STENBOL - Avûkatê Buroyê Huqûqî yê Asrinî semedê pêvînayîşê bi muwekîlê xo Rayberê PKKyî Abdullah Ocalanî ke bi 19 aşmî yo xebere ci ra nêna girewtiş, muracatê Serdozgerîya Komare ya Bursa û Mudirîyê Zîndanê Îmraliyî kerdî.

 

Avûkatanê Rayberê PKKyî Abdullah Ocalanî ke binê şertê tecrîdî de Zîndanê Asayîşê Tîpê Fyî yê Berzî yê Îmraliyî de yeno tepiştene Rezan Sarica, Raziye Ozturk, Faîk Ozgur Erol û Emran Emekçî seba ke muwekîlê xo reyde pêvînayîş bikerê, reyna muracatê Serdozgerîya Komare ya Bursa û Mudirîya Zîndanê Îmraliyî kerdî.

 

Avûkatanê Abdullah Ocalanî, seba ke bi muwekîlê xo dir pêvînayîş bikerê, hewte ra 2 muracatan kenê, la nê muracatê avûkatan ne negatîf ne zî pozîtîf nînê cewabkerdiş. Avûkatan tewr peynî 8 serran da dima 2-22ê gulane, 12-18ê hezîrane û 7ê tebaxa 2019î de muwekîlê xo reyde pêvînayîş kerdbi. Cewab nêdîyeno muracatê pêvînayîşan.

 

Avûkatanê Abdullah Ocalanî ra Rêzan Sarica û Newroz Uysal, dimayê 8 serrî mabêne 2-22ê Gulane, 12-18ê Hezirane û 7ê Gulana 2019 de şîbî Îmrali. Abdullah Ocalan ke 22 serrî yo tecrîd de yo.

 

Pêvînayîş 2019ine de amebi kerdiş

 

Reya ewil 27ê Nîsana 2020 de tena 20 deqîqeyan bi telefon dir qisey kerd. Tewr peyîn serê îdeayê medyaya komelî de vila bî, dimayê reaksîyonê komelî 25ê Adara 2021 de Edliyeyê Rihayî de tena 4.5 deqîqeyan bi rayîrê telefonî birayê xo Mehmet Ocalanî dir qisey kerd û telefon nîme de amebê birnayene.

 

3 Aşmî cezaya dîsîplînî

 

Eynî wextî de Serekîya Heyetê Dîsiplînî 3yê sibata 2022ine de cezaya qedexeyê pêvînayîşê bi keyeyî  dir seba  3 aşmî dabî Ocalan û no qerar 21ê sibate de qetî bibi. Seba pêro astengiyê bêhuqûqî yê vernîya pêvînayîşê bi keyeyî reyde bêro û pêvînayîşî virazê, avûkatê Ocalanî 28ê adare de muracatê Dadgeriya Înfazî ya Bursayî kerdî. Dimayê ke no muracat ameyo redkerdiş avûkatî pê hesiyayî ke qerarê qedexeyê pêvînayîşî yê 3 aşmî ameyo dayîş.