AMED - DFG û MKGPyî dîyar kerdî ke cipersayîşê 5 aşman de hemverê 16 rojnamegeran de yeno kerdiş de tu averşîyayîş nêvirazîya yo û vat: “Ganî selahîyetdarê hukmî nêbê hemkarê nê şermê ke yeno kerdiş.”

 

Platformê Rojnamegeranê Cinîyan ê  Mezopotamyayî (MKGP) û Komeleya Rojnamegeran a Dîcle Firatî (DFG) derheqê tepiştişê 16 rojnamegeran verê Edlîyeyê Amedî de eşkerayîye dayî. Eşkerayîye de pankartê pêroyî bi fotografanê 26 rojnamegeranê tepişteyan ser de bi ame berzkerdiş û sloganê "Çapemenîya azade nîna bêvengkerdiş” ame berzkerdiş. Rojnamegerî, hemserekê Amedî yê Partîya Demokratîke ya Şaran (HDP) Gulîstan Atasoy û Zeyyat Ceylan, Rêxistinê HDPyî yê Merkez û Qezayê Amedî, avûkatê Baroyê Amedî, Meclîsê Dayîkê Aştîye û rêxistinê sivîlî yê bajarî tewrê eşkerayîye bî.

 

Eşkerayîye bi Kurdkî û Tirkî hetê endamê DFGyî Kadrî Esen û endama MKGPyî Gulşen Koçuke ra ame wendiş.

 

Metnê eşkerayîya hempar wina yo: “Çarçewaya cipersayîşê hemverê xebatkaranê çapemenîya azade de 8ê Hezîrane de 20 ci ra rojnamegerî, 22 kesî ameyî destbendkerdiş û dimayê 8 rojî yê destbendkerdişî, bi hawayêkê bêhuqûqî hetê dadgehe ra 16 rojnamegerî Amed de ameyî tepiştiş. Semedo ke embazê ma bi kamerayanê xo heqîqet pawitêne, seba bêhuqûqîyê îqtîdar wazeno komelî bêhelm verdo, teşhîr kerdî û seba bî vengê kesê ke yenê pelçiqnayîş, bî vengê cinî, ciwan û xeylêk kesan coka ameyî tepiştiş. Pêwa serê nê tepiştişî açarya îşkence, 5 aşmî derbaz bî zî, hema zî no tepiştiş dewam keno.

 

Her partîya ke bî îqtîdar sere de hêrişê çapemenîya azade kerd

 

Her partîyê ke Tirkîya de bî îqtidar, destpêk de seba resnayîşê heqîqetî yê komelî rê bêro astengkerdiş, çapemenîya azade kerdî hedef. Her sanîye de vernîya ke verê xo bidê komelî, destpêk de xebatkarê çapemenîya azade ameyî destbendkerdiş, tepiştiş û kiştiş. Cayê xebatkarê çapemenîya azade ci de şuxilênê, ameyî bombavarankerdiş. Pêwa nê hêrişan zî xebatkarê çapemeniya azade game peyser nêeştî. Yê ke vuryayî û şî, her tim îqtîdar bi xo bî. AKPyo ke bi sozê demokrasî, heqê merdiman, qanûnê sîvîl bi îqtidar zî bi rayîr û metodê verê ameyê ceribnayîş, hêrişê çapemenîya azad kerd. Dimayê 16 Hezîrane de 16 embazê ma ameyî tepiştiş, 25ê Teşrîna Peyêne de zî startê operasyonêke newe ame dayîş. Na rey zî 10 embazê ma ameyî tepiştiş. No zî qîm nêkerd, sey serranê 1990, 2011 û 2016ine eştî serê buroyanê ma, dest dayî serê heme hacetanê ma.

 

Hema cipersayîş nêqedîya yo

 

Serê tepiştişî de 5 aşmî derbaz bi la hema cipersayîşê derheqê 16 embazanê ma de temam nêbîyo. Hukm, seba baronanê tiryakîyan,  kesê sûcê merdimayî kenê, versucê tecawuzî lezabez rayra benê, seba  rojnamegerî nê sûcan vejenê werte, bi 5 aşmî yo cayê xo de vinderto! Ma sebebê na rewşe baş zanê; çike demo ke iddianame bêro amadekerdiş do vejîyo werte ke "sûcê" embazanê ma tena viraştişê xeberan o. Do vejîyo werte ke binê tepiştiş û destbendkerdişan, binê nameyê "operasyonê pîlî de” çiqas veng o. Do vejîyo werte ke hacetê rojnamegeran ê fezlekeyê emniyetî de sey "hacetê rêxistine" derbaz benê, eslê xo de hacetê heqîqetî yê. Seba nê sebebî ke embazê ma 5 aşmî yo tepişte yê û îddianameyê derheqê înan de nêameyo amadekerdiş.

 

Do serewedaritiş dewam bikero

 

Ma wazenê no çî bêro zanayîş; karê rojnamegerê 8ê Hezîrane û 25ê teşrîna verêne de ameyî tepiştiş nîme de nêmend. Çapemenîya Azade, hemverê tepiştiş û destbendkerdişan sere wederna û do no serewedaritiş dewam bikero. Çike no adetê hemverê teda û qirkerdişan sere nêtewêneno, çok nêdano ro, hetê komelî ra ameyo awankerdiş. Ganî meqamê hukmî yê ke bi polîtîkayê îqtîdarî form gênê zî êdî nêbê temaşekerdoxê na rewşe; ganî azadîya embazanê ma ya fîzîkî bi ca bêra. Ganî tu kes nêbo hemparê nê fedîkarîya ke açaryaya cezayêke.”