ŞIRNEX - Ahmet Acaro ke Basa de hêrişê cinsî tuta 11 serrî rê kerd û derheqê ey de dewa amebî akerdiş, derheqê ey de dewa amebî akerdiş, ame beraetkerdiş.

 

Qezaya Basa ya Şirnexî de dikandar Ahmet Acar yo 68 serrî, 5ê Temmuze de hêrişê cinsî tuta 11 serrî kerdibi. Hedîse dimayê ke tute pîyê xo ra vat û keyeyî bi rayîrê avûkatanê xo gerreyê Ahmet Acar kerd, eşkera bi. Dimayê gerreyê ame kerdiş de Ahmet Acar amebi destbendkerdiş û dima ra zî bi şertê kontrolê edlî serbest amebi veradayîş. Dima ra Serdozgeriya Komare ya Cizîre derheqê kerdoxî de sûcê "hêrişê cinsî yê hemverê tute” îdîaname amade kerd. Îdîaname hetê 1ine Dadgeha Cezaya Giran ya Cizîre ra amebi qebûlkerdiş.

 

Ewro roniştişê diyîn ê dewa ame vînayîş. Heyetê dadgehe, faîl û avûkat eywana dadgehî de amade bî. Tutî zî bi rayîrê SEGBÎSî tewrê roniştişî bî.

 

Roniştiş bi îfadeyê tute destpê kerd. Tute îfadeyê xo de dîyar kerd ke Ahmet Acarî rê gerrekerdox nîya û dîyar kerd ke hedîse nîna vîrê aye.

 

Avûkata tute zî dîyar kerd ke tute binê tedayê kerdox Ahmet Acar  de ya û waştişê tepiştişê Ahmet Acarî kerd.

 

Ahmet Acar zî pawitişê xo de heme îddîayê derheqê xo de red kerd û veradayîşê xo waşt.

 

Heyetê Dadgehe dimayê mabênêke kilm de qerarê xo eşkera kerd û Ahmet Acar beraet kerd.