WAN - Bi wesîleya 24ine serrgêra komploya mîyanneteweyî yê hemverê Rayberê PKKyî Abdullah Ocalanî 6ê Sibate de di milî de ver bi Zîndanê Tîpê Fyê asayîşê Berzî yê Îmraliyî de rayîrraşîyayîşêk pê bêro. Vernîya rayîr ra şîyayîşî Cinîyê Wanî ke taxan de xebatan kenê, dîyar kerdî ke amancê înan azadîya Abdullah Ocalanî ya.

 

Bi rayberîya Kongreya Komeleya Demokratîke (KCD), Partîya Herêma Demokratîk (DBP) Partîya Demokratîke ya Şaran (HDP), MED TUHAD-FED û MEBYA DERî hemverê komployê mîyanneteweyî do bi sloganê, “seba çarserî ma şinê Îmraliyî" rayîr ra şîyayîşêk organîze bikerê. Rayîr ra şîyayîş 6ê Sibate de qezaya Qoserî ya Mêrdîn û Geverê Colemêrgî ver bi Gemlîkî dest pêbikero. Vernîya rayîr ra şîyayîşî cinîyê ke Wan de xebatan kenê, venga pêro şarê Serhedî kerdî ke tewrê rayîr ra şîyayîşî bibê.

 

‘Ganî peynîya nê bêvengîye bêro’

 

Hemsereka Komeleya Paştdayîşê bi Keyeyê Tepişteyan reyde (TUHAY-DER) Edîbe Babur derheqê amancê rayîr ra şîyayîşî de qisey kerd û wina vat: “Xeylêk bajarê Tirkîya de zî do rayîr ra şîyayîşî bêrê kerdiş. Amancê rayîr ra şîyayîşî oyo ke ma vengê xo biresnê Îmraliyî. No rayîr ra şîyayîş hemverê zulm û tecrîdê Îmraliyî yo. Çi beno wa bibo do no rayîr ra şîyayîş pê bêro. Ma êdî azadîya Ocalanî wazenê. Şarê kurdî nê zulmî  qebûl nêkeno.”

 

Edîbeye wina dewam kerd: “Di serrî yo tecrîdê giran serê Birêz Abdullah Ocalanî de esto. Agahî ci ra nîna girewtiş. Ma na babete de biqesawet ê. Ganî agahîyêk Îmraliyî ra bêro girewtiş. Na saete ra dima kes nêeşkeno bêveng bimano. Bêvengîya Îmraliyî tesîrê xo serê cuya şarî de kerdo. Yewin venga mi seba şarê Wanî oyo ke tewrê rayîr ra şîyayîşî bibê û têkoşîn de ca bigîrê.”

 

‘Pêvînayîş heqê sereyîn o’

 

Hemsereka DBPyî Şengul Polat zî reaksîyon nîşanê tecrîdî da û dîyar kerd ke pêvînayîşê Îmraliyî bi keye û avûkatan reyde heqo tewr sereyîn o û vat: “La çi heyf  Birêz Abdullah Ocalan nê heqî ra feyde nêgîno. Derheqê tecrîdî de xeylêk çalakî pê yenê û Anqarî de nika nobeta parlamenteran esta. La tecrîd hema dewam keno. heye. Abdullah Ocalan û tepişteyê bînan ra agahî nîna girewtiş. Ez seba rayîr ra şîyayîşê 6ê Sibate veng kena. Xeylêk bajarê Tirkîya de do rayîr ra şîyayîş dest pêbikero. Ma do Wan ra bikewê rayîr. Ma wazenê ganî tecrîd peynî bibo û her kes tewrê rayîr ra şîyayîşî bibo.”

 

Îdarekara Komeleya Paştdayîşê bi Kesê Merdimê Xo Dergûşê Şaristanî yê Mezopotamyayî de Vînî Kerdê (MEYA-DER) Ceyda Dîndar zî dîyar kerd ke amancê rayîr ra şîyayîşî oyo ke tecrîd bêro peynîkerdiş û wiina vat: “Hemverê tecrîdî yê bêmerdimayî yê serê Birêz Abdullah Ocalanî de ganî game bêrê eştiş. Demêk derg o  agahî Îmraliyî ra nîna girewtiş. Ma cinî zî tecrîd kûr ra hîs kenê. Wa tecrîdê serê Birêz Ocalanî ra ganî bêro wedaritiş. Ma wareyan de seba nê têkoşîn kenê.”

 

Hemsereka HDPyî ya Wanî Handan Karakoyun zî seba rayr ra şîyayîşê 6ê Sibate veng kerd û nê çî vat: “Tecrîdo giran sewîyeya ke nêeşkeno bêro qebûlkerdiş. Ma tabloyê welatî vînenê û sebebê nê tecrîdî yo. Ganî seba nê pêvînayîş bêro kerdiş. Seba nê ganî  pêro kesî tewrê rayîr ra şîyayîşî bibê.”