MERKEZÊ XEBERAN - Semsûr ke erdlerzî vera tede rijîyayşêk gird pê ame de no hirê rojî yo cenazeye ke binê enkazan ra yene vetiş bi betanîyan yene piştiş û bi komî yenê definkerdiş.

 

Dîmenê ke Semsûrî ra yenê mojnenê ke Semsûr de tesîrêk çend gird yê erdlerzî bîyo. 2 dîmenê ke resayî verê destê Ajansê Mezopotamya (MA) de asîyeno ke cenazeyî bi hawayêk komî yenê definkerdiş.

 

Operatorê kemçeyî ke Silopî ra sey zerrîwaştoxêk şî Semsûrî, di vîdeoyê goristano ke qurbanîyê erdlerzî tede ameyî definkerdiş pare kerd. Vîdeoyo yewine de mezelêk pê kempeyî ameyo akerdiş û 10 cenazeyê ke bi betanî, laylon û xalîyan ameyî piştiş, kişta yewînan de ameyî rêzkerdiş.

 

Vîdeoyê diyîne de zî xeylê mezelê ke serê înan ameyî grewtiş asîyeno. Kerrayêk ronayî sere goran û înan ser de tena reqemêk ameyo nuştiş. 

 

Operatorê kemçeyî ke vîdeoyan ajansê ma rê şirawit wina vano: “Di rojî verê cû ma 7 tenî ameyî tîya. Ma sey operatoranê kemçeyan tîya de yî. Tu kesek sere makşneyanê tîya çinî yo. Ne AFAD, ne cendirme û ne zî kesek bîn. Roja ke ma ameyî tîya ra nata ma cenazeyan vejenî û defin kenî. Psîkolojiyê mi xerepîya yo. Ez êdî nêeşkena xover bida. Cenazeyan vejenê, pabra kince serê înan bi betanîyan pişnenê û defin kenî. Tîya de kesek nêmendo. Herkes dinyaya xo bedelnayo. Yê ke yenê vetiş zî kam î, kesê ke yenê definkerdiş kam î, tu kes nêzano.” 

 

AFAD bi eşkerayîyêk resna ke seba babeta tespîtkerdişê nasnameyan û xizmetê definkerdişî ganî koordîneyêk bibo, bi Wezîrîya Edaletî û Wezîrîya Karanê Zereyî reyde koordînasyonêk awan kerdî û 7ê sibata 2023î de heme walîtî û dezgehanê fermîyan rê ameyo şirawitiş. Na babete maeybî vatiş ke cenazeyê ke nasnameyê înan nêameyo tespîtkerdiş do heta 24 saetan bêrî vindarnayîş, dima ra nimuneyê DNA û şopê giştî bêro girewtiş, fotografê înan bêrî antiş û tewr peynî do bêrî definkerdiş.