Gulistan Dursun

 

STENBOL - Temsîlkarê rêxistinê cinîyan reaksîyon mojnayî hêrişanê Tirkîya ke hemverê Rojawanî de daya destpêkerdiş û vatî: “Wezîfeyê ma no yo, ma rihê şer îfşa bikerê, kişta têkoşînê azadîye yê Şarê Kurdî de ca bigîrê û pîya têkoşîn bidê.”

 

Tirkîya 19ê Teşrîna Peyêne de hemverê Bakur û Rojhelatê Sûrîye û Kobanê de hêriş da dest pêkerdiş û hêrişanê xo bê maben domnena. Hêrişê ke bi teyareyê şer û obusan virazîyayî de xeylê cayî ameyî bombardumankerdiş, bi desan kesî ameyî qetilkerdiş. Hemverê hêrişan Kurdistan ra heta Ewropa Tirkîya ra heta Rojhelato Mîyanenî her ca de şar vejîya raşteyan û çalakîyê protestokerdişî pê ardî. Reyna pawitoxê heqê merdiman, dezgehê mîyanneteweyî, sîyasetmedar û huqûqnasî reaksîyonanê xo ardî ziwan ser û vengê peynîardişê hêrişan dayî.

 

Temsîlkarê rêxistinê cinîyan derheqê hêrişan de ajansê ma rê qisey kerdî.

 

Bi polîtîkayê şerî wazenê îqtîdarîya xo daîmî bikerê

 

Hemverfeka Platformê Paştîdayîşê Sosyalîstî (SODAP) Kezban Konukçu hêrişê bombayî yê Taksîmî sey polîtîkaya destpêkerdişê şerî ercnaye û wina vat: “Badê teqayîşê Taksîmî hemverê Rojawan û hemverê kurdan de hêriş dayî dest pêkerdiş. Na rewşe mojnena ke ma kewtî prosesêk newe yê weçînayîşî. Îqtîdarê AKP-MHPyî seba faşîzmê xo xurt bikero bi vatişanê netewperest û polîtîkayê şerî bîyayîşê xo paweno. Hewl dano netewperestîye gur bikero. Bi no hawa HDP û tîfaqê Ked û Azadîye vila keno û krîmînalîze keno. Ganî ma hemverê înan de dikat bikerê. Bi polîtîkayê şerî hewl dano vernîya têkoşînê kedkar, şaranê bindestan, şarê Kurd û kedkaran yê Tirkîya bigêro.”

 

Do têkoşînê yewbîyaye faşîzm çin bikero

 

Kezbane dewamê qiseykerdişê xo de vat ke Kobanê nêkewto coka ra hêrsê îqtîdarî gird bîyo û hemverê hêrina de vengê yewîye kerd û wina dewam kerd: “Goreyê xo hêrişê ma kenê. La ganî ma wayîrê hişmendîye bibê. Heta dînamîkê têkoşînê bajarê Rojawan û Şarê Kurdî nêrê tê het faşîzm çin nêbeno. Ganî ma na yewîye raşteyan de awan bikerê. Bi yewîye aye wextî yê raşteyan Kobanê bêkewt. Hema zî dejê aye cuyenê. Çike herême de goreyê zerrîya xo tênêgêrayî. Ganî ma na hişmendîye gore têbigêrê.”

 

‘Ganî ma têkoşînî bimunê’

 

Kezbane qiseykerdişê xo yê peyênan de da zanayîş ke yew nuqtaya ke faşîzmî dana zorî Têgêrayîşê Azadîya Kurdî yo û wina vat: “Eke ma maben bikerê mabenê xo û Têgêrayîşê Azadîya Kurdî bi raştî ma do ser nêkewê. Têgêrayîşê Azadîya Kurdî xoverdayîşêk gird dano raşte. Coka ra zî Têgêrayîşê Azadîya Kurdî seba înan tehluke yo. Coka ra ganî ma xurt bivinderê, ma zemînê yewîye bipawê û aver bibê. Ganî ma kişta têkoşînê azadîya Şarê Kurdî de vinderê. Ganî ma hemverê hêrişanê hemverê Rojawanî de têkoşînê yewîye rayra berê.”

 

‘Ma do heta peynî hemverê şerî de vinderê’

 

Endama Cinî Pîya bi Hêz î (KBG) Erîde Eralpe dîyar kerd ke şerê ke Rojawanî de yeno cuyayîş beno sebebê problemanê girdan û ma prosesê 2014-2015î de cuyayî û wina vat: “Şerê hemverê DAIŞî ser nêkewt. Bi hêrişê Raşteyê Îstîklalî dest bi hêrişî kerdî. Hema raştî nêvejîyabî raşte zemînê şerêk winasî ame hadrekerdiş. Ma no keyî verê cû zî dîbî û cuyabî. Yê ke hewl danî ma bi nêkayan bawer bikî wa bizanê. Ma bawer nêkenê.”

 

‘Ma do vengê xo her ca de berz bikerê’

 

Paştîdayîşê Cinîyan ya Kirkyamaye ra Tulay Korkutane ard ziwan ke pêro hêrişan seba pelçiqnayîşî pê ardî û wina ercnayîş kerd: “Şer seba cinîyan feqîrî yo, destdergê yo û şîdet o. Ganî ma her ca de vengê xo berz bikerê. Ma do hemverê nê caardişan de têkoşînê xo berz bikerê û aştîye de israr bikerê.” 

 

Aktîvîsta Cinîyan ya Yenî Demokratîke Sînem Ozkane zî reaksîyon mojnaye hêrişan û da zanayîş ke hemverê polîtîkaya şerî de ganî têkoşîn dewam bikero û ê wazenê aştîya cinîyê ke têkoşîn danî bipawê.