Rojda Aydin

 

DÎLOK - Hetgira Hemserekatîya Pêroyî ya ESPyî Beycan Taşkirana ke mîyanê heyeto ke badê erdlerzî heyeto ke Îslahîye û Cebelînurî de ca girewte da zanayîş ke tablo xeylê muhîm o û herême de sera 60-70ê awanîyan rijîyayo. Beycane reaksiyon mojnaye astengkerdişê TIRê hetkarîye û veng daye ke ganî heme kesî mîyanê hetkarîye û paştîdayîşî de bo.

 

Badê erdlerzo ke merkezê ci qezaya Bazarcixî ya Mereşî bî, bi hezaran kesî dinyaya xo bedelnayî û xebatê cigêrayîş û xelisnayîşî zî dewam kenî. Merkezê ke bilançoya erdlerzî giran bî ra yew zî qezayê Îslahîye Cebelînûrî yê Dîlokî yo. Netîceyê erdlerzî de xeylê kesî hemwelatîyî dinyaya xo bedelnayî û xeylê kesî zî birîndar bîyî. Heta nika kesê ke binê xirban de mendî ra xeber nîna girewtiş. Erdlezî ra dima heyeto ke Partîya Demokratîke ya Şaran (HDP), Partîya Sosyalîste ya Bindestan (ESP) û Têgêrayîşê Cinîyan yê Azadan (TJ) pê ame, qezayê Îslahîye û Cebelînur û dewanê înan de zîyaretan pê ard. 

 

Hetgira Hemserekatîya Pêroyî ya ESPyî Beycan Taşkirana ke mîyanê heyetî de ca gêna rewşa herême ercnaye. 

 

‘Tablo xeylê giran o’

 

Beycane ard ziwan ke erdlerzî ra dima Dîlok de tabloyêk giran virazîyayo û Cebelînur û Îslahîye de sera 60-70ê awanîyan rijîyayo û awanîyê ke nêrijîyayî zî zirarêk gird dîyî. Beycane da zanayîş ke awanîyê ke zirar dîyî ganî bêrî ganî bêrî viraştiş û wina vat: “Şar hem raşteyan de yo û hem zî seba merdimanê xo bixelesno mîyanê hewldayîşan de yo. AFAD vano ‘ma her ca de yî’ la ma dî ke zuran kenî. Komê xelesnayîşî xeylê kêmî yo û kelepulê înan kêmî yo. Merdimê nê cayan xeylê hewl danî. La pê kelepulanê keman merdim yenê xelisnayîş. Cayo ke îmkan kêmî yo de zî pê kepçeyan cenaze yene vetiş.”

 

‘Nêweşxane dekerde yî’

 

Beycan da zanayîş ke cenazeye hemwelatîyan raşteyan de yî û şar wayîrê cenazeyanê vejîyeno. Beycane dîyar kerd ke nêweşxaneyî dekerde yî û ca nêmendo û wina vat: “Morgî heme dekerde yî ca nêmedo. Xeylê hemwelatîyî dinyaya xo bedelnayî. Rijîyayîşêk gird esto. Sebebe rijnayîşî zî dewlet û sîstem o. Rejîmo faşîst seba ke keda xoza û merdiman ser de ronişeno şar mexdur o. Coka ra tablo hende giran o. Acaba tablo giran bî se bî? Mudaxale kerdî, nê.”  

 

'Ma paştîdayîşê şarê xo kenê’

 

Beycane bale ant astengkerdişê TIRan ser û wina dewam kerd: “Vizêrna bi hêrişan cewabê nê seferberîye yeno dayîş û ameyî astengkerdiş. Şarê ma bê werd yeno verdayîş û mîyanê birînanê înan de verdanî. Mecburî dûrî ra erwnîyenê merdeyanê xo. Ma tena mojnenî. Ma hewl danî xo biresin hearîya înan. Çi destê ma ra yeno ma kenî. Wezîfeyê ma yê ewro sîyasî, birdozî, însanî û komelkî yo. Ma hemverê ci de bêveng î. Ma paştîdayîşê şarê xo kenê.”

 

‘Bêrê paştdayîş bidê’

 

Beycane, tewr peyîn vat, ganî lezabeze pêro hetkarî biresê şarê herême û wina qedêna: “Lazim o Nêweşxaneyê Sahrayî bêrê awankerdiş. Ganî şar xo biresno awe û cayê daşirî. Lazim o ke konteynir, çadirê zimistanî, tulumê rakewtişî bêrê. Ma paweyê şarê xo yê ke wayîrê des bajaran rê zî vejîyê. Pêgirewtiş paştdayîş girs keno. Ma fek vera nêdanê. Ma vînenê ke şarê ma fek vera nêdayo. Ma vanê bêrê bi dîqet tîya bişuxulîyê.”