Rojda Aydin - Rabîa Onver

 

DÎLOK - Cinîyê ke bajaranê cîyayan ra seba paştîdayîş û hetkarîye ameyî Dîlokî ardî ziwan ke bajar wêran bîyo û vatî ke hetkarî nîna bajarî. Cinîyan dîyar kerdî ke roj roja wayîrvejîyayîşî ya.

 

Bado ke erdlerzê Bazarcixî yê Mereşî pê ame xeylê bajaran de rijîyayîş pê ame. Qezaya Îslahîye û Nurdagî û dewê înan de zî texrîbatêk gird pê ame û bajar hema hema pêro çinî bîyî. Coka ra hemwelatîyî mecburê ke tebr de serdî de bimanî. Xeylê bajaran û teberê welatî ra xeylê TIRê hetkarîye şirawîyayî. Sewbîna xeylê kesî seba hetkarîye vere xo dayî bajaranê wêranbîyayeyan.

 

Cinîya bi nameyê Kezban Dumlu û Hemsereka Şaredarîya Sêrtî ya HDPyî ke herinda ci de qeyûm ame tayînkerdiş Berîvan Helen Işike seba paştîdayîş û hetkarîya şarê Dîlokî bikera ameye herême. Cinîyan vatî ke do hertim bi şarê xo reyde mîyanê paştîdayîşî de bê.

 

‘Roj roja wayîrvejîyayîşî ya’

 

Kezban Dumluye seba hetkarî û paştîdayîşê şarê Dîlokî bikera Bursa ra ameya bajar. Kezbane ard ziwan ke şîdetê erdlerzî werano ke virazîyayo dano çiman ver û wina vat: “La wexto ke ma ameyî bajar ma dî ke no wêran çend gird o. Ma bîyî şahid ke bîrînê zerrîya înan çend xorîn o û bêderman o. Erdlerzî ra dima xeylê welatan de hemwelatîyê ma seba paştîdayîşî kewtî mîyanê hewldayîş û paştîdayîşî. La wexto ke ma ameyî welat ma dî ke hetkarî mird nêkenê. Lazimî bi hîna zêde hetkarîye esta. Roj roja wayîrvejîyayîşî ya. Ma tîya de vînenê ke netîceyê erdlerzî çend gird o. ma vînenê ke bîrînê înan çend xorî yo. Şar perişan bîyo û teber de yo. No demserrî de merdim nêeşkeno teber de bimano. Hemwelatîyî seba ke xo germ bikerê betanî nêvînenê. Seba tutanê xo şit nêvînenê. Roj na roja ke wayîrvejîyayîşêk gird virazîyo. Ma wayîr vejîyayîşî çend gird bikerê, ma do hende birînan bilefnê. Ma veng dane ke bêrêne wayîrê tîya bivejêne.”

 

‘Qirkerdişêk gird ame cuyayîş’

 

Bêrîvan Helen Işike zî da zanayîş ke erdlerzo ke bî qirkerdişêk gird o û wina dewam kerd: “Vanê ke cografya qeder a. Ez bawer kena ke raşt o û nîmê qederî yo. Seba nê welatî beno qeder. Çimkî nê welatî de cuya tewr erzane hemwelatîyî cuyenî. Seke zanistî zî vanê xetê fayî Kurdistan û Tirkîya ra vîyarenê. Deme verênan de dem bi dem erdlerzê girdî pê ameyî. Sewbîna qetlîyamêk gird pê ame. No zî mojneno ke cuya merdiman çend ercan a. Sucdarê tewr gird îqtîdar bi xo yo. Çimkî berpirsîyar îqtîdar o. Kesê ke nê çîyan ser de rant kenê mutahît û şaredarî yê. Îqtîdar û kesê ke seba awankerdişê awanîyan ruhsat danî sucdar ê. Faîayêk gird o.”

 

‘Ma cayê şarê xo de yê’

 

Berîvane dîyar kerd ke erdlerz Sêrtî de zî ame hîskerdiş, la tesîrêk gird bajarî ser de nêkerd û wina vat: “Ma seba ke hetkarîya şarê xo bikerî ma ameyî Dîlok. Ma tîya de vînenê ke lazimîya şarî bi xeylê çîyan esta. Lazimî bi hetkarîye esta. Coka ra ma tîya de yî û heta lazimî bibo ma do tîya de bibî. Ma tîya de kişta şarê xo de yê. Seke şima zî zanê wexto ke erdlerzê Xarpêtî bî sey Şaredarîya Sêrtî ma hetkarîyêk gird seba uca kerd. Nika beno ke şaredarîyê ma çinî bî. La bi pêro îmkananê xo hetkarîya şarê xo kenê. Çi ferz bo ma do bikerê. Tîya de şar teber de yo. Şar nêeşkeno şêro bananê xo. Welatêk ke ma vajî dewletêk komelkî û bin ê hawayî yo, hema nêeşkeno şarê xo rê bibo cewab. Şar bi îmkananê xo hetkarîya bajarê ke erdlerzî tede qewimîya keno. Ma do heta peynî şarê xo reyde bê.”