ANQARA - Serekwekîlê Grûba HDPyî Saruhan Oluçî nobeta hemverê tecrîdî de qisey kerd û vat, ‘‘Nobeta ma ya Edaletî û rayşîyayîşê ver bi Îmraliyî yê Qoser û Geverî do bibê yew’’

 

Nobeta Edaletî ya wekîlanê HDPyî ke hemverê tecrîdê serê Rayberê PKKyî Abdullah Ocalanî de dabî destpêkerdene roja 32ine de ya. Parlamenter Saruhan Oluç, Gulîstane Kiliç Koçyîgîte, Alî Kenanoglu, Muazzeze Orhan, Kemal Bulbul, Abdullah Koç, Dîlane Dîrayet Taşdemîr, Ayşe Surucu, Kemal Pekoz, Ridvan Turan û Huseyîn Kaçmaz beşdarê nobede bîyî. Serekwekîlê Grûba HDPyî Sarûhan Olûçî nobete de qisey kerd.

 

‘Dinya de nimûneyêk winasî çin o’

 

Serekwekîlê HDPyî Saruhan Oluçî vat, ‘‘Nobeta Edaletî ke 21ê kanune 2022î de bi rayşîyayîşê meclîse ra ver bi Wezaretê Edaletî ma dabî destpêkerdene, ewro roja 32ine de ya. Ma ewro peynîya nobeta xo anê. Sebebê na çalakîye zî seke her kes zano, tecrîdê giran ê Îmraliyî yo. Bi çalakîye ma waşt ke Wezaretê Edaletî peynîya bêvengîya xo bîyara. Îmraliyî de no demêko derg o ke tecrîd dewam keno û no tecrîd rasta zî tesîrê xo pêroyê tirkîya û wareyanê mîyannetewîyî rê est o. Dinya de nimuneyêko winasên çin o.’’

 

Sarûhan Olûçî dîyar kerd ke no tecrîd sey parçeyêkê polîtîkayê serdestîye yê seba çinkerdişê destkerdeyanê şarê kurd û destkerdeyanê demokratîkî yeno kerdene.

 

‘Muracatê ke yenê kerdiş cewab bidê’

 

Sarûhanî vat, ‘‘6ê sibate û dima ma do dest bi rayşîyayîşê ‘‘Ma seba çareserîye ver bi Îmraliyî şinê’’ kenê ke do Qoser û Geverî ra dest pêbikero. Seba ke gere bi lezûbez peynîya na bêhiqûqîye bêra û pêvînayîşî bêrê kerdene. Ma reyna venga Wezaretê Edaletî danê, verdê ke hiqûq bêro caardene, cewap bidê muracatan, verdê ke avûkatî bieşkîyê pêvînayîşan bikerê. Verdê ke wa avûkatî û 4 hikmwerê Îmraliyî yewbînan bivînê.”