RIHA - Keyeyê Şenyaşarî roja 695ine de pêwa hewaya serdî zî Nobeda xo ya Edaletî dewam keno. Emîne Şenyaşare dîyar kerd ke 5 serrî yo lajê ci zîndan de yo û vat: “Êdî bes o wa no zulm biqedîyo û wa lajê mi vera bidê ez şêrî keyeyê xo.”

 

Çalakîya Nobeta Edaletî ya keyeyê Şenyaşarî ke 9ê Adara 2021ine de verê Edlîyeyê Rihayî de daya destpêkerdiş, roja 695ine de dewam kena. Emîne Şenyaşar û lajê ci Ferît Şenyaşar sey her roje qezaya Pirsûsî ra ameyî verê Edlîyeyê Rihayî û pêwa hewaya serdine zî çalakîya xo dewam kerdî.

 

Emîne Şenyaşar çalakî de qisey kerd û vat, seba edalet bi ca bêro 2 serrî yo çalakî dewam kena û wina vat: “Pêwa ke serdo zî ma nêeşkenê keyeyê xo de ronişê û ma mecbûrî yenê tîya û ronişenê. 5 serrî yo lajê mi qawîşêk yew kesî de yeno tepiştiş. Wa lajê mi vera bidê ke ma şêrê keyeyê xo. Heme kesî bi nê zilmu zanê. Erdogan do senîn bêro Riha. Wîjdanê înan çin o. tutanê mi kiştî, keyeyê mi parçe kerdî. Bi zulmêk pîl tutê mi kiştî. Wa ma zî bifikrî yê. Nêweşxane de merdimî nînê kiştiş. Edî bes o wa no zulm biqede û lajê mi vera bidê.”