ÎZMÎR - Cinîyan dîyar kerdî ke dewlete OHAL bi amancê ke krîz binimino û vernîya paştdayîşê şarî bigîro îlan kerdo û vatî, ê bi paştdayîşî eşkenê her çî çareser bikerê û bi hêzê xo bawer ê.

 

Dimayê erdlerzê 10 bajaran ame ciwîyayîş, dimayê qerarê OHALî ame girewtiş û 10ê Sibate de meclîsî ra derbaz bi. Cinîyan derheqê babete de reaksîyon mojnayî û dîyar kerdî ke OHALî bi amancê nimitişê krîzî ameyo vetiş.

 

Ezgî Ozer da zanayîş ke seba xebatê arêdayîşê xidayan û xebatê xelisnayîşî Paştdayîşê Erdlerzê Îzmîrî de ca gênê û vat: “Yê ke yewbînan xilas bikerê reyna ma yê. Hemverê şarî de xebatêke yena kerdiş esta. Înternet birnenê, vernîya ekîban padanê. La xebatêke ma zî esta. Ma bi şîarê ‘paştdayîş dana ciwîyayîş’ Îzmîr de xo rêxistin kenê. OHAL bi amancê vernîya paştdayîşî bêro girewtiş, ameyo îlankerdiş. La çi destê ma ra bêro ma kenê.”

 

‘OHAL xora estbî’

 

Avûkate Leyla Bîlgen zî fikrê xo ard ziwan û vat, îlankerdişê OHALî sere de yeno manaya sînorkerdişê şîyayîş û ameyîşan û wina vat: “AFAD pankartan bi TIRan rê daliqneno yan zî alaya AKPyî daliqneno. Tam zî erefeyê weçînayîşan de wina beno. Vernîya weçînayîşan nêwazenê rewşa nêîdarekerdişî açeryo krîz. Nêwazenê êdî merdimî dîmenê uca bivînê. Nêwazenê sazgehê komelê sivîlî çîyêk bikerê. Nêwazenê rojnamegerî bikewê ê wareyan. Nika krîzêk esto. OHAL zî xora estbî.”

 

Yewîya Karkeran Sonay Tezcan zî wina ard ziwan: “Herêma erdlerzî eşkayîne xeylû kesî biameyîne xilaskerdiş. La wina nêbi çi heyf. Ma zanê ke bi seyan kesê ke vînç şuxulnenê estê. La makîneyê karî destê sermayedaran de yê. Na qedere nîya. No terkerdişê mergî yo.”

 

Yewîya Karkeran ra Eylem Duygu Acar zî reaksîyon vera rewşe da û da zanayîş ke roj bi çirave nîno xirakerdiş û vat: “13 mîlyon kesî kuçeyan de mendî. Nêeşkayîne merdanê xo wedarnê. Nika torê neqlkerdişî birnayê. Tedayan kenê. La se kenê wa bikerê heme dinya vînena.”