Şehrîban Aslan

 

AMED - Kaybaze û rejîsore Berfîn Zenderlîogluye bi hemkarîya tîyatroyê Amed, Êlih û Wanî atolyeyê tîyatroyê kurdî pê ana. Berfîne wina vat: "Ma tecrubeyanê cîyayan pîya pare kenî. Ê persenê, ez zî heta ke destê mi ra bêro cewab dana. Ma çîyanê neweyan musenî. Atolye coka ra muhîm a."

 

Kaybaze û rejîsore Berfîn Zenderlîogluye serra 2004î ra nata xebatê tîyatroyî rayra bena û rejîsorîya xeylê kayan kerda, xeylê serkewtişan dest fînaya. Kayan de ca dana Kurdî û nika atolyeyan de perwerdeyê Kurdî dana. Berfîne derheqê atolyeyê Amed, Wan û Êlihî de malumatan daye.

 

Berfîna ke tîyatroyê Seyrî Meselî de sey kaybaze, musnayox û organîzatore xebitîyaya nika atolyeyê Amed, Êlih û Wanî pê ana. Berfîne wina vat: "Ma sere de atolyeyê Êlihî da dest pêkerdiş. Hirê rojan dewam kerd. Dima ra ma Amed de pê ard. Aye ra zî dima ez şîya Wan. Wan de zî do hirê rojan dewam bikero. Dima ra ez do biqedêna. Sernameyê atolyeyan dramaturjî û rejîsorî yo. Bu taybetî seba tîyatroyê kurdî zêde atolye nînê viraştiş. Coka ra mi lazimî bi çîyêk winasî dî."

 

'Atolye muhîm û bi ercin ê'

 

Berfîne da zanayîş ke atolye bi hemkarîya tîyatroyan pê ame û wina dewam kerd: "Êlih de bi Şermola û Yenî Sahneye atolye ameyî kerdiş. Amed de zî bi hemkarîya Tîyatroyê Bajarî yê Amedî, Wan de zî bi hemkarîya Tîyatrovanan ame kerdiş. Ma tecrubeyanê cîyayan pîya pare kenî. Ê persenê, ez zî heta ke destê mi ra bêro cewab dana. Ma çîyanê neweyan musenî. Atolye coka ra muhîm a."

 

'Eleqe zêde ya'

 

Berfîne qiseykerdişê xo yê peyênan de bale ant eleqeya seba atolyeyan ser û vat: "Eleqe zêde ya. Eleqe weş a. La ez nê xebatan bi sînor verdena. Çimkî wexto ke beşdarbîyayîş zêde beno eleqe zî zehmet bena. Coka ra nika bi 12 kesan yeno kerdiş, yanî her atolyeyî de 15 tenî estî. Ziwanê atolyeyê mi Kurdî yo û bi taybetî mi Kurdî tercih kerd. Vera heme qedexe û ambargoyan cayo ke tîyatroyê Kurdî ameyo xeylê muhîm o. Karê kaybazanê Kurd kaybazanê bînan ra zehmetin o. Ez vana ke ganî ma bê tîyatro nêmanî. Ma timî têkilî mîyan de bî."