Gulistan Dursun

 

HATAY - Hemwelatîyan dîyar kerdî ke komê cigêrayîş û xelisnayîşî hema zî nêşîyê Taxa Armutlu ya ke erdlerzî de wêran bî û vatî: “Tîya taxa Elewîyan a. Coka ra terqê qederê xo ameya kerdiş.”

 

Erdlerzo ke mekezê ci Mereş bî û girdîya ci 7,7 û 7,6 bî 10 bajaran de bî sebebê rijnayîşî û hûmara kesê ke dinyaya xo bedelnayî her ke şina zêde bena. Hatay bajarê ke erdlerzî ra tewr zêde zirar dîyî ra yew o û hema zî bi hezaran kesî binê xirban de estê. Roja 8ine yê erdlerzî de Taxa Armutluyî ke tewr zêde zirar dîyo de komê cigêrayîş û xelisnayîşî çin ê.

 

'Tîya herêma Elewîyan a'

 

Hemwelatîyê ke bi rojan o paweyê merdimanê xo yê binê xirban de yî, sere wedarnenê. Mexdurêk erdlerzî ke 6 merdimê ci binê xirban de mendî dîyar kerd ke ê kişta xirban de 8 rojî yo ke paweyê 6 merdimanê xo yê merdeyan ya zî weşanî ke bivejî û vat: “Wa heme Tirkîya û dinya na rîsîyayeyî bivînî. Ez nika lomeyê xo xo rê kena, ez wazena ke cenazeyî bi lez bêrî vetiş. Ne şewe û ne zî roja ma esta. Êdî bes o, ma bedenanê xo wazenê. Tîya herêma Elewîyan a û taxa Armutlu terkê qederê xo ameya verdayiş.” 

 

'AFAD nêame'

 

Hemwelatîyêk bîn zî reaksîyon mojnaye medyaya hetgir ke qewimîyayîş sey normal mojneno û dîyar kerd ke merdimê înan Hollandaye ra eşkenê bêrî la AFAD nîno. Hemwelatîyêk bîn zî bale ant nêbîyayîşê koordînasyonî ser û vat ke tîya de çinîbîyayîşê AFADî esto.