RIHA - Emîne û lajê xo Ferît Şenyaşar ke çalakîya xo ya Nobeta Edaletî dewam keno ewro nê mesajî pare kerdî: “Têkoşînê ma yê heq ê rayîrê Hz. Îbrahîmî de dewam keno. Seba Nemrûdan Riha de ca çin o!”

 

Merdim û pawitoxê Parlamenterê AKPyî yê Rihayî Îbrahîm Halîl Yildiz, 14ê hezîrana serra 2018ine de hêrişê Keyeyê Şenyaşarî kerd û netîce de mêrde û 2 lajê dayika Emîne Şenyaşare ameyî qetilkerdiş. Emîne Şenyaşar û lajê xo Ferît Şenyaşar ke qirkerdiş ra bi birîndarî xelas bîbî, 9ê adara serra 2021ine de vernîya Edliyeyê Rihayî de dest bi çalakîya Nobeta Edaletî kerdibî. Çalakîya keyeyî roja 636ine de dewam kerd. Peynîya hewteyî de edliye padaye ya coka keyeyî nobeta xo Pirsûs de dewam kerd.

 

Keyeyî derheqê nobete de serê hesabê xo yê medyaya dîjîtale de nê mesajî pare kerd: “Ma, têkoşînê xo yê heqî yê rayîrê Hz. Îbrahîmî de yê, bajarê pêxembaran Riha ke Nemrûd adirê xo de xeniqna, dewam kenê. Ma edaletê şima no yo? Ma vîzyonê şima no yo? Seba Nemrûdan Riha de ca çin o.”