Sema Çaglak

 

ŞIRNEX - Cinîyê Şirnexijî derheqê 25 Teşrîna Peyêne Roja Têkoşînê Hemverê Şîdetê Serê Cinîyan de qisey kerdî û dîyar kerdî ke eke cinî her ca de xo bi rêxistin bikerê do tu hêz nêeşkeno, zorê têkoşînî înan bero.

 

25ê Teşrîna Peyêne 1960ine de 3 wayî bi nameyê  Minerva, Maria Teresa û Patria Mirabel ke sey pelpelikî yene vîrardiş, ameyî qetilkerdiş. Her hîrê wayî Komara Domînîk de hemverê dîktatoriya Trujillo de xo ver dabî û amebî qetilkerdiş. Seba nê roja qetilkerdişê înan hîrê wayan 25ê Teşrîna Peyêne Roja Têkoşînê Hemverê Şîdetê serê Cinî ame îlankerdiş. Cinîyê ke her serre vernîya 25ê Teşrîna Peyêne de dest bi çalakîyan kenê û 25ê Teşrîna Peyêne de fînalê çalakîyê xo danê, emsar  xebatanê xo bi sloganê, “Hemverê faşîzm û qirkerdişî, dem demê azadîya cinîyan a” destpê kerdî.

 

Cinîyê Şirnexijî derheqê 25ê Teşrîna Peyêne de qisey kerdî û venga pîlkerdişê têkoşînê cinîyan kerdî.

 

‘Wa cinîyî bibê yew’

 

Zumreta Çakir dîyar kerd ke 25ê Teşrîna Peyêne seba cinîyan yena manaya berzkerdişê têkoşînê hemverê zulmê serê cinîyan û vat: “Ma hemverê îqtîdar û camêrdan de sere nêtewênenê û heta ke ma ra bêro, ma do xo ver bidê. Wa cinî heme bibê yew û dest bidê destê yewbînan. Eke wina bo, ma cinîyî tewr bi hêz bibê. Cinîyî çiqas hêzê xo pîl kenê, hende zî hêrişî înan rê yenê kerdiş. Hemverê hêrişan de zî ganî cinîyî vengê xo berz bikerê û hêzê xo bi rêxistin bikerê.”

 

‘Her roje cinî yenê kiştiş û şîdet înan rê yeno kerdiş’

 

Nurîye Uca zî ard ziwan ke her roje cinîyî hetê camêrdan ra yenê qetilkerdiş û vat: “Ganî cinî hemverê şîdet û zulmî de têkoşîn bikerê. Her roje cinî yenê kiştiş û şîdet înan rê yeno kerdiş. Demo ke cinî hemverê nê zulmî de sere wedarnena zî yena ablûqakerdiş. Seba ke cinî ra tersenê. Nêwazenê hêzê cinî hemverê xo de bivînê û coka her tim wazenê cinî binê serdestîyê înan de bibê. Eke cinîyêke rê şîdet bêro kerdiş yan zî bêro qetilkerdiş ganî pêro cinî bibê yew û wurzê serê lingan.”

 

‘Tewr zêde cinîyê kurdî hedef de yê’

 

 

Fadîle Malgaz zî dîyar kerd ke cinîyê kurdî seba ke tewr zêde xo ver bidê tim benê hedef  û wina vat: “Cinî vilêkê Kurdîstanî yê. Cinî xo ver danê, xoverdayîşê cinîyan zî camêrdan aciz keno. Coka tewr zêde cinîyan kenê hedefê xo. Eke cinî yewîya xo viraznê tu hêz û qûwet nêeşkeno zorê înan bero.” 

 

 

 

‘Cinî sere nêtewênenê’

 

Tewr peyîn zî Kumru Uner qisey kerd û vat: “Ma wazenê no zulm û tehdayê serê cinîyan peynî bibo. Ma azadîya cinîyan wazenê. Hemverê cinîyan de nêheqî û şîdet tewr zêde beno. Cinî hemverê şer, zulm û tecrîdî de xo ver dane. Yê ke tewr zêde hemverê polîtîkayê îqtîdarî ra veng vejê cinî yê û coka tewr zêde wazenê hêz û zorê têkoşînê cinîyan berê. Labelê cinîyî sere nêtewênenê û do xoverdayîşê xo tewr pîl bikerê.”