COLEMÊRG - Serrgêra komployê mîyanneteweyîye ke hemverê Rayberê PKKyî Abdullah Ocalanî de pê ame de do ver bi Gemlîkî rayîrraşîyayîşêk bêro viraştiş. Cinîyê Geverî rayîr ra şîyayîşî ra ver kuçe bi kuçe, ber bi ber gêrenê û xebatê rayîr ra şîyayîşî pê anê. Cinîyî wina vatî: “Seba azadîye ma rayîr ra şêrê Îmraliyî.”

 

Bi serkêşîya Kongreya Komela Demokratîke (KCD), Partîya Herêmê Demokratîkî (DBP), Partîya Demokratîke ya Şaran (HDP), Tevgerê Cinîyanê Azadan (TJA), Federasyonê Komeleyanê Paştdayîşî û Huqûqî yê bi Keyeyanê Tepişteyan û Hukmwerdeyan ê Medî (MED TUHAD-FED) û Komeleya Yewîye Kultur Paştdayîş û Hekrarîya Kesê ke Merdimanê xo Derguşa Şaristanîye de Vînî Kerdî (MEBYA-DER) do vera tecrîdê serê Rayberê PKKyî Abdullah Ocalanî û 15ê Sibate komployê mîyanneteweyîye bi sloganê ‘Seba çareserîye ma do rayîr ra şêrê Îmraliyî’ rayîrraşîyayîşêk pê bîyarê.

 

6ê Sibate de qezaya Qoserî ya Mêrdînî û qezaya Geverî ya Colemêrgî ra ver bi Gemlîkî rayîrraşîyayîşêk bidîyo dest pêkerdiş û rayîr ra şîyayîşî ra ver HDP Gever de kuçe bi kuçe raşte bi raşte xebatan rayra beno û her kesî dawetê rayîr ra şîyayîşî keno.

 

‘Çareserîya azadî û aştîye Rayberî yo’

 

Hemsereka HDPyî ya Geverî Halîme Sure dîyar kerd ke di serrî yo Rayberê PKKyî Abdullah Ocalanî ra xebere nîna girewtiş û wina vat: “Seba ke Birêz Ocalanî ra xebere nîna girewtiş şarê kurdî şikin o. Tecrîdê serê Birêz Ocalanî ganî bi lez bêro wedaritiş. No tecrîd şarê kurdî ser de zî pê yeno. Ganî heme şarê kurdî dest bidî yewbînan û hemverê tecrîdî de biwurzê. Çareserîya aştî û azadîye serekatî yo. Ma zî seba wedaritişê tecrîdî şinê Gemlîkî. 6ê Sibate de şar do Geverî ra bikewo rayîr. Seba beşdarbîyayîşî ma tax bi taxe û dew bi dewe xebatan da destpêkerdiş. Ma dew bi dewe, tax bi taxe gêrayî û şarî dawetê rayîr ra şîyayîşî kerd. 6ê Sibate de do şarê ma raşteyan de cewab bido. Ma 6ê Sibate de heme şarê xo dawetê awanîye kenê.” 

 

‘Wa tecrîd bêro wedaritiş pêvînayîş bidîyo dest pêkerdiş’

 

Aktîvîsta TJAye Şadîye Kirmizigule da zanayîş ke tecrîd ser de Îmraliyî pêroyê şarî ser de tesîr viraşto û ganî şarê kurdî dest bidê yewbînan û tecrîdê serê Rayberê PKKyî Abdullah Ocalanî bişiknê û nê çîyan ard ziwan: “Nika sebebe krîzê ekonomî û kiştişê cinîyan zî tecrîdî vera pê yenê. Pêvînayîşê keye û avûkatan nînê kerdiş. Demêk derg o ke xebere nîna girewtiş. Şar wazeno ke rayberê xo ra xebere bigêro. Ganî tecrîd wedarîyo û pêvînayîşê bi telefonî bi lez bidîyo destpêkerdiş. Ma 6ê Sibate de Geverî ra startê rayîr ra şîyayîşê Gemlîkî danê. Ez veng dana pêro şarê kurdî ke beşdarê rayîr ra şîyayîşî bibê. Amacê rayîr ra şîyayîşî şikitişê tecrîdî yo. Ma seba aştî û azadîye ver bi Gemlîkî şinê.”