COLEMÊRG - Hemsereka OHDyî ya Colemêrgî avûkate Cevahîr Agrali derheqê qedexeyê çalakî û bernameyê Colemêrg û qezayanê ci ke serê HDPyî de bêmabên dewam kenê, qisey kerde û vat: "Seba binpaykerdişî nêrê ciwîyayîş, hetê huqûqî de çi destê ma ra yeno ma kenê û ma taqîbkerdoxê prosesê huqûqî yê."

 

Colemêrg û qezayê ci 13yê adara 2016ine ra heta nika 15 rojan derheqê bi qerraê walîyî bername û çalakî yenê qedexekerdiş. Colemêrg û qezayanê ci de çalakî û bernameyê HDPyî bi qerarê Walîyî yeno astengkerdiş la seba bernameyê AKPyî destûr yeno dayîş. Tewr peyîn rayîr ra şîyayîşê  bi sloganê, "Şer û îşxalkerdişî rê nê" bi rayberîya Kongreya Komeleya Demokratîke (KCD), Partîya Herêmê Demokratîke (DBP) û Partîya Demokratike ya Şaran (HDP) do bi ca biameyîne, hetê Walîyê Colemêrgî ra ame qedexekerdiş.

 

Hemsereka Komeleya Huqûqnasê seba Azadîye (OHD) ya Colemêrgî avûkate Cevahîr Agrali derheqê babete de qisey kerd û vat, derheqê qedexekerdişî yê çalakî û bernameyanê 2016ine ra heta nika dewam kenê de prosesê huqûqî dayê destpêkerdiş.

 

‘Qedexe bêmabên dewam kenê'

 

Cevahîre dîyar kerd ke Colemêrg û qezayanê ci de serra 2016ine ra heta nika çalakî, rayîr ra şîyayîş û protestoyê bi qerarê walî û qeymeqamî yenê qedexekerdiş û bahaneyê qedexeyan sepernenê hîn maddeyê qanûnê îdarî yê xususî yê merkezî û qanûnî. Cevahîre wina dewam kerd: "Goreyê nê maddeyan, sîstemê îstîmlakî, pawitişê azadî û heqê kesan yan zî pawitişê weşîya ehlaqî bahane yeno mojnayîş. Seba nê zî her ware, park û kuçeyî pêroyî bajarî yenê qedexekerdiş. No sey 15 rojî dewam keno. Bêmabên 2016ine ra heta nika nê qedexeyî dewam kenê."

 

‘25ê Teşrîna Peyêne de cinîyan rê şîdet kerdî'

 

Cevahîre dewam de wina vat: "Çalakîyan de polîsî şîdet û teda îdarekaranê HDPyî rê keno. Parlamenter, îdarekar û rojnamegeran rê hêzê bêsînor yeno şuxulnayîş. 25ê Teşrîna Peyêne de cinîyan waşt rayîr ra şîyayayîş bikerê. Dimayê rayîr ra şîyayîşî verê bînaya HDPyî de eşkerayîye bidê. La polîsan asteng kerd. Şîdet bi cinîyan kerdî û bi zor kerdî awanîya HDPyî. 25ê Teşrîna Peyêne de cinîyan şîdet kerdî, çîyêk ecêb o. 27ê Teşrîna Peyêne de zî rayîr ra şîyayîşê hemverê şerî û operasyonan ame astengkerdiş. Rojêke vernîya rayîr ra şîyayîşî 36 saetan qedexeyê dekewtiş û vejîyayîşê qeza û rayîr ra şîyayîşî ame îlankerdiş."

 

‘Rayîr ra şîyayîşê HDPyî yeno astengkerdiş'

 

Cevahîre dîyar kerd ke nê qedexeyî bêmabên Colemêrg û qezayê ci de bi ca yenê, benê sebebê binpaykerdişê heqan û 2016ine ra heta nika seranserê Colemêrgî de heqê welatijan yeno binpaykerdiş. Cevahîre wina erjna: "Maddeyê 13,26 û 34ine heqê merdiman qal keno. Ma ewnîyenê welatijî nêeşkenê xo biresnê heqê xo, seba ke Walîtî 15 rojan reyke asteng keno. Goreyê qanûnê îdareyê merkezî, goreyê qanûnê rayîr ra şîyayîş û kombîyayîşan, çalakîyê ke qeymeqamtî û walîtî tesdîq keno, hewêneno. Çalakîyê ke Walîtî û qeymeqamtî tesdîq nêkenê, çi heyf bi ca nînê. Bi taybetî rayîr ra şîyayîş  û çalakîyê ke HDPyî wazenê bikerê, yenê astengkerdiş."

 

‘Ma do taqîbkerdoxê prosesî bibê'

 

Cevahîre tewr peyîn wina vat: “Nê binpaykerdişê heqan bi destê dewlete bi ca yenê. 6 serrî yo bêmabên nê qedexeyî dewam kenê. No hemverê desturê bingehîn o. OHDyî Colemêrgî de derheqê qedexeyê peyîn yê 27ê Teşrîna Peyêne de 36 saetan dewam kerd de îdare rê dewa akerd. Verê zî ma hemverê qedexeyan dewa akerdibi. Yê dewam kenê estê. La hema netîceyêk nêameyo girewtiş. Ma hemverê binpaykerdişî de têkoşînê huqûqî danê. Ma do taqîbkerdoxê prosesê huqûqî bibê."