COLEMÊRG - Tepişte Tahîr Gurdalo ke zîndan pê nêweşîya rîşamerdimwere kewt û badê 19 rojî nêweşxane de pê kelemçeyan ame dermankerdiş, dinyaya xo bedilnaye. Tepişteyo nêweş Gurdalî ke ame qetil kerdiş ame definkerdiş.

 

Tepişte Tahîr Gurdal (53) zîndan pê nêweşîya kanserî kewt û 19 rojî Nêweşxaneyê Perwerde û Cigêrayîşî yê Gazî Yaşargîlî de pê kelemçeyan ame tepiştene. Gurdalo ke cezaya ci ameye peydeeştene, 13 rojî dima dinyaya xo bedilnaye.

 

Tepişte Tahîr Gurdal rixmê nêweşîya xo ya girane 10 serrî yo Zîndanê Tîpê Fyî yê Wanî de ameyêne tepiştene û dima ra semedê tedawîyî sewqê Zîndanê Amedî bi. Tahîr ke bi rojan pê kelemçeyan nêweşxane de mend, 28ê teşrîna peyêne de cezaya ci ameye peydeeştene û ame veradayene. Cenazeya Tahîr Gurdalî ke vizêr şewe wecîbeyê ci yê olî ameyî caardiş ver bi qezaya Geverî ya Colemêrgî ra kewt rayîr. Cenazeya Tahîr Gurdalî saetanê serê sibayî de herêma ‘Pira Kerem Axayî’ ya qezaya Geverî de ameye pêşwazîkerdiş. Cenazeya Tahîrî bi konvoyo ke desan wesayîtan rap ê ameyêne, seba definkerdişî ver bi goristanê Raşteyê Ormanî ra kewte rayîr.

 

Cenazeya Tahîr Gurdalî sere de berzî keyeyê ci, dima ra bi tewrbîyayîşê seyan kesan bi hawayêk girseyî goristanê Raşteyê Ormanî de bi duayan ame definkerdiş. Şînê Tahîrî do Camîyê Hz. Hamza yê Raşteyê Gungorenî de bêro ronayîş.