ÎZMÎR - Merdimê tepişteyanê nêweşan û yê ke înfazê înan ameyo betalkerdiş yê Îzmîrî çalakîya Nobeta Edaletî de seba tepişteyan waştişê azadîye kerdî û reaksîyon vera binpaykerdişê zîndanan mojnayî. Merdimê tepişteyan vatî: “Ma wayîrê tutanê xo vejîyê.”

 

Keyeyê tepişteyanê Îzmîrî seba veradayîşê tepişetyanê nêweşan û yê ke înfazê înan ameyo veşnayîş û wedaritişê caardişê tecrîdî yê zîndanan, dest bi Nobeta Edaletî kerdibî. Çalakîya keyeyan roja 148ine de vernîya Baroyê Îzmîrî de dewam kerd. Çalakî de keyeyan pêşmalê “Veng bidê zîndanan” û “Seba tepiştişê nêweşan azadî” dabî xo ra û sloganê “Jin, jiyan, azadî”, “Şerî rê nê, aştî lezabez” û “Biciwîyo xoverdayîşê zîndanan” berz kerdî. Endam û îdarekarê rêxistinê Partîya Demokratîke ya Şaran (HDP) yê qezaya Çeşme û Çîgliyî zî paştdayîş dayî keyeyan.

 

Çalakî de dayîka Denîz Poyraz ke Rêxistina HDPyî yê Îzmîrî de amebî qetilkerdiş, Fehîme Poyraz qisey kerd û vat: “Ma do no zulm heta key dewam bikero? Êdî bes o. Paweyê ke tepişteyê nêweşî bimirê yan zî demêk tay nêzdîyê mergî înan de vera bidê. Ma nê qebûl nêkenê. Wexto ke tutê ma ameyî tepiştiş, weşîya înan baş bî. La pêro zîndan de nêweş kewtî û mirenê.  Ma nêwazenê cenazeyê tutanê xo bivînê. Mîyanê çar dêsan de îşkence tutanê ma rê kenê. Ma wayîrê tutanê xo vejîyê. Ganî tutê ma demêkê lezgîn de bêrê veradayîş.”