RIHA - Camêrdo bi nameyê Ferhat Şengulo tewrê cinîya bi nameyê Dengbêj Hedîye Kalkane xeylê cinîyanê bînan tehdît kerd û dest dergê bi înan kerd. Ferhat cinîyan serê medyaya dîjîtale de teşîr keno, eynî wextî de înan bi ‘teror’ sucdar keno, înan tehdît keno û tehdîtê tepiştişî bi înan keno. Her çend ke heta nika xeylê reyan gerreyê ci bêro kerdiş zî tehqîqat ya zî cezayêke nêdîyaya ci. Derheqê babete de Hedîye Kalkane qisey kerd û dîyar kerd ke Ferhat bi raporê xo yê delutî lêşinîyanê xo nimneno û reaksîyonê xo ard ziwan.

 

Camêrdo bi nameyê Ferhat Şengulo bi rojan o cinîya bi nameyê Dengbêj Hedîye Kalkane ke ci reyde eynî ca de xebetîya, tehdît keno. Ferhat fotografanê Hedîye serê medyaya dîjîtale ra pare kerdo û bi nuşteyê ‘Endama rêxistine, terorîst a’ sucdar nawneno. Heto bîn de bi nuşteyanê cînsîyetperestan dest dergî keno. Gerreyê Hedîye ra dima vejîya raşte ke Ferhat dest dergê bi xeylê cinîyan kerdo û înan tehdît kerdo. Wazeno ke cinîyan bi tehdîtan bitersno û bibo sebeb ke cezaya sîyasî bigêrî. Seba ke raporê ci yê delutî esto tu ceza nêgêno û derheqê ci de tehqîqat nîno akerdiş. 

 

Hedîye bi tepiştişî ameye tehdîtkerdiş

 

Hedîye çîyê ke ameyî sereye aye ma rê vat û da zanayîş ke aye yena tehdîtkerdiş û vat: “Cayo ke ez xebetîyena de çendêke Ferhat Şengulî xebetîyayo. Seba ke ma eynî ca de xebetîyayêne ma hemverê ci de baş bî. Ez zî mîyanê ci de heme embazî ci rê hetkarî dayêne û bi hawayêke baş nizdîyê ci bîyêne. Badê demêk ma tay nizdîbîyayîşê ci ferq kerd û mi vat ke ganî bêro îqazkerdiş û gure ra bêro dûrîkerdiş. Wexto ke rexneyanê mi eşnawit dest bi tehdîtan kerd. Sere de mi rê vat ‘Şima qatilê tutan ê. Şima endamê PKK, PYDyî yê. Ez do şima gerre bikera û ti do bikewa zindan. Şima gureyê fuhuşî kenê û sewbîna’. Peynîya nê tehdîtan nêamae û serê medyaya dîjîtale ra jî parekerdişan kerd. Keye ra xeylê  kesî ci reyde qisey kerdî la o tehdîtanê xo dewam kerd. Bawerîya ci ya bi xo ma kerde şikan. No kamî ra hêzê gêno ke hende bêbextîyan keno. No çîyêke şikin o.”

 

Gerreyê Hedîye cidî nêame dîyîş 

 

Hedîyeye dîyar kerd ke badê demêke serê medyaya dîjîtale ra Ferhat hemverê aye de parekerdişê tehdîtkarî pare kerdo vatişanê cînsîyetperestî hemverê aye de şuxilnayo û şuxilneno. Hedîse na rewşe ra dima şona asayiş û Ferhat gerre kena. Hedîye nêrazîbîyayîşê xo yê hemverê asayîşî mojnena û vat: “Wexto ke ez şîya mi fotografê Ferhat Şengulî yê medyaya dîjîtalî de pare kerdo û fotografê mesajanê ke mi rê şirawito mojna selahîyetdaranê asayîşî. Mi pêro delîlanê tehdîtî pare kerd. Polîsî parekerdişê Ferhat Şengulî esas girewtî û vatî ‘Ti şina çalakîyanê HDPyî’. Nizdîbîyayîşê asayîşî mi aciz kerd û mi reaksîyon mojna na rewşe. Seke ke vajî ti neheq a. Mi rê vatî raporê ci esto û ê nêeşkenê çîyêk bikerê.” 

 

Ferhat Şengul xeylê cinîyan tehdît kerdo

 

Hedîye dîyar kerd ke hewteyêk ra zêdêr o tehdîtanê Ferhat Şengulî reyde ri bi rî manena û reyna muracatê asayîşî kerda. Hedîye dewamê qiseykerdişê xo de wina vat: “Zêdebîyayîşê tehdîtan û pêşnîyazê lêşinan ra dima mi reyna muracatê asayîşî kerd. Mi gerreyê xo bi delîlan mojna. Tehqîqat de ez musaya ke bi desan dosyayê nê kesî asayiş de esto. Bi desan cinîyî muracatê asayîşî kerdî û no merdim gerre kerdî. Vera nê çîyan reyna zî ceza ci rê naêmeya dayîş. Pê raporê xo yê delutî çîyo ke wazeno keno. Beno ke yeno şuxilnayîş zî. Nê çîyan ra dima ez hîna hêrs bîya û bi israr mi waştişê xo ard ziwan. Israrê mi ra dima polîsî zabitname hadre kerdî.”

 

'Wa yewna cinî nê çîyan nêcuya’

 

Hedîyeye tewr peynî vat ke tu wa yewna cinî nê çîyan nêcuya û qiseykerdişê xo wina peynî kerd: “Se beno wa bibo no bêbextîya ke merdiman sucdar nawneno, nîno qebulkerdiş. Yew rexne ra rewşe ard tîya. No gureyê delutîyî nîyo. No deluyêke ra zêder o, keso ke destdergê keno ra yo. Lazim o bêro cezakerdiş. Wa yewna cinî nêba mexdurê ci. Beno ke xeylê cinîyê bînî bêveng bibî. Ez seba heme cinîyan ewro wazena veng bivejna. Ez tîya ra veng dana selahîyetdaran ke wezîfeyê xo bîyarî ca”