Sema Çaglak- Medya Uren

 

ŞIRNEX - Sîyasetmedarê weçînotoxî yê HDPyî ke beşdarê Kombîyayîşê Demkî yê Îdarekarîyê herêmî yê HDPyî bî, bale antî serê hêrîşê qeyûman hemverê destkewtişê cinîyan û vatî, "Sîstemê hemserekî xeta ma ya mor a. Ma reyna bêrê weçînayîş, ma do xebatanê xo cayê mende dewam bikerê û tewr zêde bikerê."

 

Heyetê Îdarekarîyê Herêmî yê Partîya Demokratîke ya Şaran (HDP) mabêne 3-4ê Kanûne de qezaya Silopî ya Şirnexî de kombîyayîşê xo yê demkî yê serrêke viraşt. Roja yewin ê kombîyayîşî de îdarekarîyê herêmî yê demokratîk de babeta cinî de ame munaqeşekerdiş û roja diyîn de zî bi pêroyî yê serê xeylêk babetan de munaqeşe ame kerdiş.

 

Cinîyê siyasetmedarî ke tewrê kombîyayîşî bî, ajansê ma rê fikrê xo dîyar kerdî.

 

‘Hêzê cinîyanê têkoşeran ra tersenê’

 

Vervatoxa Meclîsê HDPyî ya Şaredarîya Bajarê Girdî ya Mersînî Bedrîye Kuş, destpêk de vat, kombîyayîş de xeylêk munaqeşeyê hîra kerdê û vat: “Hetê îqtîdarî ra hemverê cinî de polîtîkayêke qirkerdişî yena kerdiş. Labelê pêwa nê çîyan cinî hemverê nê polîtîkayanê qirkerdişî xo ver danê û têkoşînê xo tewr gird kenê. Îqtîdaro ke tehamûlê ci cinîyê ke vejênê teber çin o, tewr peyîn hemverê cinîyê têkoşer qirkerdişêk sîyasî da destpêkerdiş. Bi nê çî derheqê 50 cinîyan de qerarê destbendkerdişî ame dayîş û bi desan cinî ameyî destbendkerdiş û tepiştiş. No zî nîşaneyê tersê îqtîdarî yê hêzê cinîyan o. Ma reyke bîn vanê ke bi destbendkerdiş û polîtîkayê pelçiqnayîşî nêeşkenê zorê têkoşînê ma berê.”

 

‘Îdiaya ma gird a’

 

Bedrîye, bale ant  serê polîtîkayê qeyûm û wina vat: “Ma sey HDPyî îdîayê ma yê girdî estê. Vernîya tayînkerdişê qeyûman xeylêk xebat û projeyê ma estbî. La serra 2019ine de bi tayînkerdişê qeyûman ê serê şaredarîyan ra heme nê plan û projeyî ameyî çinkerdiş. Bi taybetî zî serê plan û projeyê seba cinîyan talankerdişêkê gird pê ardî. Sebebê tayînkerdişê qeyûman tersê hêzê cinîyan bi. Bi nê çî xeylê şaredarîyanê ma rê qeyûm ame tayînkerdiş. Xeylê weçînotoxê ma hedef ameyî girewtiş û serê karê xo ra ameyî dûrvistiş. La îdiayêke ma ya pîl esta. Ma her rey vanê hemserekî xeta ma ya mor a. Ma do sîstemê hemserekî tewr xurt bikerê û bi têkoşînêkê xurt rayîrê xo dewam bikerê û seba şarê xo bişuxilîyê.”  

 

Bedrîye, qiseykerdişê xo wina qedêna: “Polîtîkayê ma yê HDPyî çarçewaya averşîyayîşê temsîlîyetê têduştî û sîstemê hemserekî de yê. Partiyanê sîyasî de temsîlkarîya cinî xeylêk kêm a. Tena HDPyî de temsîlkarîya cinîyan sewîyeya tewr corî de ya. Îqtîdar gama ke bikewo alozî, qeyran û kaosan rayra beno. La êdî şar aya bîyo. Gama weçînayîş ame do şar serê sindoqan de hesap biperso.”

 

‘Şaredarîyê HDPyî tim hedef de bî’

 

Hemverfeka Meclîsê Şaredarîya HDPyî ya Akdenîzî Nuran Arslane zî ard ziwan ke şaredarîyê HDPyî hertim hedef de bî û wina vat: “Rayîrberîya herême de nexşerayîrêk bîyaye esta. Qaseyo ke deste ma ra yeno, şaredarîyê ke deste ma de yê hewl danê ke nê polîtîkayanê xo rayra berê. La çi heyfo ke şaredarî deste ma de nîyê û reyna zî ma hewl danê ke xebatê xo na çarçewa de rayra berê. Taybetî zî hetê cinîyan de ma xebat û polîtîkayanê xo rayra benê la her reye ma yenê astengkerdiş.”

 

‘Polîtîkayê HDPyî îqtîdarî tersnenê’

 

Polîtîkaya HDPyî ya tena seba şarêk nê seba pêro komelî ya. Coka ra xebatê ma yê seba pêroyê komelî înan tersneno. HDP xebatê xo binê sîwanê têduştî, zafnijadî, zaf kulturî, zaf bawerî û zaf rengîye de rayra beno. Coka ra îqtîdaro ke polîtîkaya xo ya yew netew, yew ziwan û yek kulturî şarî ser de dano ferzkerdiş, xebat û çalakîyanê HDPyî ra terseno. Çike îqtîdar polîtîkaya dabeşkerî rayra beno. Nika çend şaredarî deste ma de estê ke xebatê xo yê zafaneyan seba cinîyan rayra benê. No zî seba şarî kêfweşî û serfirazî yo. La bêşik ma mird nêkenê û ganî hîna zêde xebatanê ferzan bikerê. Ganî ma têkilîya xo komelî reyde hîna xurt bikerê. Wexto ke ma bêrê weçînayîş ma do şarî nê rejîmî ra bixelisnê.

 

‘Mudirîyeta cinîyan de camêrdan bi ca kerdî’

 

Tewr peynî Hemverfeka Meclîsê Şaredarîya Dêrsimî Makbule Tulga qisey kerd û aye zî wina vat: “Qeyûm bi tabetî serê destkewtişanê cinîyan de vindeno. Bi dest pêkerdişê tayînkerdişê qeyûman reyde qirkerdişê sîyasî û nizdîbîyayîşê faşîzanî pê ameyî. Kerdî ke şarî zî bi çimanê xo dî. Prosesê ma yê HDPyî de xeylê proje û xebatê ke ma pê ardbî estbî. Sey şêwirmendîya cinî, mudirîyeta cinî û dezgehê cinî estbî. La bi ameyîşê qeyûmî reyde ameyî wedarnayîş. Mudirîyeta cinîyan de camêrdan bi ca kerdî. La ma senî ke yewna rey dest bi xebatanê xo bikerî ma do talankerdişî peynî bikerî û xebatê xo yê seba cinîyan dewam bikerê.”

 

‘Hemserekî xeta ma ya morî ya’ 

 

Makbule qiseykerdişê xo yê peyênan de dîyar kerd ke ê do tima destkewtişê cinîyan bipawê û têkoşînê xo yê seba rayîrberîya herême girdêr bikerê. Makbule wina vat: “Sîstemê hemserekîye xeta ma ya morî ya. Dêrsim de hetê rayîrberîya herêmî de 2 endamê meclîsê şaredarîye estê. Ma xebatê xo bi no hawa dewam kenê. Herêma Dêrsimî de hem hetê cinî hem zî hetê xozaye ra pêkewtişêk gird esto. Dêrsim de xeylê polîtîkayî estê. Taybetî zî hetê koçberîye de Dêrsim xeylê xover dano. Vera hende çîyan reyna zî ma peynîya çareserî û têkoşînî de yê. Ma do pîya têkoşînê xo gird bikerê û rêxistin bikerê û nê sîstemo bîyaye çinî bikerê.”