Marta Somek

 

STENBOL - Endama Delegasyonê Mîyanneteweyî yê Hemverê Tecrîdî avûkate Francîsca Perez diyar kerd ke CPTyî beno hemkarê işkenceye tecrîdî û vat ke seba peynîardişê tecrîdê serê Rayberê PKKyî Abdullah Ocalanî û azadîya fîzîkî pê bêrs ganî babete bibî CPTyî û seba ke rewşe bêra bedelnayîş Tirkîya bidî zorî.  

 

Tecrîdo giran yê serê Rayberê PKKyî Abdullah Ocalanî û tepişteyanê bînan yê Îmraliyî dewam keno. 22 aşmî yo ke Ocalanî ra xeber nîna girewtiş. Seba wedaritişê tecrîdî her ca de çalakî yenê viraştiş û aktîvîteyê cîya cîyayî yenê kerdiş.

 

Endama Delegasyonê Mîyanneteweyî ke hemverê tecrîdî de 7 welatan ra 36 kesan ra pê ameyêne, mabenê 25-27ê çeleyî de Stenbol, Amed û Anqaraye de pêvînayîş pê ardî. 12 kesê ke heyetî de ca girewtêne hirê rojan Stenbol de derheqê prosesê sîyasîye û problemanê ke cinî cuyenî de pêvînayîşan pê ardî. Zîyaretan de babeta yewine tecrîd û binpaykerdişê heqan yê zîndanan û tesîrê tecrîdî yê serê komelî bî. Endamê delegasyonî 28ê çeleyî de Taksîm Hill Otelî de forumêk ‘tecrîdê mîyanneteweyî’ pê ardî û seba azadîya Abdullah Ocalanî mesajê têkoşîno hempare dayî.

 

Endamê heyet Stenbolî ra yew zî avûkate Francîsca Pereze ya. Francîscaye derheqê zîyaretî de û tecrîdê serê Abdullah Ocalanî de ajansê ma rê qisey kerd.

'Şert û mercî sey îşkence yê'

 

Francîsca da zanayîş ke şertê zîndanê Îmraliyî teberê huqûqîyî û wina vat: “Hemverê heqanê merdiman de bêhurmetîyêk esto. Merdim eşkeno şertê ke dewre de yî sey îşkenceyî biname bikero. Pêro welatê NYyî mecburê ke hemverê heqanê merdiman de bıhurmet bibî. La Tirkîya şertanê NYyî nâna ca, pêkerdişê ke îmze kerda ca nêana û NY û welatê girêdayeyê ci zî berpirsîyarîye ra remenî.”

 

‘CPT beno hemkarê îşkenceyî’

 

Francîsca dîyar kerd ke CPTyî aşma êlule ya 2022î de şîyo zîyaretê zîndanê Îmraliyî la tu eşkerayîyêk nêdayo û nê çîyan vat: “CPTyî hetêk ra hemverê xo de bêrêzî keno û amacê bîyayîşê xo nêano ca. Heto bîn de zî beno hemkarê îşkenceyê ke bi Abdullah Ocalanî yenê kerdiş. Ma zîyaretan de xeylê bêhuqûqîyanê serê tepişteyan goşdarî kerd. Ma rewşa tepişteyanê cinîyan ra, şertê ke tedeyî ra û rewşa Abdullah Ocalanî ra şikin î.”

 

‘Mekanîzmayê mîyanneteweyî bê tesîr î’

 

Francîsca qiseykerdişê xo yê peyênan de babeta tecrîdê serê Rayberê PKKyî Abdullah Ocalanî ercnaye û wina qedênaye: “Hem sîstemê edaletî yê Tirkîya û hem zî dezgehê mîyanneteweyîye babeta heqanê merdiman û pawitişê heqanê sîyasîye de wezîfeyê xo nêanê ca mekanîzmayî bê tesîr î. Ganî tecrîdê serê Abdullah Oalanî bêro wedaritiş û azadîya fîzîkî pê bêro. Ganî zor bi Tirkîyaye bêro kerdiş ke rewşa bîyaye bêra bedelnayîş û babete bikerî rojeva endamanê CPTyî.”