ANQARA - Parlamentera HDPyî Dîlan Dîrayet Taşdemîre dîyar kerd ke dewaya girewtişî, bloqekerdişê hesabê HDPyî pêro nika ra mojnenê ke hîle kewto mîyanê weçînayîşî û mutabakatê Tîfaqê Milletî zî sey metne meşgulkerdişî û restorekerdişî biname kerd.

 

Parlamentera Partîya Demokratîke ya Şaran (HDP) ya Agirî Dîlan Dîrayet Taşdemîre derheqê dewaya girewtişî, bloqekerdişê hesabê xezîneyî yê HDPyî û mutabakatê maseya Tîfaqê Milletî de ercnayîşan kerd.

 

‘Kumpasê bînan kerdî dewre’ 

 

Dîlane da zanayîş ke îfadeyê şahidanê nimiteyan vera hetkarîya xezîneyî yê seba partîya înan ameya birnayîş û dewaya girewtişê HDPyî ke ameya akerdiş zî huqûqî ra dûrî ya û wina vat: “Dewaya girewtişê HDPyî girêdayeyê qerarê bloqekerdiş û dewaya Kobanê ya. Her çend ke heme çîyan goreyê xo organize bikerê zî seba girewtişê partîya ma delîlêk nêvînayî. Ewnîyayî ke ser nêkewenê kayanê xo yê bînan kerdî dewre. AKP demek dergo ke têgêrayîşê kumpasî dayo dest pêkerdiş. Hewl dano ke hêrişê hemverê HDPyî bi kumpasan meşru bimojno. Weçînayîşê 7ê Hezîrana 2015î ra dima heme konseptanê hêrişî kerdî dewre.”

 

‘Nika ra hîle kerdî mîyanê weçînayîşî’

 

Dîlane dewamê qiseykerdişê xo de da zanayîş ke serdozgerîya komare ya dadgerîye di reyan seba bloqekerdişê hesabanê partîya înan muracat kena û vat: “Mehkemaya Desturê Bingeyîn (MDB) vana ke delil çin o û tepîya şirawena. La şahidêk nimite seba ekonomîya HDPyî îfade dano. Raşte de kumpasêk esto, sucêk organîzekerde esto. 14ê Gulane de do weçînayîş bibo û nika ra sere dayî hîle û manîpulasyonan. Acaba nê şertan mîyan de do weçînayîş raşt bibo û zelal pê bêro.” 

 

‘Hesabê AKPyî yewbînan nêgirewt’

 

Dîlane vat ke hesabê AKPyî qet yewbînan nêgînê û weçînayîşê 7ê Hezîrane de AKP her tim hemverê HDPyî de konsepte hêrişî kerd dewre û wina domna: “La no hesanê AKPyî şarî vernîya xo de vîneno û tepîya agêra. Ma nê çîyî zî wina vînenê. Bloqe kerdiş, şarê ma wayîrê partîya xo vejîyeno. Kampanyaya ‘xezîneya ma şarê ma ya’ dîya destpêkerdiş û bexş kerdî. Bexşî ra wetayîr, wayîrvejîyayîşê şarî û reaksîyonê înan zaf muhîm o.”

 

Dîlane ard ziwan ke AKP hewldayîşo ke do Kurdan ra senî rayan bigêro mîyan de yo û seke AKP hesasîyetê Kurdan çiman ver de gêno, xo mojneno û wina vat: “AKP welat rayra beno û heme mekanîzmayî destê ci de yê. Nika erzenê milê MHPyî ser û vanê ke ‘ma vanê, ma nêvanê, vatişê MHPyî yê’ û nê çîyî bi komelî dane bawerkerdiş. Wazenê ke rayanê Kurdanê muhafazakaran Kurdê ke demek dergo rayan dayene, newe ra dest bifîno. La ma eşkenê vajê ke zurêk gird AKP bi xo pê kumpas û girewtişan hemverê partîya ma keno. MHP qet şik çino ke ano ziwan la raşteyêk înan yê ke tede siyaset bikerê çin o.”

 

‘Nizdîbîyayîşê restorekerdişî’

 

Dîlane qiseykerdişê xo yê peyênan de bale ant mutabakatê maseya 6in ke rojanê verênan de ame eşkerakerdiş ser û wina qedênaye: “Pêkerdişê Stenbolî û problemê Kurdî mîyanê mutabakatî de çin o. Tirkîya de problemê seserrî estê. Problemê tarîxî yê cinîyan û Kurdan esto. Problemê bindestî û kedkaran esto. Raşto ke tena pê bernameyê weçînayîşî nînê çareserkerdiş la qet nêbo ganî nameyê înan bêro dayîş. No mutabakatê maseya 6ine nizdîbîyayîşê restorekerdiş û reformekerdişî yo. AKP texrîbat kerd la Tifaqê Milletî zî boyax û badana keno. No zî çîyêk nêbedelneno. No tena metnek meşgukerdişî û restorekerdişî yo.”