STENBOL - Endama Cinî Pîya bi Hêz ê Ferîde Eralp, dîyar kerd ke dewlete paştdayîş dana tarîkat û cemaetan, hêrişê cinsî yeno nimitiş û wina vat: “Bi qerarê nimitişî dayî serê dosyaya dewaya H.KGye, di serrî yo wezaretê Xizmetê Komelî û Keyeyî hêrişê cinsî yê tute nêvînaye ameyo. Ma wezaretî ra bawer nêkenê. Ma do taqîbkerdoxê prosesî bibê.”

 

Awankerdoxê Weqfê Hîranurî yê girêdayeyê Cemaetê Îsmaîlaga Yusuf Ziya Gumuşel kênaya xo ya 6 serrî H.K.G bi mirîdî xo Kadîr Îsteklî reyde "zewicnabi" û bi serran hêrişê cinsî tute rê amebi kerdiş. Derheqê şikdaran de bi sûcdariya ‘hêrişê cinsî’, ‘hêrişê cinsî tê sîstematîk’ dewa ameye akerdiş û yewin roniştişê dewa 30ê Çeleyî de Salona Konferansê Hakan Yalçin yê Blokê Cyê Edliyeyê Anadolu de ame vînayîş. Baroyanê cîya ra bi seyan avûkat, rêxistinê cinîyan, sîyasetmedarî, temsîlkarê sazgehê komelê sivîlî tewrê dewa bî û bî vengê H.K.Gye. Wezîra Keyeyî û Xizmetê Komelî Derya Yanike zî roniştiş de ca girewte. Heyetê dadgehe qerarê nimitişî yê avûkatanê şikdar û Wezîra Keye û Xizmetê komelî waştibi qebûl kerd.

 

Endama Cinî Pîya bi Hêz ê Ferîde Eralp derheqê babete de ajansê ma rê ercnayîş kerd.

 

Dewlete paştdayîş dana tarîkatan!

 

Ferîdeye da zanayîş ke tarîkatî welat de bi hawayêke sîstematîkî sey hacetî yenê şuxulnayîş û nimûneyo twer somut zî Cemaetê Gulenî bi. Ferîde wina vat: “Bi  Cemaetê Gulenî sînor çin o. Têkiliyê dewlete bi cemaetan reyde esto. AKP-MHP zî wezîfeyê dewlete dewrê tarîkatan kenê û paştdayîş danê înan. Wezaretê perwerde, Wezareta Keye û Xizmetê Komelî bi komele û weqfê ke cemaet û weqfan awan kerdê rê protokolan îmza kenê. Esasê nê de zî kapasîteyê xizmetî pêşkêşê weqfan kenê.”

 

Bi qerarê nimitişî şikdarî yenê pawitiş

 

Ferîdeye dîyar kerd ke rojnamegerê serebûtê tacîz û tecawuzê cemaetan anê rojeve hedef yenê girewtiş, rojnamegerê ke çîyê ameyê serê H.KGye ardî rojeve, ameyî tehdîdkerdiş. Ferîde wina dewam kerd: “Dewlete nêwazena desteştiş vejîyo werte. Wazenê serê serebûtan bêrê padayîş ke hîn çî welat de asan bibê. Tirkîya de seba şikdarî bêrê pawitiş, nêverdenê serebûtî vejîyê werte. Çapemenîya terefgire xeberanê derheqê dewaya H.K.G de viraştişê zewacê emrê qijî de û hêrişê cinsî meşrû keno. Seke H.K.G zûran kena mojnenê. Vatî, ‘Demo ke ma tut bî veyvitî dayîne ma pêrûne ro, aye xora 6 serrî nê, 13 serrî ameya zewicnayîş’. Vanê qey 13 serrî zewicnayîş nêkeweno çarçewaya sucî. Şima nêeşkenê pawitişêk wina bikerê. No îtîrafê sûcî yo.”

 

‘Wezîra Keye û Xizmetê Komelî hêrişî asan kena’

 

Ferîdeye bale ant serê vatişê Wezîra Keye û Xizmetê Komelî Derya Yanike ke seba dewa vatibî, ‘babetêke serê sîyasetî ra ya’ û vat, no zî nimûneyêk bîn yê hêrişê cinsî meşrû keno yo. Ferîde wina dergî da qiseykerdişê xo: “Pêwa weqfê Enser de hêrişê cinsî desan tutan rê ame kerdiş, wezîra Keye û Xizmetê Komelî desteştiş meşrû kerd û vat, ‘reyke ra çîyêk nêbeno.’ Eke weqfêk sûcê sîstematîk keno û seba ewnîyayîşê ci sîyasî û sîyasetê xo bipawê do hêrişê cinsî zî bi asanî bido dewamkerdiş.”

 

‘Ma wazeratî ra bawer nêkenê’

 

Ferîde peynî de wina vat: “Rîyê înan nêdeja û şerm nêkerdî, hêrişê cinsî yê tuta 6 serrî pawitî. Wayîrê şikdaran vejîyayî. Vatî, ‘Yusuf xoce tena nîyo, xoceyê ma yo.’ No vatiş bi tena sereyê xo îtîraf bî.Yanî vatî ke sucê ci kerdo ma zî kenê, ma xo ra pêro nê kenê, ma îmzeya xo erzenê zewicnayîşê tutan. Hetê her kesî ra wayîrvejîyayîşê roniştişî girîng bi. Pêameyîşê huqûqî zî bi têkoşîn mumkin o. Verê bi di serran Wezareta Keye û Xizmetê Komelî hayeye ci serebûtî ra estbî. La nêvînaye ame. Seba nê bawerîya ma bi wezaretî nîno. Ma na babete de zî heqdar ê. Ma cinî bi qerar ê û ma do taqîbkerdoxê prosesî bibê.”