ÎZMÎR -Tepişteya nêweşe Fatma Ozbay ke hema tepişte ya, wezaretê edaletî û meclîs seba waştişnameyanê ci cewab nêdano.

 

Rewşa tepişteyê nêweşan roj bi roje giran bena û ne yenê dermankerdiş û ne zî yenê veradayîş. Zîndanê cinîyan ê Şakranî de 15 tepişteyê cinî yê nêweşî estê. Nînan ra  yew zî Fatma Ozbaya 59 serrî ke 1997ine de endamîya rêxistine ra ameya tepiştiş û cezaya muebetî ci rê ameya birnayîş a. Fatma, zîndananê Amed, Mîdyad, Bayburt, Erzirom û Şakranî de bi temamî 28 serrî yo tepişte ya. Seba kanserê  memikan, memikêke Fatmaye ameyo tirakerdiş û rîsko ke nêweşî bierzo kezeba aye, este û rehîmê ci esto. Pêwa nê Fatmaye nîna tahlîyekerdiş û cuya aye tehluke de ya, cezaya hucreyî dayê ci. Pêwa raporê nêweşxaneyê dewlete dayê û pêwa muracatê avûkatan tu cewab meclîs, midûrîyê weşîye yê merkezî û wezaretê edaletî nêame girewtiş. 

 

‘Nêameye dermankerdiş’

 

2018ine de Nêweşxaneyê Cigêrayîş û Perwerdî yê Erziromî de teşîsê kanserî Fatma rê ame ronayîş. Fatma ke nêweşîya aye sewîyeya hîrêne de bi, uca de 8 seansî kemoterapî girewte û dima ra 25 seansî radyo terapî girewte, çar nodolî binê çengê aye ra ameyî girewtiş. Memikê aye çepî ame girewtiş. Pêwa ke rîskê kanserî bedenê aye de vila bibo estbi zî çend aşman de xêrcê çend fîlîman çîyêk nêame kerdiş. Fatma nêeşkayîne biewna xo ra  û waya ci Gulser Ozbay ke refekatîyê aye kerdêne, eşrawitî zîndanê Şakranî. Fatmaye waşt aye bierşawê Şakranî la demêk derg nêerşawitî. 5ê Çeleyî 2020ine de erşawitî Şakran.

 

Pandemî de nêameye veradayîş

 

Fatmaye prosesê pandemî de 7 aşman sewqê doktorî nêkerdî. Reçeteyê dermanê ci nêameyî nuştiş. Seba nêdermankerdişî rewşa aye tewr xirab bî û pêwa pêro nêweşîyan nêameye veradayîş. Waştişnameyê ke ameyî dayîş zî bêcewab ameyî veradayîş. Dimayê 7 aşmî dima seba tespîtê dejî memikê aye berdî Nêweşxaneyê Cigêrayîş û Perwerdî yê Katîp Çelebî. La bi sebebê sîstemê kompîturê nêweşxaneyî xira yo biyopsî nêkerdî. Demê Fatma nêweşxane ra ardî zî tena kerdî hucre û koxuşê siyasiyan ra dûrvistî.

 

13 rojan cezaya hucreyî

 

Seba nêweşîyê werdî yenê dayîş zî Fatma hîn tesîr keno. Nê prosesî de birîn bedenê aye de peyda bî. Nê mabêne de problemê kezebe vejîyayî werte. Nê prosesî de bi sebebê Fatmayê tix verê xo de daya ro 13 rojî cezaya hucre dayê.  

 

Fatmaye prosesê tepiştişê xo de, dayîk û pîyê xo vînî kerd. Yewin kesa şina serdayîşê aye waya aye ya. La seba ke aye zî Agirî de ciwîyenê, zaf zêde nêeşkena şêro.