Rojda Aydin

 

AMED - Îdarekara MEBYA-DERî Meryem Soylu, Endama Meclîsê Dayîkanê Aştîye ya Amedî Murvet Demîr, derheqê komployê 15ê Sibate de qisey kerdî û ardî ziwan ke bi komployî waştî şarê kurdî teslîm bigîrê û vatî: "Rayîrê aştîye Îmraliyî ra derbaz beno. Sewbîna bi wayîr vejîyayî û yewîye ma do bi ser bikewê."

 

15ê Sibata serra 1999ine de hemverê Rayberê PKKyî Abdullah Ocalan komployêk mîyanneteweyî ame averşîyayîş û teslîmê Tirkîya ameyî kerdiş. Abdullah Ocalan 24 serrî yo esîr ameyo girewtiş, Zîndanê Yew Kesî yê Asayîşê Berzî yê Îmraliyî de yeno tepiştiş. Komployê Mîyanneteweyî bi girankerde tecrid ame dewamkerdiş.

 

Îdarekara Komeleya Yewîya Kulturî yê Paştdayîşî û Hetkarîya bi Kesê Merdimê Xo Dergûşê Şaristanî Vînî Kerdê (MEBYA-DER) yê Amedî Meryem Soylu, Endama Meclîsê Dayîkê Aştiye ya Amedî Murvet Demîr, komployî şermezar kerdî û serê babete de qisey kerdî.

 

‘Rayberî wayîrê pêro şaran vejêno’

 

Meryem Soylu, dîyar kerd bi komployî reyde serê Abdullah Ocalanî de 24 serrî yo tecrîdêk kûr yeno kerdiş û vat: “Seba nê çî ewro no tecrîdo girankerde tesîrêk giran serê şarê kurdî û şarê bînan keno. Dinya de çiqas şoriş û xoverdayîş pê ameyê, serekêk înan zî bîyo. Serekê ma zî rayberî şarê kurdî keno. Rayberê tena şarê kurdî nê rayberê pêro şaran o. Serekîya şarê ke bindest o keno. Rayberê wayîrê  heme şaran vejêno. Kesê ke vanê ma merdim ê, zulm û nêheqî qebûl nêkena, ganî wurzê serê lingan û dest bidê destê yewbînan. Wa şarê ma vengê xo berz bikero û vajo ma êdî nê tecrîdî qebûl nêkenê. Ma qebûl nêkenê ke 60 mîlyon merdimî binê tecrîdî de bê û zîndan de bê. Proses o proseso ke ganî şar vajo, ez nê zilm û tecrîdî qebûl nêkenê. 7 serrî ra heta 70 serrî her kesêk seba wedaritişê tecrîdî eşkeno çîyêk bikero. Ez nê tecrîdî şermezar kena û qebûl nêkena.”

 

‘Dewletê ke heqê merdiman pawenê ça de yê?’

 

Meryeme, wina dewam kerd: “Bi nê komployî waştî heme çîyî bikerê binê destê xo. Seba nê amancê înan îmha û înkarkerdişê şarê kurdî bi. Demo ke rayberê şarêk werte ra ame wedaritiş îşxalkerdoxî, îqtîdar û zilmkarî wazenê nê şarî bifetisênê. Hetê kultur, ziwan, ehlaq û her hetî ra wazenê şar çinbikerê. Amancê nê komployî zî no bi. Bi esîrgirewtişê Serekatî ra waştî ke nê şarî bikerê binê fermanê xo. Seba nê komplo pê ardî. Serekê ma bi 24 serrî yo mîyanê çar dêsan de binê tecrîdî de yo û esîr. La Serekatî mîyanê çar dêsan de zî fikr, bawerî û hêz da şarê kurdî û şarê dinya. Hende îqtîdar ewro fikr û fehmê Rayberî şuxulnenê. Hem fikr û fehmê Serekatî şuxulnenê, hem zî serê ma de kay kenê.  Dewletê ke vanê ma heqê merdiman û edaletî pawenê bi komployêk teslîmê Tirkîya kerdî. La seba berjewendiyê xo tu çîyêk nêkenê. Ê dewleta Tirkîya ra tewr xirab ê.”

 

‘CPT dirîtî keno’

 

Meryeme, bale ant serê nêzdîbîyayîşê CPT û pers kerd ke CPT çira wezîfeyê xo bi ca nêano. Meryeme, dazanayîş ke CPT dimayê şîyo Îmraliyî dima agahî pare nêkerdo û wina vat: “La CPT nêşîyo bi Serekatî reyde pêvînayîş nêkerdo. Seba ke Serekî pêvînayîşê bi CPT re qebûl nêkerdo. CPT zî serê Tirkîya têgêreno û agahîyê destê xo de nimineno. CPT ganî rolê xo rast kay bikero. Wa derheqê Serekatî de agahîyêk rast ma ra vajê. CPT dirîtî keno. CPT sererast nêzdîyê na babete û problemê kurdan nêbeno.”

 

Venga şarî kerd

 

Meryeme, peynîya qiseykerdişê xo de venga cinî, ciwan, tutî, kal û pîran û heme şaran kerd ke hemverê tecdîrî û komployî de wurzê serê lingan û wina qedêna: “Ganî ma Serekê xo binê tecrîdî ra vejê. Şarê Kurdî nê zulm û tecrîdî qebûl nêkeno.”  

 

‘Hemverê nê komployî de tewr bi hêz bê’

 

Murvet Demîr zî komplo şermezar kerd û dîyar kerd ke komplo tena hemverê Abdullah Ocalanî de nêameyo kerdiş, eynî wextî de hemverê şarê kurdî de zî ameyo kerdiş. Murvete, dîyar kerd ke îqtîdar bi nê komployî waşto Abdullah Ocalanî û şarê kurdî yewbînan ra dûr bifînê û vat: “Îqtîdar fikirya ke bi nê komployî serbikewo. Hewn û xeyalê înan no bi. Bi komployî nê yewbînan ra nêvisîyayî. Eksê ci ma pîya ameyî girêdayîş. Ma bî yew û ma vengê xo berz bikerê. Şarê kurdî fek Serek û ne zî welatê xo û ne zî tepişteyanê xo ra vera bidê. Hemverê nê komployî de ma tewr bi hêz bî. No serkewtişê ma her wext dewam bikerê.”

 

‘Waştî ke şarê kurdî teslîmîyet qebûl bikero’

 

Murvete, dewam de wina vat: “Seba nê înan waşt bi komployî Serekatî bikerê bin destê xo û şarê kurdî serê bitewêno. Waştî ke şarê kurdî teslimiyet qebûl bikero. Labelê şarê kurdî nê çî qebûl nêkerd. Bi xoverdayîş û serewedaritiş ser kewt. Dimayê komployî çîyê ke serê şarê kurdî nûame kerdiş, nêmend. Her tewir kayî û hêrişî ameyî kerdiş. Ma sey kurdî bi her tewir hêrişan reyde rî bi rî mendî. Hem zîndanan hem teber de teda serê şarî de kenê. Zîndanan de binpaykerdişê heqan yeno kerdiş. Teber de zî cenazeyê keyeyan tewrikan de teslîmê înan yeno kerdiş. Ma qalê çi bikerê û qalê çi nêkerê.”

 

‘Rayîrê aştîye bi yewîye û Îmraliyî ra derbaz beno’

 

Murvete, tewr peyîn nê çî vat: “Şar bi xoverdayîşî heta na roje ame, do tîya ra tepîya zî dewam bikero. Gonî bi gonî nîna şûtiş. Peynîya nê zulmî de qetî aştî yena. Rayîrê aştî bi yewî û Îmraliyî ra derbaz beno. Wa şar wayîrê xo û Serekê xo vejîyo. Şarê ma wa yewbînan rê bibo yew û yewîya xo awan bikerê. Xeyrê kesêk ma rê çin o. Bi wayîrvejîyayîş û yewîye ma do serbikewê.”