dewlete hetkarî nêdaya mexduran.

 

Erdlerzo gird ke merkezê ci Mereş bî tesîrê xo 10 bajaran ser de kerdbî û 8 rojan xo pey de verda. Her çend ke hema zî xeylê kesî binê xirban de bibî zî dewlete nêbena cewab xebata xelisnayîş û cigêrayîşî goreyê metodan pê nêana û hemwelatîyanê xo terkê mergî kena. Vera acizîya dewlete şar bi îmkananê xo xebate rayra beno. Nê dezgehan ra yew zî Komeleya Kulturî ya Pîr Sultan Abdalî (PSAKD) a. Hetê PSAKDî ra taxa Cumhurîyetî de serê nameyê komeleye ya Semsurî Zulfîkar Yilmazî 14 konî ameyî akerdiş.

 

'Semsur wêran bîyo'

 

Banê Zeynep Erkmene zî erdlerzî de xerepîyayo û bi rojan o konan de manena. Zeynepe wina ercnayîşan kerd: "Bi rojan o ma raşteyan de yê û peynîya hewteyî ma eşkayî konêk temîn bikerê. Hetkarîya werdî yena la kelepulî çinî yê ke werd bipewijnê. Awa germ çin a, tuwalet çin o, cinîyê ke regl benê nêeşkenê ped temîn bikerê. Seba nê çîyan ma dewlete û dezgehanê bînan ra hetkarî wazenê. Seba kesê ke rewşa înan taybet a konî estî la kesanê bînan çin a. Taxan de konî çinî yê. Kona ke esta de 8 keyeyî manenê. Vanê Semsur de xisar çin o, la tîya wêran bîyo."

 

'Konêk de 20 tenî cuyenê'

 

Cinîya 70 serrî Elîf Erkmene goreyê îmkananê xo pê birandayî kone viraşta û wina qisey kerd: "Awe çin a, kelepulê ke ma xo pê germ bikerî çin a. Nêweşîya şekerî mi de esta. Ez nêeşkena her tewir werdî biwera. Yew hewyeto ke ez nêeşkena derzînê xo yê însulînî bida xo ra. Cemxaneyî de nêweşxaneyêk ame awankerdiş û dermanan ardî û derzîn dayî mi. Kone de nizdîyê 20 tenî estê û acaba do nê 20 tenî senî baş bibê."

 

'4,5 keyeyî wesayîtêk de mendî'

 

Ayşe Yildirime hewl dana ke tutanê xo bipawa û vat: "Hetê zerrîdayoxan ra xeylê kinc, lazimî û werdî ameyî şirawitiş. Ez na rewşe ra xeylê kêfweşin a. Kona ke ma nika tede cuyenî dewlete nêda. Qezaya Altinşehîrî ya Semsurî ra konan pê TIRan ardî û ma heta serê sibayî pey kewtî ke konêk bidê ma. Ganî bêro zanayîş ke dewlete hetkarî nêdaya ma. Cinîyêk lingê aye teber de û bedenê aye binê xirban de 2 rojan binê varitî de mend. Eke sere de mudaxale biameyêne kerdiş lingê aye do nêameyêne birnayîş. Di rojan ma 4,5 keyeyî wesayîtêk de mendî."

 

'Bi keda serran mi banêk viraşt'

 

Ayşeye da zanayîş ke rewşa bîyaye de psîkolojîyê înan xerepîyayo û wina qiseykerdişê xo peynî kerd: "Ma zanê ke şêrê la ma do wina senî biverdê û şêrê. Çike merdimê ma hema zî binê xirban ra nêameyî vetiş. Ma şinê serê xirban de vindenê la tu çîyêk destê ma ra nîno. Ez nê semedî ra kesê ke bajar teriknayî rexne kena. Ez musaya ke do tu çîyêk seba sibayî nêwedarna û bi keda xo mi banêk viraşt. La nika ez nêzana çi rewşe de yo. Ma tena kon û paştîdayîşê psîkolojîkî wazenê."

 

'Ma do se bikerê?'

 

Fatma Erkmene dîyar kerd ke bi serran kede daya û awanîya 3 qatin viraşta û wina dewam kerde: "La na awanîya 3 qatin rijîyaye. Nika tu çîyêk ma çin o. Ma vînenê ke erdlerz tesîrê xo kam cû komelî keno. Ma tersenê. Ma se bikerê? Kesêk hetkarî nêda. Nêweşîya mi ya tansîyonî esta û dermanê mi çin o."

 

'Merdimê ma binê xirban de mendî'

 

Zelîhaye da zanayîş ke banê înan zî nêrijîyayo la ê nêeşkenê tede bimanê û vat: "Ma çend rojan kona meedimanê xo de mendî. Peynîya hewteyî kon resa ma. Ma nika 8 kesî konêk de manenê. Gem, dat û 5 tutê datê mi binê xirban de mendî. Xeylê merdimê ma binê xirban de mendî. Hetkarî lez nêresaye. Eke hetkarî lez biameyêne kerdiş beno ke xeylê kesî biameyêne xelisnayîş. Xebata xelisnayîş goreyê raybazan pê nêana. Hema zî binê xirban de xeylê kesî estê. Pê kepçeyan kewenê mîyanê xirban. Ma lazimîyanê xo nêeşkenê bîyarî ca. Çîyê ke yenê kerdiş mird nêkenê. 30 serran ez xebetîyaya la nika ez nêeşkena banê xo de ronişa.”