ŞIRNEX – MEBYA-DER, TUAY-DER û HDP şîyî şînê Evîn Encuye ke Gabar de dinyaya xo bedelnaye. Parlamentera HDPyî Nuran Îmîre dîyar kerd ke vera şerî de ganî vengê yewîya kurdan berz bibo.

 

Herêma Bestaye ya Şirnexî de 22ê çeleyî de namebê YJA-STAR û leşkeranê tirkî de şer vejîya û netîceyê şerî de 6 endamê YJA-STARî dinyaya xo bedelnayî. Cenazeyê endamanê YJA-STARî wedarîyayî Nêweşxaney Dewlete yê Şirnexî. 25ê çeleyî de cenazeyê Gulnaz Ocal û Hamdîye Tekbîdake Wan de, Leyla Saîn zî Dihê ya Sêrtî de ameyî definkerdiş. 27ê çeleyî de zî cenazeyê Rahîfe Kutlaka ke hetê keyeyê aye ra ame girewtiş Wan de ameye definkerdiş.

 

Heto bîn de cenazeya Evîn Encu û yewna cenazeyêk paweyê teşhîskerdişî yî. Şînê qorîcî Nîmet Encuyo ke datê Evîn Encuye yo vera cenazeya Evîne teslîmê keyeyî nêameye kerdiş. Badê 11 rojan cenaze teslîmê keyeyî kerdî. Şînê Evîne dewa Bêjuhê ya girêdayeyê Roboskî ya Qilebanê Şirnexî de yo. 

 

Komeleya Yewîye Kultur Paştdayîş û Hekrarîya Kesê ke Merdimanê xo Derguşa Şaristanîye de Vînî Kerdî (MEBYA-DER), Komeleya Paştîdayîşî ya bi Keyeyê Tepişteyan (TUAY-DER), parlamenterê Partîya Demokratîke ya Şaran (HD) Nuran Îmîr û Hasan Ozguneş, hemserekê HDPyî yê bajarê Şirnexî, Endamê Meclîsê Dayîkanê Aştîye û endam û rayîrberê rêxistinê qezayan yê HDPyî beşdarê şînî bîyî.

 

Şîn de parlementere Nuran Îmîre qisey kerd û vat: “Çiqas şer xorîn beno, hende hizûrê komelî vînî beno.  Gama sîyaset pê nêro, pey keweno. Israrê înan oyo ke şarê kurdî biancê mîyanê wareyê şerî. Seba ke encax bi şer eşkenê îqtîdarê xo derg bikerê. Bi çek û şer tu wext netîce nîno girewtiş. Na rastî her serdemê tarîxî de xo reyna kerda. Ganî problemê  kurdî bêro zanayîş û bêro çareserkerdiş.

 

Nîsan ra tepîya tewr zêde cenaze ameyê dayîş Herêma Botanî yo. Seknê şarê Botanî seknêk tarîxî yo. Xerîteya rayîrî nê şerê zî eşkena diyar bikera. Ganî ma hemverê nê dej û şerî de vengê xo berz bikerê. Ma do pîya vengê yewîye berz bikerê. Çi beno wa bibo, ganî ma nêrê kayanê înan. Reyke bîn  sersaxî  keyeyê Evîne rê wazenê.”