STENBOL - Avûkata Şadiye Manape, Elîf Taşdogene, dîyar kerd ke tepiştişê Şadîye yeno manaya xespkerdişê "Heqê Hêvîye” û vat: "Bi tepiştişê Şadîyeye hem keye û hem zî Şadîye yena cezakerdiş. Do derheqê tepiştişî de îtîraz bikerê.”

 

Şadîye Manape ke serra 1992ine de Riha de ameye destbendkerdiş û Dadgeha Asayîşê yê Dewlete (DGM) ya Amedî ameye muhakamekerdiş, cezaya muebbetî ci rê ameye birnayîş. Şadîye ke demê amebî tepiştiş 24 serrî bî, goreyê rêza zîndanan Riha, Mîdyat û tewr peyîn zî Zîndanê Cinîyan ê Gebzeyî de ameye tepiştiş. Demê zîndanî de xeylêk rey ameye îşkencekerdiş û dimayê 30 serran 1ê kanûne de ameye veradayîş. Roja ke ameye veradayîş, ameye destbendkerdiş û 4 rojan destbendkerde mende.

Şadîye vizêr ardî Edliyeyê Kocaeliyî, dimayê ke dozgerî karûbarê ci yê îfadeyî qedîya bi waştişê tepiştişî sewqê Dadgerîya Cezaya Sulhî ameye kerdiş. Tîya de zî dadgehe qerarê tepiştişî aye da. Şadîye Zîndanê Girewte yê Tîpê Fyê Kandirayî.  

 

Endama Komeleya Huqûqnasê Seba Azadîye (OHD) û avûkate Şadîye Elîf Taşdogen derheqê babete de qisey kerd. Elîf, dîyar kerd ke derheqê xeylêk kesan de cipersayîş ameyo akerdiş û vat: "Roja ke ameye veradayîş bahane mojnayîşê nuşte û destbendkerdişê aye huqûqî nîyo. Muvekîlê ma derheqê cipersayîşê 2020ine de temmuza 2021ine de îfade dabi dozgerî. Dosyaya serra 2020yî ya labelê dimayê 2 serrî dima, roja ke ameye tehliyekerdiş nimûneyê nuşteyî yeno waştiş. No çî huqûqî nîyo û helwestêk negatîfî yo.”

 

Avûkat Elîfe da zanyîş ke hemverê Şahidîyê ‘huqûqêk taybet’ ame rayraberdiş û wina ercnayîşanê xo ard ziwan ser: “Mehkemay Heqanê Merdiman ya Ewropa (DMME) derheqê ‘heqê umudî’ yê Ocalan û tepişteyanê bînan yê Tirkîya de ercnayîşan kerdkbî. Sewbîna vatbî ke xeylê tepişteyê ke ganî biameyêne verdayîş heta nika nêameyî verdayîş. No caaardiş îşkence yo. Merdim eşkeno şexsê Şadîye Manape de wina babete bierno, bado ke 30 serrî ra dima Şadîye serbest ameye veradayîş û hema bere zîndanî ra nêvejşyabî reyna ameye destbendkerdiş û tepiştiş. Serbestvedayîşê aye bi kilifêk huqûq ameye astengkerdiş. No çî yeno manaya xespkerdişê ‘heqê umudî’. Bi no hawa Pêkerdişê Heqê Merdiman ya Ewropa (PMME) ya qedexeyê îşkenceyê ame binpaykerdiş.” 

 

Elîfe da zanyîş ke derheqê tepiştişê Şadîyeye de do îtîraz bikerî û wina qiseykerdişê xo qedêna: “No prosesî de tena Şadîye nê keye û heskerdoxê aye zî ameyî mexdurkerdiş. Tepiştişê Şadîyeye yeno manaya cezakerdişê aye û keyeyê aye.”