Rojda Aydin

 

DÎLOK - Ajansê ma şî cayê erdlerzî yê qezaya Îslahîye û dîmenê yewine yê bajarî weşanaye û ame dîyîş ke nizdîyî sera 70î awanîyî rijîyayî û awanîyê bînî zî heme zirar dîyî. Cinîyê Îslahîye dayî zanayîş ke bêwayîr ameyî verdayîş û tu kesek cewabê persan nêdano. Cinîyî ardî ziwan ke veng dayî AFADî la nêameyî û selahîyetdaran rê wina vatî: “Eke ewro nêrî wa rojê bînan de do zî nêrî.”

 

Di rojî verê cû saet 04.17î de bi girdîya 7,7 û saet 13.24î de zî bi girdîya 7,6î Dîlok û Mereşî de erdlerzêk gird pê ame. 10 bajarî erdlerî ra tesîr bîyî, xebatê cigêrayîşî û xelisnayîşî yê mîyanê cayê erdlerzî de bi hezaran awanîyî rijîyayî. Nê bajaran ra yew ke erdlerzî ra tesîr bî qezaya Îslahîye ya Dîlokî yo.

 

Cenazeya tuta 17 serrî yena vindarnayîş

 

Rayîro ke şino qezaya Nurdagî û Îslahîye erdlerzî vera heme çeqayî û zirar dîyî. Eynî wextî de bajarokê   Sakça Gozu ya Nurdagîye de zî erdlerzî vera rijîyayîş pê ame û xeylê dîrekê cereyanî zî war bîyî. Sewbîna ame zanayîş ke bajarok de cenazeya tutêka 17 serrî binê awanîye ra ameya vetiş, la seba ke AFAD nêşîyo cayê hedîseyî keye teber de bêçare yo. Heto bîn de ame vatiş ke kesê binê awanîyan de mendî estê. 

 

Pirê corî yê vejîyayîşê qezaya Nurdagi ke ver bi Îslahîye ra şino zî rijîya û rayîr şîyayîş û ameyîşê wesayîtan rê ame girewtiş. Dekewtişê Nurdagîyî zî trafîkî rê xetemîya.

 

Qeza sera 70 rijîya

 

Wexto ke merdim keweno dekewtişê qezaya Îslahîye û vîneno pêro rijîyayî û coka ra wesayîtê ke vîyarenê zehmetî ancenî. Sewbîna erdlerz vera hirê rojan cereyan û awê qezaye birîyayî. Wexto ke merdim vere xo dano mîyanê bajarî vîneno ke awanîyê ke zirar nêdîyî çin o. Netîceyê erdlerzî de nizdîyê sera 70ê awanîyan rijîya û awanîyê ke mendî zî zirarêk gird dîyî. Heto bîn de darê mîyanê bajarî heme war bîyî û pirê mîyanê bajarî zî rijîya. Sewbîna qezaye de camîyê bi nameyê Opetî zî erdlerzî vera rijîya. 

 

Şar mîyanê rewşanê zehmetinan de yo

 

Qezaye de aw, cereyan û şebekeyî ameyî birnayîş. Lazimîyê şarî zî nînê vînayîş û coka ra zehmetîyê girdî cuwîyenê. Hemwelatîyê mîyanê bajarî ke awanîyê înan rijîyayî wesayîtan de manenê, tay kesî dingê wesayîtan de ca viraştî û tay zî bi îmkananê xo konan ardî û uca de manenê. Serd û seqem vera taybetî kesê astengdar, tutî, kal û pîrî tira tesîr benê.

 

Keyeyêk ra 6 cenaze 

 

Pê kepçeyan xebat yenê kerdiş, heta nika xeylê birîndar û kesê ke dinyaya xo bedelnayî estî. Çîyo ke tewr zêde bi dejin bî zî keyeyêk cenazeya pîr, pî, dayîk û 3 tutan pêroyî yê 6 tenan vejîya. Cenazeyê 6 tena ke ameyî vetiş teber de kişta yewbînan de ronîyayî û merdimê înan zî lorikan varnenê.

 

Vengê şarê Îslahîye nêame eşnawitiş

 

Sewbîna heta selahîyetdar û komê AFADî tu hetkarî hemwelatîyê qezaye ra nêameyo kerdiş û coka ra keyeyî reaksîyonin î. Hemwelatîyan dayî zanayîş ke heta nika tu çapemenîyêk zî vere xo nêdaya Îslahîye û vengê înan nêresnayî û bi reaksîyonin î. Heto bîn de Şaredarîya Îslahîye zî tu çîyek nêkerda. Ajansê ma şî Îslahîye û dîmenanê yewinan rayaumûmîye reyde pare kerd. Cinîyê Îslahîye ajansê ma rê rewşa ke cuyayî pare kerdî.

 

‘Şaredarî hetkarî nêkerd’

 

Cinîya ke nameyê aye nêame zanayîş ard ziwan ke bapîrê ci binê awanîye de mendo û hirê rojî yo ke tira xeber nîna girewtiş. Bine awanîye de mesaj şirawitî vatî ‘ma nizdîyê 7-8 tenî cuyenî’. Ma AFADî gêrayî nêameyî. No hirê rojî yo ke ma bine enkazî de yî. Ma nêeşkenê bivejî. Ma bi îmkananê xo tay kesan binê enkazî ra vetî. Ma şaredarîye rê zî vat la ê zî seba ma tu çîyêk nêkerdî. Newe vatî ke ma do bêrê.”

 

‘Ma di rojan paweyê AFADî mendî’

 

Cinîya ke nameyê aye nêameye zanayîş zî vat ke no di rojî yo ke paweyê AFADî yî la nêameyî û wina dewam kerd: “La nêameyî. Birîndar û merdeyê ma binê enkazî de yî. Eke vizêr biameyêne do ewro pêro bixelesîyayêne. Nêameyî û înan mergî rê verdayî. Merdime ma yê ke binê awanîyan de mendî AFADî rê nuştî vatî ‘ma cuyenê, bêrêne ma bixelesnê’. La vera înan zî heta ewro nêameyî, dima ra ameyî. Ma AFADî gêrenî la ma nêeşkenê xo biresin. AFAD ame vat ‘ekîpmanê me çinî yo’ û yewna reye şî.”

 

Reaksîyonê hemverê AFADî de pîl benê

 

Cinîya bi nameyê Munevver Alici, dîyar kerd ke kênaya xala ci binê awanî de menda û hîrê rojî yo tu agahî nêeşkenê bigîrê. Munevvere, dîyar kerd ke dimayê di rojan AFAD ameyo qeza û wina vat: “Kênaya xala mi binê awanî de ya û hema nêameya vetiş. AFAD dimayê di rojan ame. Ma wexto AFADî gêrayî vatî, ma do bêrê la nêameyî. Dimayê di rojan ameyî dest bi cigêrayîşî kerdî. Xebate çin a, kes nîno. Hetkarî çin a. Cinîyêke bînê awanî de giranî birîndar bî, merdiman bi zor aye vetî. Kes nêame tîya. Yenê ewnîyenê û reyke bîn şinê. Seba îmkanî kêm ê, ma zî nêeşkenê zêde çîyêk bikerê. Heta na roje zî ma agahîyêke kênaya xala mi ra nêgirewta. Xeylêk merdimê ma dinyaya xo bedelnayî û birîndar bîyê. Awanîyê saxlem nêmanê. Zêdeyêr qezayî bi pêroyî rijyayê. Hewt serrî ra bigî, heta hewtay serrî heme mexdur ê. Hetkarî nîna kerdiş. Werd çin o ke ma biwerê. Zimistan o û cilî çinê ke ma xo pay bikerê. Ma  bi tena sereyê xo mendê. Ma paweyê hetkarîya şarê xo yê. Ma wazenê wa birîndarî û merdeyê ma ganî binê awanî ra vejê.”

 

‘Bi merdişî reyde rî bi rî yê’

 

Cinîya bi nameyê Gule zî reaksîyon AFADî rê mojna û wina vat: “Na bînaya ma de kesê rewşa înan başe zî estê. La tu muxadele nêame kerdiş. AFAD nîno înan xilas nêkeno. Bi merdişî reyde rî bi rî yê. Ma nêzanê ke êdî çi bikerê. Eke ma bibîne ma bi xo hetkarîya  AFADî bikerdêne. Wa vengê ma heme dinya ra bêro  eşnawitiş. Wa tena prosesê weçînayîşî de nêbê. Rewşa wina de zî bê. Eke nînê wa qet nêrê verê ma. Wexto ke ma AFADî gêrenê vanê, her cayê rewşa îstîsnayî de ma nêeşkenê bêrê.”

 

‘Nêweşxaneyî pirr ê’ 

 

Gule da zanayîş ke nêweşxane de seba kesê dinyaya xo bedelnayî û birîndarî estê pirr o û wina vat: “Ma bi cenazeyan eynî erebe de mendî. Seba ke cayê ma cenazeyê xo ronê çin o. Nêweşxaneyî pirr ê. Cenazeyan danê serê maseyan. Ma zî kerdî erebeyan. Ma nêeşkenê cenazeyê xo defin bikerê. Ne awe, ne ceyran û ne zî werd çin o. Rewşa ma qet baş nîya. Hetkarê şarî ra yeno kerdiş. Ma bi rojan o tîya de yê. Eke merdê ma cenazeyê xo wazenê. Eke  sax bê zî wa xelas bikerê. Şaredarî tu hetkarî nêkerd û veng zî nêvejêno. Goreyê agahî ke vanê xebatkarê şaredarî binê awanî de mendê û dinyaya xo bedelnayê. Tutan ra bigîrê, heta kal û pîran ma heme mexdûr ê. Xeylêk kesî erebeyan de mendî. Konteynirêk dayê ma û ci de 30 kesî manenê. Betanî çin a ke ma xo germ bikerê. Ma ne çîyêk werd û ne zî şimit.”

 

‘Wa bêrê kesê bînî xilas bikerê’

 

Dayîka bi nameyê Safiye Çelîk zî dîyar kerd ke kênaya ci zî mîyan de xeylê merdimê ci binê awanî de mendê û wina vat: “Ma nêzanê ke sax ê yan merde yê. Ma înan ra tu agahî nêeşkenê bigîrê. AFAD roja yewine ame û reyke bîn şi, çîyêk nêkerd. Eke rew cigêrayîş bikerê do kesê bînî zî xelas bikerê. Çadirêke çin a ma şêrê ci de bimanê. Tîya zî erdlerz bi la kesêk vengê ma nêeşnawit. Wa demêk rew bêrê kesê binê awanî de bixelisnê.”