Rojda Aydin-Rabîa Onver

 

DÎLOK - Cebelînurî (Nurdagi) de netîceyê erdlerzî de bi seyan hemwelatîyî tîya de dinyaya xo bedelnayî û bi seyan kesî zî birîndar bîyî. Fatma Gokkayaya ke erdlerzî de 2 torinê xo vînî kerde ard ziwan ke wexto ke erdlerz qewimîya seke pêro dinya xira bîya hîs kerdî. Fatmaye vengê paştîdayîşî kerd.

 

Qezaya Cebelînurî (Nurdagi) ya Dîlokî de erdlerzî vera hemwelatîyê ke binê xirban de mendî hema zî paweyê xelisnayîşî yî. Bi taybetî zî roja ewilîn de seba ke koma AFADî nêameye ke cigêrayîş bikera, hemwelatîyî bi destanê xo birîndar û kesanê ke dinyaya xo bedelnayî binê xirban ra vetî. Qezaye de xebat û cigêrayîş dewam kenê. Tutanê şenikan ra heta kesê kal û pîran zî mîyan de bi seyan kesî binê xirban de dinyaya xo bedelnayî. Wexto ke merdim verê xo dano keyeyan vîneno ke her keyeyêk ra xeylê kesî dinyaya xo bedelnayî. Hemwelatîya ke banê aye xerepîya û 2 torinê xo erdlerzî de vînî kerd Fatma Gokkayaye ya.

 

‘Bêrêne ma bixelesnê’ 

 

Fatmaye ard ziwan ke aye roja erdlerzî seba nimajî serê sibayî werişta û o wext erdlerz qewimîyayo û vat ke no bi lez gird bî û reya diyîne reyna pê ame. Fatmaye da zanayîş ke wexto ke erdlez virazîya û keyeyê xeylê kesan lerza û vat ke erdlerzî vera reya diyîne xo eştî teber û wina vat: “Dima ra reyna erdlerz qewimîya. Erdlerzî vera ez teber de fikirîyaya. Mêrdeyê mi xo xelisna. Cîranê mi zî xo keye ra xelisnayî. Lajê mi, veyva mi û 4 torinê mi banêk bîn de mendêne. Cîranê mi ameyî hetkarîya ma kerdî ke veyva û torinê mi û di torinê binê xirban ra bivejnî. La ma nêeşka di torinê xo yê binê xirban bixelesnî. Veyva mi wexto ke binê xirbî de bî ya kênaya mi reyde têkilî ronaya. Vata ‘ma binê xirbî de mendî, wa ma bixelesnî.’ Dima ra xebere ame ke keye ra nêeşkayî bivejî û ma verê xo da keyeyê lajê xo.”

 

2 torinê mi dinyaya xo bedelnayî’

 

Fatmaye ard ziwan ke wexto ke erdlerz virazîya 2 torinê aye binê xirbanê erdlerzî de mendî û nêeşkayî bivejî û wina dewam kerd: “Torina mi ya 8 serrî Salîha û torinê mi yê 2 serrî Yusuf Eren dinyaya xo bedelnayî. Veyve, laj û di torinê mi serê sibayî lez ameyî vetiş. Wirdî torinê mi di rojan binê xirban de mendî. Torinê mi yê 2 serrî wexto ke vetî nêweşxane de dinyaya xo bedelna. Torina mi ya 8 serrî zî binê xirban de dinyaya xo bedelnaya. Eke komê xelisnayîşî lez biameyêne beno ke ê zî bixelesîyayêne.” 

 

‘Seke pêro yê dinya xerepîya’

 

Fatmaye peynîya qiseykerdişê xo de vat ke wexto ke erdlerz virazîya ê vatî qey pêroyê dinya xerepîyena û wina qeynî ard: “O wext seba mi peynîya dinyaye bî. La dejê mi xeylê giran o. Ma wirdî torinê xo zî defin kerd. Ma bi îmkananê xo binê xirban ra vetî. Çi guneyê nê tutan estbî. Ê hema tutî bî. Yew hewteyê ma qedîya û ma teber de konê ke ma pê îmkananê xo akerdî de manenî. Hetkarî ma rê ame. La seba ke kon çinî bî ma bi îmkananê xo viraşt. Xora ma nêeşkenê werd biwerî.”