Sema Çaglak

 

ŞIRNEX - Îdareyê Herêmî yê HDPyî do Silopî de kombîyayîşê xo yê serrane pê bîyaro. Hemşaredara HDPyî yê qezaya Silopî Adalet Fîdana ke derheqê kombîyayîşî de ercnayîş kerde dîyar kerd ke temsîlkarê heme şaredarîyan do kombîyayîş de ca bigêrî û polîtîkayê qeyûm û babetê rojane bigêrî dest.

 

Îdareyê Herêmî yê Partîya Demokratîke ya Şaran (HDP) do kombîyayîşê xo yê serrane 3ê kanûne de qezaya Silopî ya Şirnexî de pê bîyaro. No kombîyayîşo yewine yê cinîyanê ke îdareyê herêmî de ca gênî yo. Temsîlkarê heme şaredarîyanê HDPyî yê cinî do kombîyayîş de ca bigêrî. Hemşaredara HDPyî yê qezaya Silopî Adalet Fîdane derheqê kombîyayîşo ke do siba pê bêro de qisey kerd.

 

‘Cinî rolê serkêşîye gênî’

 

Adalete destpêkê qiseykerdişê xo de bale ant hedefgirewtişê cinîyanê kurdî ser û dîyar kerd ke hemverê cinîya kurd û destkewtişê aye de hêrişî estî û vat: “Girdbîyayîşê hêrişê raşteyan û girdbîyayîşê hêrişê zereyê keyeyî girêdayeyê nizdîbîyayîşê hukmî yo. Coka ra tepiştiş, destbendkerdiş û hêrişê hemverê destkewtişê cinîyan her ke şino gird beno. Ganî ma nê polîtîkayan yewbînan ra cîya bigêrî dest. Mîyanê raşteyan de mîyanê zereyî de cinî yenê qetilkerdiş û sebebê înan qetilkerdişan yê tewr gird zî polîtîkaya bêcezaverdayîşî yo. Cinî destpêkê tarîxî ra nata timî rolê serkêşîye girewta. Coka ra hemverê sîstemê faşîstî de sere nêronaya û hetê îqtîdarê AKP û MHPyî ra yena hedefgirewtiş. Cinîyê ke yenê destbendkerdiş, tepiştiş û zext bi înan yeno kerdiş, cinîyê xoverdekar û têkoşerî yî. Bi hêrişê hemverê cinîyan hem mesaj dîyeno cinîyan û hem zî dîyeno komelî.”

 

‘Cinî têkoşînê xo gird kenî’

 

Adalete ard ziwan ke cinî cuyêka newe awan kerdî û vat: “Cinî no koletîya ke aye rê ameyo ferzkerdiş qebul nêkenî. Coka ra her cinî mîyanê têkoşînî de ca gêna û yena hedefgirewtiş, cayê xo heronda ci degêna û têkoşînê xo gird kena. Xoverdayîşê cinî tesîrê xo dana komelî ser û bi no hawa komel yeno hedefgirewtiş. Cinîya ke verê cû gamêk tepîya nêeşta do ewro zî nêerza.”

 

‘Qeyûm ewil dezge û rêxistinê cinîyan hedef gêna’ 

 

Adalete dewamê qiseykerdişê xo de bale ant kombîyayîşê îdareyê herêmî ser û wina dewam kerd: “Îdareyê herêmî yê HDPyî ser de 2 reyan qeyûm ameyî tayînkerdiş. Nê qeyûmî sere de dezgehê cinyan hedef girewtî. Temsîlkarîya cinîyan ameyî girewtiş, dezge û stargehê cinîyan ameyî girewtiş û gure ra ameyî vetiş. Dezgehê cinîyan rê camêrdî ameyî tayînkerdiş. Tîya de zî sîstem rîyê o yê lêşinî mojna. Hetobîn de kombîyayîş do talankerdiş û xespê qey mî zî bêrî munaqaşakerdiş.” 

 

‘Qeyûm nîno şinasnayîş’

 

Adalete da zanayîş ke kombîyayîşê înan do 2 rojan dewam bikero û wina vat: “Îdareyê Herêmî 2 serran de reyêk kombîyayîş virazeno, yew serrî de rayêk zî ercnayîşan keno.  No kombîyayîşê yewine yo. Kombîyayîş de temsîlkarê şaredarîyan yê ke qeyûm tayînê herinda înan ameyî kerdiş û nêameyî kerdiş do pîya kom bibî. 65 şaredarîyê ma estbî û do temsîlkarê 65şaredarîyan no kombîyayîş de ca bigêrî. Hemserekê şardarîye, verfekê kome û heyetê îdareyê herêmî do ca bigêrî. No kombîyayîşêk hîra yo.”