Rojda Aydin - Rabîa Onver 

 

DÎLOK -  Cinîya bi nameyê Gulşen Taşdemîr û mêrdeyê aye Eyyup Gokkaya ke qezaya Nurdagî de binê xirban de mendî, 5 saetan ra dima hetê hemwelatijan ra ameyî xelisnayîş. Keyeyê Gulşene ra 6 tenî zî binê xirban de dinyaya xo bedelnayî. Gulşene ard ziwan ke çîyo ke ameyo cuyayîş qeder nîyo, peygoşkerdiş o.

 

Dîlok de erdlerzo ke pê ame de bi hezaran awanîyî rijîyayî, bi hezan kesî dinyaya xo bedelnayî û bi hezaran kesî zî birîndar bîyî. Qezaya Îslahîye û Nurdagîyî de erdlerzî dima 6 rojî derbaz bî la hema zî xeylê hemwelatîyî binê xirban de paweyê xelisnayîşî yê.

 

Taxa Yavuz Selîmî ya Nurdagîyî de cinîya bi nameyê Gulşen Taşdemîr û mêrdeyê aye Eyyup Gokkaya 5 saetan ra dima binê xirban ra hetê hemwelatijan ra ameyî xelisnayîş. Gulşena ke binê xirbî ra ameye xelisnayîş çimê aye yê çepî mohr bîyo. Roja hirîne yê erdlerzî de badê 53 saetan keyeyê Gulşene ra cenazeyê 6 kesan ameyî vetiş. Gulşena ke binê awanîyanê rijîyayeyan ra ameye xelisnayîş ma rê qala çîyê ke cuyaye kerd.

 

Badê 5 saetan ameyî xelisnayîş

 

Gulşene ard ziwan ke roja erdlerzî saetanê serê sibayî de erdlerzêk gird pê ameyo û coka ra xeylê tersayî. Gulşene dîyar kerd ke wexto ke erdlerz vîrazîya aye û mêrdeyê aye keye de bîyî û binê xirban de mendî. Gulşene da zanayîş ke 5 saetan ra dima hetê hemwelatijan ra binê xirban ra ameyî vetiş û wina qala roja qewimîyayîşî kerd: “Wexto ke erdlerz qewimîya ez û mêrdeyê xo ma kewtî binê kanepeyan û soba ma xelesna. Wexto ke soba kewt mabenê dêsan vengêk virazîya û ma xelesna. Ma zî no vengê zerre de dî û xelisîyayî. Çîyo ke ame serê ma xeylê xirab bî. Hetê teberî ra şar dêsan kinit û ma xelesna. Ma bî hetkarîya hemwelatijan ameyî xelisnayîş. Qewimîyayîş xeylê xirab bî. Vatiş û fehmkerdişê qewimîyayîşî xeylê zehmet o. Ma bi hetkarîya hemwelatija  badê 5 saetî vejîyayî teber. Tutê mi Dîlok de bî. Wexto ke eşnawitî erdlerz bîyo ameyî tîya û waştî ke mabivînê. La ez nêşîya û mi mêrdeyê xo şirawit. Keyeyê mi binê xirban de mend. Coka ra mi nêwaşt ke ez şêra.”

 

Keyeyê aye ra 6 tenî dinyaya xo bedelnayî

 

Gulşene dîyar kerd ke keyeyê aye ra 6 tenî 3 rojan binê xirbî de mendî û wina dewam kerd: “Keyeyê mi heme binê xirban de mendî. Keyeyê mi binê xirban ra ameyî vetîş la pêro kesî dinyaya xo bedelnayî. Tena kesêk mîyanê înan ra weş xelesîya. Dayîk, 3 way û warzayêk mi dinyaya xo bedelnayî. Ma nêeşkayî keyeyê xo lez binê xirban ra bivejnî. Çîmkî îmkanê ma çinî bî. Mudaxale erê ame kerdiş. Roja ewilîn de komê hetkarîye nêameyî. Coka ra 3 rojan cenazeyê keyeyê mi nêvejîyayî. Ganî kepçe û makînayê xebatî bibayêne, la nêameyî. Çike mudaxale erê ame kerdiş û keyeyê mi dinyaya xo bedelna. Eke kome biameyêne keyeyê mi do bixelesîyayêne û weş bibayêne. Mi keyeyê xo ra 6 tenan vînî kerd. No çîyêk asan nîyo. Wexto ke ame binê xirbî ra ameya vetiş birînê şenikî estbî. Karmendê weşîye ca de hadre bî û ewnîyayî mêrdeyê mi. Komê weşîye yê bînî erê ameyî.” 

 

‘No qeder nîyo, peygoşkerdiş o’

 

Gulşene ard ziwan ke erdlerzo ke pê ame hem hetê fîzîkî û hem zî hetê psîkolojîye ra xeylê tesîr ma ser de viraşt û vat ke tesîrê erdlerzî do demêk derg înan ser de dewam bikero. Gulşene vat ke erdlerzo ke pê ame qeder nîyo, peygoşkerdiş û wina qiseykerdişê xo qedêna: “Hetêk de cuye dewam kena, heto bîn de zî vînîkerdişê ma estê. Ma seba vînîkerdişan nêeşkenê çîyêk bikerê. Ma nêeşkenê xo biresnî kesan, tena serê xo manenê. No kar tena bi xebata destan mird nêkeno. Xeylê zehmet o, manêeşkenê vajê. Tu çîyêk wextê xo de nêvirazîyeno û mudaxale nîno kerdiş. Cayê xirban yenê pakîkerdiş û tay kesî binê xirban ra yenê vetiş. Kesê ganî zêde nêvejîyenê. Xeylê kesî dinyaya xo bedelnayî. Ganî hetkarîya seba erdlerzî hertim hadre bibê. Lazim o payanê xo ser de vinderê.”