AMED - Bi bahaneyê ke parekerdişê serê medyaya dijîtale yê rojnamegeran Berîtan Sarya rojnamegere Berîtan Canozer kerda, bi pêroyî 3 serrî, aşmêke û 5 rojî cezaya zîndanî dayî Berîtan Canozere. 

 

Roniştişê 4ine dewaya ke muxabîra ma Berîtan Canozere bi îdayê "Bi rayîrê çapemenîya propagandayê rêxistine kerda” ci ra yena hukmkerdiş, 4ine Dadgeha Cezaya Giranî ya Amedî ame vînayîş. Berîtane tewrê roniştişî nêbî la avûkatê aye Resul Temûr salona dadgehî de amade bi. Roniştişê dewa Platformê Rojnamegeranê Cinîyan ê Mezopotamyayî (MKGP), Komeleya Rojnamegeranê Dîcle Firatî, Komeleya Xebatkarê Medya û Huqûqî (MLSA), Sendîkayê Rojnamegeran ê Tirkîya (TGS) û xeylêk rojnamegeran ra ame taqîbkerdiş.

 

'Ganî esas nêro girewtiş’

 

Avûkat Resûl Temur, dîyar kerd ke serê nameyê Berîtane yeno îdakerdiş ke 4 hesabê medyaya dîjîtale esto, la nê hesaban 3 aîdê muwekîla ci nêyê, seba ke ê nêzanê makamî îdayê parekerdişê kam ci hesaban ceza wazenê nêzanê ê do îdanameyî esas bigîrê û wina pawitiş bikerê. Resûlî dîyar kerd ke muwekîlê ci parekerdişê hesabê xo qebûl kena, la hesabê Twîterê "Berîtansarya" aîdê muwekîla ci nîyo, hesabê babete vatişê wayîrê hesap zî serê hesabê xo no eşkera kerdo. Resûlî dewamî de wina vat: “Cigêrayîşê ke ameyo kerdiş de zî diyar nîyo ke muwekîla mi serê nê hesabî de parekerdiş kerda. Çarçewaya dosyayêke bîn de hesabê medyaya komelî ya muwekîla mi ameyî cigêrayîş. Dadgeha Destûrê Bingehîn caardişê 'dewrîyeyê Sanal' îptal kerda. Pêwa ke tu taqîbat çin o yê delîlê bi no hewa ameyê komkerdiş bêhuqîqî yê. Ganî verê çiman de nêro girewtiş.”

 

Dadgehe dimayê mabêne seba parekerdişê hesabê ke Berîtane qebûl kena do serrêke, 10 aşmî û 15 rojî û seba hesabê ke aîdê aye nîyo "Berîtansarya" zî serrêke û 3 aşmî cezaya hepsî dayî Berîtane. 

 

Avûkatê Berîtane seba cezaya Berîtane ame birnayîş, muracatê dadgeha îstinafî bido.