AMED - Cinîya bi nameyê Gulcan Marhan bi camêrdê nameyê Ahmet Marhan reyde prosesê destveradayîşî de ya û bi serran o Ahmet Marhan îşkence û şîdet ci rê kerdo. Gulcane wina vat: "Wa dewlete hemverê problemê cinîyan de hîsgêr bibo. Mêrdeyê mi vejîyo do mi bikişo. Eke ez bêrî kiştiş do xebera mi reyna weşan bikerê."

 

25ê Teşrîna Peyêne Roja Têkoşînê Hemverê Şîdetê Cinîyan de şikdar Ahmet Marhan hewl da cinîya bi nameyê Gulcan Marhan ke ci dir prosesê destveradayîşî de ya, qetil bikero. Gulcane bi giranî birîndar bî û şikdar cayê serebûtî ra rema. Şikdar dimayê destbendkerdişî ame tepiştiş.

 

Gulcane derheqê şîdet û îşkenceyê  sîstematîkî de ajansê ma rê qisey kerd.

 

Şîdetê sîstematîk

 

Gulcane dîyar kerd ke dimayê ke zewicyaya şîdet dest pêkerdo û vat: "Demê vernî de ber serê mi de mifte kerdêne. Seba nê mi nêeşkayîne gerre bikerî. 7 serran zewicnaye menda. Di aşmê ewil mi problem nêciwîya. Dima ra her tim şîdet kerd. Ez digane menda. O wext zî şîdet û îşkence ame kerdiş. Seba darbeyan gonî şî serê mezgê pitika mi. 40 rojan nêweşxane de mende. Ez keye ra remaya şîya ŞONÎM. Hewteyêkê uca de menda. Keye kewt mabêne. O wext es musaya ke reyna digane ya. Reyna şîdet bi mi kerd. Ez şîya bajarêkê bîn stargeh de menda. Reyna ameya keye. Seba şîdetî reyna şîya ŞONÎM. Pitika mi uca de ameye dinya. A pitika mi zî seba darbeyê girewtibî beşê giran de mende.”

 

‘Hepsê keyeyî estbi la dorê keyeyê mi de bi’

 

Gulcane wina dewam kerd: “Her tim tehdîdê kiştişî kerdêne. Raporê derbkerdişî heme verê mi de estbî. La pêwa tehdîd û raporan tu çîyêk nêvurya. Sebebê remayîşê min ê peynî no bi, deynê ey yê kumare estbî, waşt mi biroşo. Ez şîya keyeyêk bîn. Ame ê keyeyî de hêrişê mi kerd, hewl da desteştiş bikero. Mi gerre kerd. Hîrê rojî hepsê keyeyî dayî la her tim dorê keyeyê mi de gêrayîne.”

‘Bi saetan îşkence kerd’

 

Gulcane qala hedîseya ke roja 25ê Teşrîna Peyêne de qewimîya kerd û wina vat: “6 aşmî qerarê dûrîvistişî estbî. Mesaj şirawit û vat ‘ma do yewbînan bêrê ya nê’. Mi vat nê. Emnîyetî ra vengdayî mi. Saet 10an de keye ra vejîyaya. O zî kewt bî awanî. Senî ke mi ber akerd bi kardî hêrişê mi kerd. Zerre de mabenê 40 deqeyî de ez qîraya. Vengê mi nêşîye kesêk. Mi bi hawayêkê ber akerd. La ez derenceyan eşt war. Tewr peynî cîranê mi resayî mi û hetkarîya mi kerdî.”

 

‘Birayê ci yê polîs xeberan resanayêne ci’

 

Gulcane dîyar kerd ke aye wedarnayî nêweşxane û nê çîyan vat: “Di saaet badê qewimîyayîşî şikdar ame tepiştiş. Ez umud kena ke nêro veredayîş. Cezaya lazim ganî bêra dayîş. Tutê min o pîl astengdar o. Raporê îşkenceyî ke bi mi û tutanê mi kerdo estê. Sewbîna cezayê ci zî estê.  5 serrî cezaya ci esta. Birayê ci Mahmut Marhanî Riha de polîs o.  Her tim xeberan resnayêne birayê xo. Mi emnîhet de vat la tu fêde nêkerd. Ez wazena birayê ci wezîfe ra bêro girewtiş. Heta ke o wezîfe ser de bibo asayîşê canê mi çin o.”

 

‘Wa vengê mi bêro eşnawitiş’

 

Gulcane vat ke çapemenîya hetgir mi reyde xebere viraşte la çîyê ke mi vat înan nêda û wina qiseykerdişê xo qedênaye: “Mi qala birayê ci kerd la na babete nêdayî. Qala caardişê KADESî kerd. La mi qeydê telefonî nêkerdbî. Polîs hema wina deqeyêk de nêame. Badê qewimîyayîşî cîranê mi polis gêrayî. Çîyê ke nêameyî cuyayîş nuştî. Waştişê mi no yo. Wa dewlet wayîrê cinîyan biveja. Mêrdeyê mi bivejîyo do mi bikişo. Eke ez bêra kiştiş zî xebera mi biweşênê. Ez nêeşkena tu lazimîyêk xo bîyara ca. Dermankerdişê mi dewam keno. Ez dewlete de hem hetî ekonomi û hem zî hetê manewî ra hetkarî wazena. Wa heme selahîyetdarî vengê mi bieşnawî. Tutê mi 6,5 û 2 serrî yî. Mi 30ê êlule de dewaya fekverdayîşî akerd. Mi tutanê xo înan ra waştbî. La ez nika nêwazena. Eke şikdar vejîyo bi bahaneye dîyîşê tutan mi bikişo. Wa tutê mi verê înan de nêbî. Wa dewlet bigêra. Somanê mi yê 6 serrî se ra 39 astegdar o. Banêk zaf xirab de maneno.”