Sema Çağlak-Medya Uren

 

ŞIRNEX - Cinîyê sîyasetmedarî bale antî serê weçînayîşî û dîyar kerdî ke HDP sîyasetê xo serê rayîrê hîrêne de keno û vatî: "HDP seba pêro şaran bawerî û umudêke yo û seba temsîlîyetê pêro şaran sîyasetê demokratîkî esas gêno."

 

Bi nêzdîbîyayîşê prosesê weçînayîşî, tevgerê partîyê sîyasî zî dest pêkeno. Pêwa rojeva weçînayîşî, rojevê şer, kaos û aloziyê ke Tirkîya de derbaz benê, her ke şino xorîn beno. Sewbîna hedefgirewtişê Partîya Demokratîke ya Şaran (HDP) zî bi nê rojevan girêdaye vejêno vernî. HDP bi hêriş û astengîyan rî bi rî maneno. Derheqê babete de cinîyê sîyasetmedarî fikrê xo pare kerdî û dîyar kerdî ke HDP seba xeylêk probleman rayîrê çareserî aver bena.

 

‘Sebebê kaos û alozîyan nênaskerdişê nasnameyê kurdî yo'

 

Hemşaredara Sêrtî ya ke vera ci qeyûm ameyo tayînkerdiş Bêrîvan Helen Işik, dîyar kerd ke sebebê kaos û alozîyê ke Tirkîya de yenê ciwîyayîş nênaskerdişê nasnameyê kurdî yo û vat: "Nika rewşa Kurdistan û Tirkîya bi kaos û alozîya xo verê çiman de ya. Hetê diplomasî de zî yeno asayîş ke xetimnayîşêk esto. Sebebê nê krîzan û aloziyan zî nênaskerdişê nasnameyê kurdî yo. Bi na polîtîkaya înkarkerdiş û çinhesibnayîşê şarê kurdî her hetî ra wazena rayra bera. Labelê nê polîtîkayê înkarkerdişî û çinhesibnayîşî benê sebebê vinîkerdişê nê îqtîdarî. 40 serrî ra zêdeyêr na poltîka yena kerdiş û her ke şino gonî yena vînîkerdiş. Nînan dir girêdaye hemverê deskewtişê kurdan hêrişêko topyekun esto. Weçînotoxê ma zîndanan de yê û yeno waştiş ke şarê kurdî sîyasetê kurdî ra bêpar bêro verdayîş. La HDP her wext pêwa nê hêrişan zî têkoşînê xo yê seba sîyasetê kurdî û polîtîkayê ke kerdibi vernîya xo tewr xurt keno."

 

‘Rayîro hîrên temsîlîyetê pêro şaran o'

 

Bêrîvane, tewr peyîn bale ant serê masaya 6ine û vat: "Sîyasetê masaya 6ine verê çiman de yo. Masaya 6ine nasnameyê kurdî nas nêkena. Nê welatî de muxalifiyo tewr pîl û somut HDP keno. Polîtîka û sîyasetê HDPyî zî rayîrê hîrêno ke  temsîlîyetê pêro şaran keno. Xêrcê HDPyî partîyêka heqîqet bîyaro ziwan çin a. Xerîteya rayîrî ma ya HDPyî dîyar a û ma do bi nê polîtîkayan xebatanê xo bikerê."

 

‘Esasê masaya 6ine çin o' 

 

Hemsereka HDPyî ya Bajarê Mêrdînî Fîgen Altindage, dîyar kerd ke pêwa prosesê weçînayîşî kaos û alozî zî zêde benê. HDP pêwa xeylêk hêriş û astengîyan xebatanê xo keno. La rexmê nê pêroyîyan zî xebatanê xo bi israr keno. Masaya 6ine yan zî sernameyê taslakê xebatê xo eşkera kerdî la nê taslakî de cayê cinîyan çin o. No zî mojneno ke na masa esasê ci çin o û pabebîyayîşê ma înan ra çin o. Polîtîkaya ma rayîrê hîrêne de xebatanê xo kena. Bi nê ma sîyasetê demokratîkî de bi israr ê û na gore gamanê xo erzenê."

 

‘Çareserî sîyasetê demokratîkî ra derbaz beno'

 

Fîgene, dîyar kerd ke çareserîya demokratîke xelasîya şarî ya kaos û alozîyan a. Fîgene wina vat: "Îqtîdar krîz û aloziyêk xorîn de yo û nê krîzî şarî zî xo reyde beno. Tena krîzê ekonomî ney, sîyasî û komelî xeylêk tesîrê negatîf şarî rê keno. Çareserîya demokratîke rayîrê xelasbîyayîşê nê krîzî ya. Seba nê ganî hem cinî, ciwanî û heme şar bi têkoşînêk yewgirewte hemverê nê  krîzî xebatanê xo bikerê. Ma bawer ê ke ma do pîya serbikewê."

 

‘Bawerîya şarî bi HDPyî esta'

 

Tewr peyîn zî Endama Heyetê Îdarekarîya Xocayî Oznur Evîn qisey kerd ke serê HDPyî de sîyasetêkê terorîzekerdişî yeno rayraberdiş û vat: "Na çarçewa de embazê ma yenê destbendkerdiş û yenê tepiştiş. Nê pêro konseptê ke dimayê weçînayîşê 7ê Hezîrane de pê ardî. La ma pêwa pêro çî xebata xo dewam kenê. HDP xîtabê şarî keno û seba çareserkerdişê probleman xeylêk pêşnîyaz û polîtîkayan aver beno. Sey nimûne; sey netew, dîn û ziwanan polîtîkayêke hempar rayra beno. Coka beno hedef. Mîyanê komelî de toxumê tersî çînenê. Teqîyayîşê Stenbolî zî nê nimûneyan ra bi. Her wext vernîya prosesê weçînayîşî  rojevê şer û polîtîkayê hedefgirewtişî pê anê û hêriş kenê. Nê hêriş û polîtîkayê xo zî serê HDPyî de rayra beno. Bi hedefgirewtişê HDPyî wazenê şarê  Kurdî hedef bigîrê. Ma sîyasetêkê demokratîk wazenê bi Tirkîya reyde bidê qezenckerdiş. Ma wazenê şar bi cuyêka têduşt û azad biciwîyo û ma helwestêk wina rayra benê. Bawerîya şarî bi HDPyî esta."