Melîke Aydin

 

ÎZMÎR - Emîne Yucela ke erdlerzê Îzmîrî de tutanê xo, merdimê aye û dayîka aye dinyaya xo bedelnayî da zanayîş ke rant vera rapor nînê dîyîş û ard ziwan ke têkoşînê aye yê huqûqî wa seba mexduranê erdlerzî bibo nimune.

 

Erdlerzo ke 6ê Sibate de merkezê ci Mereş bî, xeylê bajaran de tesîr bî û bi des hezaran kesî dinyaya xo bedelnayî. Erdlerzî ra dima çîyê ke erdlerzanê bînan de ameyî cuyayîş ameyî vîrê merdiman. 2020î de Îzmîr de merkezê ci Girava Sîsamî girdîya ci 6.9 erdlerzêk pê ame û qezaya Bayrakliyî de 4 awanîyî rijîyayî û 118 kesî zî dinyaya xo bedelnayî. Awanîya Rizabeyî de 37 kesî dinyaya xo bedelnabî. Emîne Yucele ke na awanîye de tutê aye Ferda û Dîren, merdimê aye Vera û Lena û dayîka aye Arîfe Yucele dinyaya xo bedelnayî da zanayîş ke têkoşîno ke rayra bena wa seba mexduranê erdlerzî bibo nimune.

 

‘Raporê rizîyayîşî nêkerdî dosya’

 

Emîneye dîyar kerd ke erdlerzî ra dima xeylê awanîyî payan ser de mendî la rijîyayîşê 7 awanîyan de xeylê kesî dinyaya xo bedelnayî û vat: “Raporê rizîyayîşî esto. Bi taybet awanîya Riza Beyî. Ma dima ra nê raporî dî. Ma dî ke nê raporî nêkerdî dosya. Qetlîyam zî vat ez yena. Ma 4 rojan mîyanê xirban de vindertî. Nika ma vînenê ewro zî bi rojan o şar vêşan û têşan kişta xirban de vindeno. Umudê ma no yo ke tutanê xo vînî nêkerê. Ma waşt ke herinda awanîya Riza Beyparkî de hişmendîya erdlerzî virazîya. Amacê ma qetlîyam û dej nêrê vîrîkerdiş. La waştişê ma nêameyî dîyîş.”

 

Binpaykerdiş û rant

 

Emîneye da zanayîş ke ganî her tim tedbîrê erdlerzî bêrî girewtiş la yeno peygoşkerdiş û wina dewam kerd: “Ma awanîyanê senîyan de cuyenî. Awanîya ke ma tedeyê, cayê karî ke ma tede xebetîyenê acaba saxlem ê. Çîyo muhîm asayîşê canî yo. Nika têkoşîno ke ma rayra benî de yê ke bîyî sebebê qetlîyamî yenê muhakemekerdiş. Şikinê nimite estê.”

 

Ganî dosya bibo nimune 

 

Emîneye ard ziwan ke seba dosya bibo nimune têkoşîn danî û vat ke mergê erdlerzê Îzmîrî de tesaduf nêbî û bi qestî tede estbî. Emîneye peynîya qiseykerdişê xo de da zanayîş ke dewaya 5ine Mehkemaya Cezaya Giran ya Edlîyeye Îzmîrî dewam kena do 26ê Gulane de bêra dîyîş.