WAN - Sîyasetmedaran reaksîyon mojna hêrişê Tirkîya yê hemverê Rojawanî û vengê yewîye û vengvetişî kerdî.

 

Tirkîya şewa 19ê Teşrîna Peyêne de hemver Vaşûrê Kurdistan û Bakur û Rojhelatê Sûrîye de hêrişê hewayî da dest pêkerdiş. Hêrişan de xeylê hemwelatijî dinyaya xo bedelnayî. Sere de Kurdistan û her cayê dinya de çalakîyê hemverê hêrişan dewam kenê û veng dîya dezgehanê mîyanneteweyîyan ke berpirsîyarî bîyarê ca. Cinîyan Wan de reaksîyon mojna hêrişanê Tirkîya û vengê hîsgerîye kerd.

 

‘Kurdan herra xo pawit’

 

Hemşaredara Saraye Cazîye Dumane da zanayîş ke hemverê destkewtişê şarê Kurd û cinîyê Kurdî de hêriş esto û wina vat: “Sîstemê netew dewlete yewbînan miqate kenê. Şarê Kurdî herra xo ya ke pê têkoşînî dest kerdbî pawit. Têkoşînê hemverê çeteyanê DAIŞî de bi hezaran kesî dinyaya xo bedelnayî. Hêrişî girêdayeyê yewbînan ê. No hêriş hemverê şarê Kurd û şarê bindestî de pê ameyo. AKP-MHP wazenê merdimî hemverê xo bido çok ronayîş û zextê polîtîka kenê dewre. Tu heqê înan serê Rojawanî de çin o. La hêriş pê anê. Ganî tu kesêk hemverê nê polîtîkayan de bêveng nêmano.”

 

Hêrişê Îstîklalî bahane yo

 

Hemşaredara Karaçoban ê Erziromî Remzîye Sonmez zî hêrişê bombayê Kuçeyê Îstîklalî yê 13ê Teşrîna Peyêne de ame meydan ard vîr û vat, hêriş kenê bahane û hêrişê Rojawanî kenê. Remzîye qiseykerdişê xo wina dewam kerd: "AKP-MHP vernîya weçînayîşî xo rê rayîr û metodan gêreno. Her kes zano rayîrê înan rayîrêk rast nîyo. No aqil ra teber o. Bi çi amancê nê hêrişî yenê kerdîş, ma zanê. Nê sey hacetê weçînayîşî şuxilnenê. Çira ma seba polîtîkayê AKPyî bîmîrê? Çira tutê Kurdan bimirê? Ganî ma hemverê hêrişê serê Rojawanî de bêveng nêmanê. Ganî her kes vengê xo berz bikero. Eke ma reaksîyon nêmojnê do tevgerê hewayî bikero.  Ganî ma xo ver bidê û wayîr vejîyê. Ganî şarê Kurdî wayîrê yewbînan vejîyo. Ma heta nika her tim şer dî. Ma êdî nêwazenê şer bivînê."

 

'Ganî yewîye bibo'

 

Turkan Canbuten zî reaksîyon vera hêrişan da û vat, ganî hemverê nê şerî ke bi serran o dewam keno, her kes bibo yew û wina qedêna: "Ganî tu kes bêveng nêmano. Ma bibê yew ma do nê rast bikerê. Ma wayîrê yewbînan vejîyê. Seba zîhnîyetê lêşinî ma bi serran o bedelê giranan danê. Hêrişê hemverê Rojawanî hemverê ma de yê. Ma her hetî de bandorê ci hîs kenê. Ma şer her het ra hîs kenê. Tepiştişê rojnamegeran ra bigîrê heta tecrîdê serê tepişteyan tesîr serê hetî ra keno."