Elfazî Toral - Dîlan Babat

 

MEREŞ - Zerrîwazê ke Elbîstan de şuxulênê dîyar kerdî ke eke lezî mudaxale biameyîne kerdiş hûmara merdayan hende zêde nêbîne û vatî: "Her roja ke derbaz bena, lazimîyê tîya vuryenê. Nika malzemeyê xogermkerdişî, malzemeyê pakitî, seba cinîyan bincil û pedî lazim kenê." 

 

6ê Sibate de qezaya Bazarcixî ya Mereşî de bi girdîyê 7.7 û 7.6 erdlerzêk ame meydan. Erdlerzî tesîr serê bajaranê Mereş, Dîlok, Riha, Amed, Meletî, Semsûr, Xarpêt, Edene, Osmaniye, Hatay, Kilîsî kerd û rayîr ver bi rijnayîşêk pîl kerd. Seba herêmanê erdlerzî Kurdistanê û Tirkîya de kampanyayê hetkarîye ameyî destpêkerdiş. Yew cayê ke tewr zêde xisar vîna Elbistan o. 

 

Hetkarîyê ke Kurdistan û Tirkîya de ameyî arêdayîş Merkezê Kulturî yê Cemxane û eywaneyê veyvan de ameyî bicakerdiş. Hetkarî hetê zerrîwazanê ke bajaranê cîya ameyî ra yenê vilakerdiş. Hetêk ra hetkarî yena vilakerdiş û hetêk zî xebatê cigêrayîş û xelisnayîşî yenê kerdiş.

 

‘Seba cinîyan bincil û pedî hewce kenê’

 

Aylîz Onayli qeza de bi zerrîwaz şuxulêna wina vat:  "Depoyê ke hetkarî ameyê arêdayîş organîsazyonêk pê ame. Hetkarî ameyî vilakerdiş. Ez tîya beşê koordînasyonî de ca gêna. Ma hewcedariyan tespît kenê û nê gore pare kenê. Hetkarîyê ke yenê eke ma  sîstematîze bikerê, ma eşkenê bierşawê cayê lazimî. Nika problemê cil û xidayan çin a la hîn çî bînî kêmî yê. Bi xususî zî seba cinîyan bincil û pedî lazim kenê. Hetê xo germkerdişî de problem esto û ganî no çî bêro çareserkerdiş."

 

'Kelepulê xogermkerdişî lazim ê'

 

Emek Haciîbrahîmogluyî zî depoye de sey zerrîwaz xebetîyena û wina vat: "Tîya de werd û kincî xeylê zêde yî la cayê mendiş û kelepulê xogermkerdişî lazim ê. Bi taybetî rewşa dewan xirab a. Rayîrê dewan girewteyî û nêeşkenê xo biresnê hemwelatijan. Nêeşkenê hetkarîya bilezkî bierşawê. Hemwelatijî seba xo germ bikerê sobeyan wazenê."

 

'Cayê ke şêrî çin o'

 

Parlementera Partîya Karkeran ya Tirkîyaye (TÎP) ya Stenbolî Sera Kadigîl Sutluye da zanayîş ke Elbîstan de hemwelatîjî qeza terk kerdî û wina dewam kerde: "Xeylê kesî qeza teriknayî. Verê xo dayî bajaranê cîyayan. Tay keyeyî zî tî ya de mendî. Çike cayêk ke şêrê çin o. Nê keyeyî hema zî banê xisarinan de manenê. Seba nê kesan çadirî lazim ê. 2 rojî ewilinan de hetkarî nêameya kerdiş. Eke roja ewile de xebata xelisnayîş û cigêrayîşî biameyêne kerdiş do xeylê kesî do mergî ra biameyêne xelisnayîş."

 

Hetkarî û paştîdayîşê şarî...

 

Aygul Edîge zî da zanayîş ke hetkarîyê girdî ameyî kerdiş û qiseykerdişê xo wina qedêna: "Her roja ke derbaz bena lazimî bedelîyenî. Nika lazimî bi werd û şimitişî çinî yo. Nika kelepulê pakî, kelepulê xogermkerdişî lazim î. Hetkarîyê ke yenê vilayê hemwelatîyan yenê kerdiş. Her çî bi hemkarî û paştîdayîşê şarî yeno kerdiş."