MERKEZÊ XEBERAN - Mak Pirtûk ke serê înternetî de dest bi rotişê kitaban kerd, da zanayîş ke ê Ewropa de wazenê bibê veng û rengê ciwananê kurdan. Sewbîna vatî: “Ma wazenê her çi berardişê kurdkî û yê derheqê kurdan de bibê, demêko kilm de biresnê verê destê wendoxan."

 

Keyepelê Mak Pirtûkî serê înternetî de kitaban roşeno. Merkezê ci Almanya de yo. Mak Pirtûk ke hetê çend ciwanê kurdan ra ame awankerdiş, bi eşkerayîyêke nuşteyî qalê awankerdiş û muhtewayê xebata xo kerd. 

 

Mak Pirtûk bi sloganê “Dergûşa Kitabê Kurdkî” dest pêkerd, eşkerayîya xo ya nuşteyî de wina vano:

 

“Ma ganî sere de dîyar bikerê ke ma bi nameyê MakPirtûk.com kitabrotişîyê online kenê. Merkezê ma Almanya yo. Ma wazenê her çi berardişê kurdkî û yê derheqê kurdan de bibi, demêko kilm de biresnê verê destê wendoxan. Wareyê xebata ma bi taybetî heme welatê Ewropayî yo. Sewbîna goreyê waştişî ma do xo biresnê wendoxê kurdkî yê seranserê dinya zî. Wendoxê ma kam ci welatê dinya de bê, ma do bi rayîrê tewr baş înan rê bibê cewab û ma do waştişê înan yê kitaban biresnê verê destanê înan. Bi no hewayî ma do pirdê mabêne wendox û berardişê kurdkî xurt, rayîrê asê asan û kilm bikerê. 

 

Meseleya ma ya destpêkerdişê karêke wina ma dest pêkerd û ma nêeşkayî bi asanî xo biresnê kitabanê kurdkî. Ma sey çend ciwanê kurdî yê ke Ewropa de cuyenê, gama ke ma verê xo da wendişê edebîyatê kurdkî û metnê kurdkî, ma hîna zêde rî bi rî rastê astengîyêk ameyî ke o zehmetîyê bidestkerdişê nê tewir berardişan bi. Gama ke ma derûdorê xo ra persa, ma mûsayî ke bi kêmî beşêk pîl yê kurdê dîasporîya nê wareyî de zehmetiyan ancenê. Fikrê awankerdişê makpirtûkî nê haybîyayîşî virazya. Ganî bêro vatiş ke rex endîşeyê bazirganiyî motîvasyonê ma yê sereyîn oyo ke ma kitabê ziwanê xo bi rehetî biresnê verê destê milletê ma yê nê cayî de bi fikrê ma no çî do sîrkulasyonêk baş virazno mabêne nê kesan de û îhtimal o rayîr ver xeylêk xebatanê kulturî-edebî abikero. Nika hema vaje ma pêro weşanxneyê kurdkî ra kitab arêdayê û înan keyepelê xo rê bar kenê. Dimayê ke no kar qediya, ma do bi hawayêkê profesyonel û motîvasyonêk berz dest bi karê xo bikerê. Ma hêvî kenê ke MakPirtûk bibo dilopêke qij wareyê wendiş û cigêrayîşê kurdkî. 

 

Seba averşîyayîş û berzkerdişê MakPirtûkî ma do paweyê rexne û pêşniyazê şima bibê.”