Rojda Aydin

 

DÎLOK - Hemwelatijêe dewanê qezaya Cebelînûrî ardî zîwan ke hirê rojî yo ke erdlerzî virazîyayo la tu konêk hetkarî û cigêrayîşî nêameyo dayîş. Hemwelatijan ard ziwan ke pê îmkananê xo cenazeyan bine enkazî ra vetî û defin kerdî. Cinîyan reaksiyon mojnayî selahîyetdaran û vatî ke qey wayîrê înan nêvejîyenê.

 

Merkezê Dîlokî, qezayê  Cebelînûr û Îslahîye û xeylê dewan de erdlerzo ke pê ame vera nika ra bi seyan kesî dinyaya xo bedelnayî û bi seyan kesî zî birîndar bîyî û hema xeylê hemwelatijan ra xeber nîna girewtiş. Erdlerzî ra dima konê hetkarîye û cigêrayîşî hema zî nêşîyî dewan. Dewê qezaya Cebelînûrî yê sey Keferdiz, Satirhoyuk û Gedîklî pêro rijîyayî û banî nêmendê ke hemwelatîjî tede bimanê. Heto bîn de nika tu hetkarîyêk nêşîyo dewan. Coka ra hemwelatîjê dewan reaksîyoninê. Heta nika tu hetkarîyêk înan rê nêşirawîyayo û komê cigêrayîşî nêameyî dewanê înan. 

 

Hemwelatijê dewa Keferdizî reaksîyon mojnayî selahîyetdaran û vatî ke qey wayîrê înan nîno vejîyayîş. 

 

‘Goristanan de ca nêmendo’

 

Hemwelatija bi nameye Havva Çokukoglu ard ziwan ke hirê rojî verê cû erdlerzêk gird pê ame û rewşa înan xeylê xirab a. Hevva dîyar kerd ke erdlerzî vera aye û tutê aye xeylê tersayî û wina dewam kerd: “Ma no travmayî nêeşkenê derbaz bikerê. Bine awanîyan de hemwelatijî estê. Ma cîran û merdimanê xo vînî kerd. Rewşa ma xeylê xirab a. Hirê roje derbaz bî, hema hetkarî nêameyo tîya. Sewbîna konê cigêrayîşî zî nêameyî akerdiş. Ma dewlete ra paweyê hetkarîye yê. Ma paweyê hetkarî yê. Tîya de xeylê banî rijîyayî û xeylê zî teqayî. Coka ra ma nêeşkenê bikewî bananê xo. Erdlerz hema dewam keno. Wa heme kes hetkarîya ma bikero. Tîya de rewşe xirab a. Goristanan de ca nêmendo ke cenazeyan defin bikerî. Her keyeyêk ra 3 ya zî 5 kesî dinyaya xo bedelnayî. 3 rojî yo komê AFADî nêameyî. Tay konî ameyî vilakerdiş, la ma nêeşkayî bigêrî. Çinî bî. Na dewe de nizdîyê 4 hezar hemwelatîyî estê. Dewa ma dewêk tarîxî ya. La no tarîx erdî reyde bî yew û çinî bî. Milet hema binê awanîyan de yo. Ma nêeşkenê çîyêk bikerê. Hektarî xeylê kêmî yo. Mird nêkeno. Ma umud kene ke kesek bîn nê çîyan nêcuyo. Lazimîya ma bi cereyan, aw û werdî esta. Ma şewe teber de manenê. Ma nêeşkenê bikewê keyeyanê xo.”

 

‘Ma tîya de ameyî vîrîkerdiş’

 

Hemwelatîya bi nameye Yildiz Daşe zî ard ziwan ke erdlerzî vera xeylê tersayî û do tu reye vîrî nêkerî. Yildize da zanayîş ke saet çaran de erdlerzêk gird virazîya û bi zorî xo xelisnayî. Yildize wina vat: “Tu kincêk ma çinî yo ke ma xora bidî. Dinya serde ya, werd û awe çinî yî. Banê ma rijîyayî. Cenazeyê ma hema erqazî de yî, hema nêameyî vetiş. Rewşa ma raşte de ya. Ma raşteyan de mendî. Cayo ke ma şêrî çinî yo. Konî çinî yê ke ma tede bimanî.  Ma nêeşkenê keyeyê xo ra çîyêk bivejnî. Cereyan çinî yo. Konê AFADî hende rojî yo hema zî nêameyî. Cenazeyan ma bi xo vet. Ma cenazeyan vet û cayêk de da pêser. Awe çinîya ke ma cenazeyan bişuyî. Dima ra ma awe cayêk ra ard û cenazeyan şit û defin kerd. Kesê ke binê enkazî de yî vînîbîyaye yî. Ma çend reyan AFADî gêrayî, la nêame. Kesê selahîyetdarî wa bi lez bêrî û merdimanê binê enkazî bivejnî. Wa wayîrê ma bivejî. Ma wazenê konêk bibo ke mat ede bimanî. Hetkarîyê ke hemwelatîyî şirawenî yene astengkerdiş. Domanê ma serd gênî. Betanî çinî yo ma xo bipawî. Lazimîya ma bi xeylê kelepulan esta, werd û awe esta. Kesek vengê dewijan nêeşnaweno. Ma tîya de ameyî vîrîkeriş.”