Medya Uren

 

SEMSÛR - Qezaya Sergolî ya girêdayeyê Semsûrî de badê erdlerzî cuye tede ameye astengkerdiş. Tay hemwelatîyê mexdurê erdlerzî badê 4 rojan konî girewtî û hewl dayî ke binê konan de cuya xo bikerî binê asayîş. Hemwelatîyê ke mendî vanê ke yê ke baskê înan estbî şîyî û ma bêbaskî tîya de mendî.

 

Bado ke erdlerzê Bazarcixî yê Mereşî pê ame xeylê bajaran de rijîyayîş pvirazîya. Qezaya Sergolî ya girêdayeyê bajarê Semsurî zî înan ra yew a ke hema vaje çinî bîya. Vera rijîyayîşo ke virazîya roja 8ine de bêvengîyêk gird kewte mîyanê nê qezayî. Çend quncikan de hemwelatîyê badê 4 rojan konî girewtî û konanê xo akerd. Hemwelatîyî hewl danî ke vera hewayo serdin de asayîşê xo gênî.

 

Raşteyî binê xirban de mendî û seke bê merdim bîyo asîyeno. Xeylê hemwelatîyî bi îmkananê xo hewl danî ke bajarî ra bivejî. Yê ke mendî zî vanê ke îmkanê ma, merdimê ma çinî ke ma şêrî. 

 

‘Ez binê xirban de menda’

 

Fatma Çelîke hemwelatîya qezaya Sergolî ya ke qeza de mexdurê ke probleman cuyenî ra yew a wina qisey kena: “Wextê erdlerzî de banê ma zirarêk gird dî. Çîyê ke keye de yî serê mi de ameyî. Ez nêeşkaya wirza payanê xo ser. Lingê mi nêkewtî mi ver. Ez bi zorî vejîyaya. Banê ma êdî cayê roniştişî nîyo. Lajê mi zî astengdar o. Ma xeylê mexdur bîyî. Bi rojan o, ne aw, ne cereyan û ne zî sewbîna çîyêk çinî yo. Cayo ke ez şêra çinî yo.” 

 

‘Yê bê bask cayê xo de marenî’

 

Êrdeyê Fatma Çelîke zî bi nê vatişan mexdurîyetê xo ana ziwan ser: “Ma merdimê feqîr î. Çîyêk ma çinî yo. Ewro erdlerz pê ame. Herkes bê kes û bê mal mend. La yê ke îmkan dîyî xo tîya ra vetî. Yê ke baskê înan estbî zî firayî. Yê bê baskî zî cayê xo de marenî. Ma cuya xo verdaya Homayî. Çîyêk ke ma bikerî çinî yo. Ma pawenî. Ma se vajî zî veng o.” 

 

'Ma çar rojan bê konî teber de rakewtî’

 

Senem Turane zî qiseykerdişê xo de wina vat: “Bi erdlerzî reyde banî serûbin bîyî. Berê ma nêabîyêne. Bi zorî ma berê xo akerd. Ma xo bi zorî eşt teber. Zirarêk gird resa banê ma. Coka ra zî ma pêro teber de mendî. 4 rojan ma teber de rakewtî. Dimayê 4 rojan konî ameyî akerdiş, ma binê konan de rakewtî. Ma bi şer û pêrodayîşî êdî kon girewt. Hetê serdî de ma probleman cuyenî. Seba weşîya merdimî çîyo muhîm aw a, aye zî çinî ya.”