COLEMÊRG - Endama HDPyî ya PMmî Leyla Atsak derheqê polîtîkayê şerê taybet yê ke Colemêrg û qezayanê ci de yenê kerdiş de qisey kerd û da zanayîş ke cinî û ciwanî hemverê polîtîkayê şerê taybetî de sere nêronenê û xo rêxistin kenê, têkoşînê xo domnenê.

 

Polîtîkayê şerê taybet yê ke hemverê şarê Kurd û Kurdistanî de bi taybet cinî û ciwanan hedef gênê. Bajarê Kurdistanî yê ke qetilkerdişê cinîyan zêde bîyo de polîtîkayê şerê taybet roj bi roje giran bena. Qorîcî, leşker û polîsî destdergê û tecawuzê cinîyan kenê û bêcezaverdayîşî vera kerdoxî sucanê xo domnenê. Colemêrg û qezayanê ci de zî hemverê cinîyan de polîtîkayê şerê taybet dewam keno. Herême de fuhuş, şuxilnayîşê tîryakî yeno ferzkerdiş. Cinîyê ke nê caardişan reyde yenê rî bi rî ya întîhar kenê, yan zî keyeyê înan bajarî ra remenê.

 

Endama Meclîsê Partîye (PM) ya Partîya Demokratîke ya Şaran (HDP) Leyla Atsake polîtîkayê şerê taybet yê ke Colemêrg û qezayanê ci de yenê caardiş, ercnaye.

 

‘Cayê ke cinî birêxistin bîyê de polîtîkayê şerê taybet veng vejîyayî’

 

Leyla Atsake da zanayîş ke polîtîkayê şerê taybet rewşa şerê serê komelî yo û na rewşe komelî ver bi şerî ra beno û wina dewam kerd: “Polîtîkayê şerê taybetî de tewr zêde cinî yenê hedefgirewtiş. Bajarê ke rêxistinbîyayîşê cinîyan xurto ra yew zî bajarê Colemêrgî yo. Na nuqta de serra verêne ra heta nika serê cinîyan de polîtîkayê şerê taybet yena caardiş. Netîceyê nê polîtîkayan de bêîradekerdişê cinî, komelî ra dûrîfînayîş, tena verdayîş, tede verdayîşê cuyêka bêexlaq û întîharî vejîyayî raşte. Cayê ke cinî birêxistin bîyî de polîtîkayê şerê taybet veng ameyî vetiş.”

 

‘Cinîyan vengê xo berz kerdî’

 

Leylaye ard ziwan ke no nizdîyê yew serrî yo ke Colemêrg û qezayanê ci de hemverê cinîyan de polîtîkayê lêşinî yenê caardiş û cinîyan mehkumê cuyêka bêexlaq kenê. Leylaye dewamê qiseykerdişê xo de vat: “Herême de şuxilnayîşê tîryak û fuhuş cinîyan ser de yenê ferzkerdiş. Cinîyî hemverê nê polîtîkayanê lêşinan de vengê xo berz kerdî û têkoşînê xo rayra berdî. Yê ke hewl danî cuye weş bikerê û rayîr bidê komelî, reyna cinîyî yê. La coka ra her tim hedefe dewlete de yê. Cinî komel û cuye weş kenê. Eke cinî bê îrade bêra verdayîş, komel bê îrade beno. Na nuqta de cinî hedefê camêrd û dewlete de ya.”

 

‘Seba çinîkerdişê îradeyê cinî polîtîkayê cîya yenê rayraberdiş’

 

Leylaye sewbîna vat ke seba pawitiş û vera polîtîkayê lêşinî, rayîro yewine no yo û wina domna: “Hemverê nê polîtîkayê lêşinan de xebatê ma dewam kenê. Tewr peynî seba şermizarkerdişê 9ê Teşrîna Verêne do Gever de rayîrraşîyayîşêk pê biameyêne. O wext 7 embazê ma yê cinî ameyî destbendkerdiş. Dekewtişê nezaretî de embazê ma raştê cigêrayîşê zitî ameyî. Bi nê caardişî hewl dayî îradeyê embazanê ma bişiknê. Seba ke embazê ma yê cinî cigêrayîşê zitî qebul nêkerdî raştê îşkenceyê ameyî. Na polîtîkaya şerê taybetî ke dewlete rayra bena ra ya. Seba çinîkerdişê îradeyê cinîyan polîtîkayê cîya yenê rayraberdiş. La cinî se kenê, hemverê plîtîkayan de sere nêronenê û têkoşînê xo dewam kenê.”

 

‘Ganî ma xo bi rêxistin bikerê û têkoşînê xo dewam bikerê’

 

Leylaye tewr peynî dîyar kerd ke cinî û ciwanî hêzê dinamik yê komelî yê û domna: “Eke ti komelêke çinî bikerê, hêzê dînamîkî yê nê komelî zî çinî benê. Wexto ke ciwan wayîrê îredayê xo nêvejîyî, xo teslîmê sîstemî bikerê do bibê robot. Hemverê polîkayê şerî yê ke herême de yenê rayraberdiş ganî ma heme xo birêxistin bikerê û têkoşînê xo dewam bikerê.”